ହାଟଡିହୀ/ଛେନାପଦୀ,୧୮।୮(ଶୁଭକାନ୍ତ ନାୟକ/ନିରାକାର ପରିଡା): କେନ୍ଦୁଝର ଜିଲା ହାଟଡିହୀ ବ୍ଲକ ଅନ୍ତର୍ଗତ ବଡ଼ରମ୍ପାସ ସେବା ସମବାୟ ସମିତିର ପରିଚାଳନା କମିଟିକୁ ନିଲମ୍ବନ କରାଯାଇଛି। କେନ୍ଦୁଝର ଡିଆରସିଏସ (ଡେପୁଟି ରେଜିଷ୍ଟ୍ରାର କୋ-ଅପରେଟିଭ ସୋସାଇଟି) ପର୍ଶୁରାମ ପାତ୍ର ଜାରି କରିଥିବା ଆଦେଶ ନଂ ୨୬୧୩/୧୭ ଅଗଷ୍ଟ ୨୦୨୬ ଅନୁସାରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
ଡିଆରସିଏସ ପର୍ଶୁରାମ ପାତ୍ରଙ୍କ ସୂଚନା ମୁତାବକ, ପରିଚାଳନା କମିଟି ବିରୋଧରେ ଏକାଧିକ ଅନିୟମିତତା ଅଭିଯୋଗ ରହିଥିଲା। ସମବାୟ ସମିତିରୁ ଋଣ ନେଇ ତାହା ଅସୁଲ କରିନଥିବା ଚାଷୀମାନଙ୍କୁ ଧାନ ବିକ୍ରି ନିମନ୍ତେ ନାମ ପଞ୍ଜିକରଣ କରିବାରୁ ବଞ୍ଚିତ କରିବା, କମିଟି ନିୟମିତ ଓ ଠିକ୍ ଭାବେ କାର୍ଯ୍ୟ ନ କରିବା, ସମୟାନୁସାରେ ଅଡିଟ୍ ରିପୋର୍ଟ ଉପସ୍ଥାପନ ନ କରିବା ଏବଂ ଆୟ-ବ୍ୟୟର ହିସାବ କିମ୍ବା ବଜେଟ୍ ଅନୁମୋଦନ ନ କରାଇବା ଆଦି ବିଭିନ୍ନ ଅବହେଳା ଓ ନିୟମ ଉଲ୍ଲଂଘନ କାରଣରୁ ଏହି ପରିଚାଳନା କମିଟିକୁ ନିଲମ୍ବନ କରାଯାଇଛି।
ଖୁବ୍ ଶୀଘ୍ର ଏହି ନିଲମ୍ବନ ଆଦେଶର କପି ସମ୍ପୃକ୍ତ ପରିଚାଳନା କମିଟିକୁ ପ୍ରଦାନ କରାଯିବ। ଏହା ସହିତ ସମବାୟ ସମିତିର ସମସ୍ତ କାର୍ଯ୍ୟାବଳୀ ଓ ପରିଚାଳନା ଦାୟିତ୍ୱ ସୁରୁଖୁରେ ଚାଲୁ ରଖିବା ପାଇଁ ଆନନ୍ଦପୁର ଏଆରସିଏସ (ଆସିଷ୍ଟାଣ୍ଟ ରେଜିଷ୍ଟ୍ରାର କୋ-ଅପରେଟିଭ ସୋସାଇଟି) କାର୍ଯ୍ୟାଳୟର ଜଣେ ବରିଷ୍ଠ ଅଧିକାରୀଙ୍କୁ ସ୍ୱତନ୍ତ୍ର ଦାୟିତ୍ୱ ତୁଲାଇବାକୁ ନିର୍ଦ୍ଦେଶ ଦିଆଯାଇଛି।
