ଭେଡ଼େନ, ୬ ଜୁନ୍ (ହୃଷିକେଶ ଖମାରୀ): ସମଗ୍ର ଅଞ୍ଚଳରେ ତାପମାତ୍ରା ଥମିବାର ନାଁ ନେଉ ନଥିବା ବେଳେ ଦିନକୁ ଦିନ ଗ୍ରୀଷ୍ମ ପ୍ରବାହ ବଢ଼ିବାରେ ଲାଗିଛି। ଏଭଳି ସ୍ଥିତିରେ ପାନୀୟ ଜଳ ପାଇଁ ଲୋକେ ବିଭିନ୍ନ ସ୍ଥାନରେ ଡହକବିକଳ ହେଉଛନ୍ତି। ଏହି ଜଳାଭାବ ମଧ୍ୟରେ ଭେଡ଼େନ ବ୍ଲକରେ ଏକ ମେଗା ପାନୀୟ ଜଳ ପ୍ରକଳ୍ପର ପାଇପ୍ ଫାଟିଯିବାରୁ ଲୋକମାନଙ୍କ ଦୁର୍ଦ୍ଦଶା ଆହୁରି ଦ୍ଵିଗୁଣିତ ହୋଇଯାଇଛି। ଗତ ଶନିବାରଠାରୁ ପ୍ରକଳ୍ପର ମେନ୍ ଲାଇନ୍ ପାଇପ୍ ଫାଟିଯିବା ଯୋଗୁଁ ଅଞ୍ଚଳର ୫ରୁ ଊର୍ଦ୍ଧ୍ୱ ଗ୍ରାମକୁ ଜଳ ଯୋଗାଣ ସମ୍ପୂର୍ଣ୍ଣ ବନ୍ଦ ରହିଛି।
ମିଳିଥିବା ସୂଚନା ଅନୁଯାୟୀ, ମେଗା ପାନୀୟ ଜଳ ପ୍ରକଳ୍ପର କାମ ଚାଲିଥିବା ସମୟରେ ଅସାବଧାନତା ବଶତଃ ଏହାର ମେନ୍ ଲାଇନ୍ ପାଇପ୍ଟି ଫାଟି ଯାଇଥିଲା। ଏହା ଫଳରେ ସାଲନା ପାଣିଟାଙ୍କିରୁ ଜଳ ଯୋଗାଣ ବ୍ୟାହତ ହୋଇଛି। ଏହାଦ୍ୱାରା ଭେଡ଼େନ ବ୍ଲକ ଅନ୍ତର୍ଗତ ଉଦେପୁର,ଦେଶ ଭଟଲି, ବିଶିପାଳି, ଦେଶ ପଥର୍ଲା, ସାଇନା, ଦେଶକୁମ୍ଭାରୀ ଗ୍ରାମକୁ ପାନୀୟ ଜଳ ଯୋଗାଣ ବନ୍ଦ ହୋଇ ଯାଇଛି । ପ୍ରବଳ ଖରା ଓ ତାତି ମଧ୍ୟରେ ପାଣି ବନ୍ଦ ହୋଇଯିବାରୁ ଶତାଧିକ ଗ୍ରାମବାସୀ ପାନୀୟ ଜଳ ଟୋପାଏ ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି।
ଏ ସମ୍ପର୍କରେ ଭେତ଼େନ ବ୍ଲକ ଜଳ ଓ ପରିମଳ ବିଭାଗ କନିଷ୍ଠ ଯନ୍ତ୍ରୀଙ୍କୁ ପଚରାଯିବାରୁ ଅସାବଧାନତା ଭାବରେ ପାଇପ ଲାଇନ କାମ କରୁଥିବାରୁ ମେଗା ପାନୀୟ ଜଳ ପ୍ରକଳ୍ପ ମେନ ଲାଇନ ପାଇପ ଫାଟି ଯାଇ ଥିବାରୁ ଜଳ ଯୋଗାଣ ବ୍ୟାହତ ରହିଛି । ରବିବାର ସକାଳେ ମେଗା ପାନୀୟ ଜଳ ପ୍ରକଳ୍ପର ଏକ ଟେକନିକାଲ ଟିମ୍ ପହଞ୍ଚି ମରାମତି କରିବେ । ଯେତେଶୀଘ୍ର ସମ୍ଭବ ହେବ, ସମସ୍ତ ଗ୍ରାମକୁ ବିଶୁଦ୍ଧ ପାନୀରେ ଦଳ ଯୋଗାଣ କରାଯିବ ବୋଲି କନିଷ୍ଠ ଯନ୍ତ୍ରୀ କହିଥିଲେ ।
