ବ୍ରହ୍ମପୁର ଅଫିସ,୧୭।୪:ବ୍ରହ୍ମପୁରରେ ମାର୍ଚ୍ଚ ଦ୍ୱିତୀୟ ସପ୍ତାହ ପରେ ପରେ ବିଭିନ୍ନ କିସମର ଆମ୍ବ ବଜାରରେ ଉପଲବ୍ଧ ହୋଇଥାଏ। ବ୍ୟବସାୟିକ ଦୃଷ୍ଟିରୁ ମଧ୍ୟ ଆମ୍ବ ବ୍ୟବସାୟରେ ବ୍ରହ୍ମପୁର ରାଜ୍ୟରେ ସର୍ବୋଚ୍ଚ ସ୍ଥାନ ହାସଲ କରିଛି। କିନ୍ତୁ ଚଳିତ ବର୍ଷ ଆରମ୍ଭ ହୋଇ ଏକମାସ ପୂରିବାକୁ ଥିଲେ ସୁଦ୍ଧା ଏଯାବତ ବଜାରରେ ବିଭିନ୍ନ କିସମର ଭିନ୍ନ ଆମ୍ବ ଉପଲବ୍ଧ ହୋଇନାହିଁ। ରେଶମ ସହରରେ ବର୍ତ୍ତମାନ ସୁଦ୍ଧା କେବଳ ପାନକୁଲ ଓ ବାଇଗଣପଲି ଆମ୍ବ ବିକ୍ରି ହେଉଛି। ଖୁଚୁରା ବଜାରରେ ପାନକୁଲ ଆମ୍ବ କେଜି ପିଛା ୧୨୦ରୁ ୧୪୦ ଏବଂ ବାଇଗଣପଲି କିଲୋପ୍ରତି ୧୨୦-୧୬୦ ଟଙ୍କାରେ ବିକ୍ରି ହେଉଛି। ଆମ୍ବର ଏଭଳି ଚଢ଼ା ଦରକୁୁ ଗ୍ରାହକ କିଣିବାକୁ ଡରୁଛନ୍ତି। ଏନେଇ ଅନ୍ଧପସରା ରୋଡ଼ରେ ଥିବା ଆମ୍ବ ବଜାରର ନୀଳକଣ୍ଠେଶ୍ୱର ଆମ୍ବ ବ୍ୟବସାୟୀ ସଂଘ ସମ୍ପାଦକ ପ୍ରକାଶ ଚନ୍ଦ୍ର ଗୌଡ଼ଙ୍କ ସହ ଯୋଗାଯୋଗ ବେଳେ କହିଥିଲେ, ବଜାରରେ ବିକ୍ରି ହେଉଥିବା ଆମ୍ବ ପଡ଼ୋଶୀ ଆନ୍ଧ୍ରରୁ ଆମଦାନୀ ହୋଇଥାଏ। ଆମ୍ବ ବ୍ୟବସାୟ ଦୃଷ୍ଟିରୁ ଆନ୍ଧ୍ର ପ୍ରଦେଶର ବିଜୟାନଗର, ପାର୍ବତୀପୁର, ଚିପୁରପୁଲି, ଓ ଅନ୍ୟାନ୍ୟ ଜାଗାରୁ ଆମଦାନୀ ହୋଇ ବ୍ରହ୍ମପୁର ଆସେ। ସୁବର୍ଣ୍ଣରେଖା, ପେନାକୁଲୁ, ବାଇଗଣପଲି, ଆଖୁରସ, ନଡ଼ିଆ, କଲମୀ ସମେତ ଅନେକ କିସମର ଆମ୍ବ ବ୍ରହ୍ମପୁର ଓ ଗଞ୍ଜାମ ବଜାରରେ ବିକ୍ରି ହେବା ସହ ରାଜ୍ୟର କଟକ, ପୁରୀ, ଭୁବନେଶ୍ୱର, ଭଦ୍ରକ, ଯାଜପୁର ସମେତ ବାହାର ରାଜ୍ୟ ଝାଡ଼ଖଣ୍ଡ, ପଶ୍ଚିମବଙ୍ଗକୁ ମଧ୍ୟ ରପ୍ତାନି ହୋଇଥାଏ। କିନ୍ତୁ ଚଳିତ ବର୍ଷ ଆରମ୍ଭରୁ ଜାନୁୟାରୀରେ ହୋଇଥିବା ବାରମ୍ବାର ଲଘୁଚାପ ବର୍ଷା ଯୋଗୁ ଆନ୍ଧ୍ର ପ୍ରଦେଶରେ ଆମ୍ବ ଉପତ୍ାଦନ ବାଧାପ୍ରାପ୍ତ ଓ ବିଳମ୍ବ ହୋଇଛି। ଫଳରେ ଆବଶ୍ୟକ ପରିମାଣର ଆମ୍ବ ଆମଦାନୀ ମଧ୍ୟ ହୋଇପାରୁନାହିଁ। ପ୍ରତିବର୍ଷ ଏପ୍ରିଲ ବେଳକୁ ଦୈନିକ ଲକ୍ଷ ଲକ୍ଷ ଟଙ୍କାର ଆମ୍ବ ଆମଦାନୀ ହେଉଥିଲା। କିନ୍ତୁ ଚଳିତ ବର୍ଷ କେବଳ ପାନକୁଲ ଆମ୍ବ ଦୈନିକ ୨୦ରୁ ୨୫ ଟନ ଆସୁଥିବା ବେଳେ ବାଇଗଣପଲି ୩ ଦିନରେ ଥରେ ୮ ରୁ ୧୦ଟନ ଆମଦାନୀ ହେଉଛି। ଏଣୁ ମେ’ ଦ୍ୱିତୀୟ ସପ୍ତାହ ପରେ ବଜାରରେ ଠିକ ପରିମାଣରେ ଆମ୍ବ ବିକ୍ରି ହୋଇପାରିବ ବୋଲି ଜଣାପଡ଼ିଛି।
