ନୂଆଦିଲ୍ଲୀ,୨।୧: କ୍ରୀଡା ମନ୍ତ୍ରଣାଳୟ ୨୦୨୫ ମେଜର ଧ୍ୟାନଚାନ୍ଦ ଖେଳ ରତ୍ନ ପୁରସ୍କାର ଘୋଷଣା କରିଛି। ଏଥର କ୍ରୀଡା ଜଗତରେ ଇତିହାସ ସୃଷ୍ଟି କରିଥିବା ୪ ଖେଳାଳିଙ୍କୁ ଦେଶର ସର୍ବ ବୃହତ କ୍ରୀଡ଼ା ପୁରସ୍କାର ଖେଳ ରତ୍ନରେ ସମ୍ମାନିତ କରାଯିବ। ମନୁ ଭାକର, ଡି ଗୁକେଶ, ପ୍ରବୀଣ କୁମାର ଏବଂ ହରମନପ୍ରୀତ ସିଂ ଖେଳ ରତ୍ନ ପୁରସ୍କାର ପାଇବେ। ଆସନ୍ତୁ ଜାଣିବା ସେମାନେ କେତେ ପୁରସ୍କାର ରାଶି ପାଇବେ …
ଖେଳ ରତ୍ନ ପୁରସ୍କାର ଜିତିଥିବା ଖେଳାଳିଙ୍କୁ ନଗଦ ୨୫ ଲକ୍ଷ ଟଙ୍କା ପ୍ରଦାନ କରାଯାଇଥାଏ । ଏହା ବ୍ୟତୀତ ସେମାନଙ୍କୁ ପଦକ ଏବଂ ପ୍ରମାଣପତ୍ର ମଧ୍ୟ ଦିଆଯାଏ। ୨୦୨୦ ପର୍ଯ୍ୟନ୍ତ, ଖେଳ ରତ୍ନ ପାଉଥିବା ଖେଳାଳିଙ୍କୁ କେବଳ ୭.୫ ଲକ୍ଷ ଟଙ୍କା ପୁରସ୍କାର ରାଶି ମିଳୁଥିଲା, କିନ୍ତୁ ମୋଦି ସରକାର ଏହାକୁ ୨୫ ଲକ୍ଷ ଟଙ୍କାକୁ ବୃଦ୍ଧି କରିଛନ୍ତି।
ପ୍ୟାରିସ ଅଲିମ୍ପିକ୍ସରେ ଶୁଟିଂରେ ୨ ପଦକ ଜିତି ମନୁ ଭାକର, ଡି ଗୁକେଶଙ୍କ ବ୍ୟତୀତ ପ୍ରବୀଣ କୁମାରଙ୍କୁ ମଧ୍ୟ ମେଜର ଧ୍ୟାନଚାନ୍ଦ ଖେଳ ରତ୍ନ ପୁରସ୍କାରରେ ସମ୍ମାନିତ କରାଯିବ। ପ୍ୟାରିସ ଅଲିମ୍ପିକ୍ସ ୨୦୨୪ରେ ନିଜର ଅଧିନାୟକତ୍ୱରେ ହକି ଦଳ ପାଇଁ ବ୍ରୋଞ୍ଜ ପଦକ ଜିତାଇଥିବା ହରମନପ୍ରୀତ ସିଂ ମଧ୍ୟ ଖେଳ ରତ୍ନ ପାଇବେ। ସମ୍ମାନ ସମାରୋହ ୧୭ ଜାନୁଆରୀ ୨୦୨୫ରେ ରାଷ୍ଟ୍ରପତି ଭବନରେ ପୂର୍ବାହ୍ନ ୧୧ଟାରେ ଆରମ୍ଭ ହେବ।
