ଜାକର୍ତ୍ତା,୨୩।୧୧: ଉଲ୍କା ପିଣ୍ଡ ପାଇ ରାତାରାତି କୋଟିପତି ହୋଇଥିବା ଜଣେ ଯୁବକଙ୍କ ଘଟଣାରେ ଏବେ ନୂଆ ମୋଡ଼ ଆସିଛି। ଉଲ୍କା ପିଣ୍ଡ ପାଇ ସେ କୌଣସି ପ୍ରକାରର କୋଟିପତି ହୋଇନାହାନ୍ତି ବରଂ ତାଙ୍କ ସଙ୍ଗେ ଧୋକା ହୋଇଛି ବୋଲି ଉକ୍ତ ଯୁବକ ଜଣକ ମନ୍ତବ୍ୟ ଦେଇଛନ୍ତି। ଯାହାକୁ ନେଇ ଏବେ ସୋସିଆଲ ମିଡିଆରେ ଚର୍ଚ୍ଚା ଜୋର ଧରିଛି। ସୂଚନାଯୋଗ୍ୟ, କିଛି ଦିନ ତଳେ ଇଣ୍ଡୋନେସିଆ ଜୋଉସାର କୋଲାଙ୍ଗରେ ରହୁଥିବା ୩୩ ବର୍ଷୀୟ ଜୋସୁଆ ନାମକ ଜଣେ ଯୁବକଙ୍କ ଘରର ଛାତ କଣା କରି ଗୋଟିଏ ବିରଳ ଉଲ୍କା ପିଣ୍ଡ ଖସିପଡ଼ିଥିଲା। ଯାହାର ଓଜନ ପ୍ରାୟ ୨ କିଲୋରୁ ଊର୍ଦ୍ଧ୍ୱ ହେବ।
ତେବେ ବିଶେଷଜ୍ଞଙ୍କ କହିବା ଅନୁସାରେ ଏହି ଉଲ୍କା ପିଣ୍ଡ ପ୍ରାୟ ସାଢ଼େ ୪ ବିଲିୟନ ବର୍ଷର ପୁରୁଣା। ଯାହାର ମୂଲ୍ୟ ପ୍ରାୟ ୧୪ କୋଟି ଟଙ୍କା ହେବ ବୋଲି କୁହାଯାଉଛି। ହେଲେ ଜୋସୁଆ ଏହାକୁ ବିକ୍ରି କରି ୧୦ କୋଟିରୁ ଊର୍ଦ୍ଧ୍ୱ ଟଙ୍କା ଆୟ କରିଥିଲେ ବୋଲି ଏକ ଅନ୍ତର୍ଜାତୀୟ ଗଣମାଧ୍ୟମରେ ଚର୍ଚ୍ଚା ହୋଇଥିଲା। କିନ୍ତୁ ଜୋସୁଆ କହିଛନ୍ତି ଯେ, ସେ ଉଲ୍କା ପିଣ୍ଡ ପାଇ କୌଣସି ପ୍ରକାରର କୋଟିପତି ହୋଇନାହାନ୍ତି। ଅନ୍ତର୍ଜାତୀୟ ଗଣମାଧ୍ୟମଗୁଡ଼ିକ ତାଙ୍କ ବିଷୟରେ ମିଥ୍ୟା ଖବର ଦର୍ଶାଇଛନ୍ତି। ସେ ଆହୁରି ମଧ୍ୟ କହିଛନ୍ତି, ଉକ୍ତ ଦୁର୍ଲଭ ଉଲ୍କା ପିଣ୍ଡକୁ ସେ ମାତ୍ର ୧୦ ଲକ୍ଷ ଟଙ୍କାରେ ବିକ୍ରି କରିଛି। ଆଉ ଏହି ଟଙ୍କାକୁ ସେ ତାଙ୍କ ପରିବାର ଓ ଗୋଟିଏ ଚର୍ଚ୍ଚ ନିର୍ମାଣ କାର୍ଯ୍ୟରେ ଖର୍ଚ୍ଚ କରିଛନ୍ତି। ତେଣୁ ସେ କୋଟିପତି ହୋଇଥିବା ଖବରରେ କୌଣସି ସତ୍ୟତା ନାହିଁ। ତାଙ୍କ ସହ ଧୋକା ହୋଇଛି ବୋଲି ଜୋସୁଆ କହିଛନ୍ତି।
