ନୂଆଦିଲ୍ଲୀ,୨୪।୩: ଲାଞ୍ଚ ନେବା ଏବଂ ସଂସଦରେ ପ୍ରଶ୍ନ ପଚରାଯିବା ଅଭିଯୋଗରେ ସଂସଦର ସଦସ୍ୟତାରୁ ବରଖାସ୍ତ ହୋଇଥିବା ତ୍ରୁଣମୂଳ କଂଗ୍ରେସ (ଟିଏମସି) ନେତା ମହୁଆ ମୋଇତ୍ରା ନିର୍ବାଚନ ଆୟୋଗଙ୍କ ନିକଟରେ କେନ୍ଦ୍ରୀୟ ଏଜେନ୍ସିକୁ ନେଇ ଅଭିଯୋଗ କରିଛନ୍ତି। ପଶ୍ଚିମବଙ୍ଗର ନାଦିଆ ଜିଲାର କୃଷ୍ଣନଗରରୁ ତ୍ରୁଣମୂଳ କଂଗ୍ରେସ ପ୍ରାର୍ଥୀ ମୋଇତ୍ରା ନିର୍ବାଚନ ଆୟୋଗଙ୍କୁ ଏକ ଚିଠି ଲେଖିଛନ୍ତି ଯେଉଁଥିରେ ସେ ତାଙ୍କ ବାସଭବନରେ ସିବିଆଇ ଦ୍ୱାରା କରାଯାଇଥିବା ଚଢାଉକୁ ବେଆଇନ ବୋଲି କହିଛନ୍ତି।
ଏହା ସହିତ ମହୁଆ ମଧ୍ୟ ସିବିଆଇ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରିଛନ୍ତି। ସିବିଆଇ ତାଙ୍କୁ ହଇରାଣ କରୁଛି ଏବଂ ତାଙ୍କ ନିର୍ବାଚନ ପ୍ରଚାରରେ ବାଧା ସୃଷ୍ଟି କରିବାକୁ ଉଦ୍ୟମ କରୁଥିବା ଅଭିଯୋଗ କରି ଟିଏମସି ନେତା ନିର୍ବାଚନ ଆୟୋଗଙ୍କୁ ଏକ ଚିଠି ଲେଖିଛନ୍ତି।
ସୂଚନାଯୋଗ୍ୟ, ରବିବାର (୨୩ ମାର୍ଚ୍ଚ), ଆଲିପୁର ସମେତ ମହୁଆଙ୍କ ସଂସଦୀୟ ନିର୍ବାଚନମଣ୍ଡଳୀ କୃଷ୍ଣନଗରରେ ସିବିଆଇ ଚାରିଟି ସ୍ଥାନରେ ଚଢାଉ କରିଥିଲା। ଏହା ପୂର୍ବରୁ ସିବିଆଇ ତାଙ୍କ ବିରୋଧରେ ଏଫଆଇଆର୍ ପଞ୍ଜୀକୃତ କରିଥିଲା। ଏ ସମ୍ପର୍କରେ ସେ ନିର୍ବାଚନ ଆୟୋଗ (ଇସିଆଇ)କୁ ଲେଖିଥିବା ଚିଠିରେ କହିଛନ୍ତି ଯେ ସିବିଆଇ ତଦନ୍ତର ଉଦ୍ଦେଶ୍ୟ ହେଉଛି ତାଙ୍କ ଲୋକ ସଭା ନିର୍ବାଚନ ପ୍ରଚାର ଅଭିଯାନକୁ ହଇରାଣ କରିବା ଏବଂ ବନ୍ଦ କରିବା। ଆଦର୍ଶ ଆଚରଣ ସଂହିତା ସମୟରେ କେନ୍ଦ୍ରୀୟ ଅନୁସନ୍ଧାନକାରୀ ସଂସ୍ଥାର କାର୍ଯ୍ୟକଳାପକୁ ନିୟନ୍ତ୍ରଣ କରିବା ପାଇଁ ତୁରନ୍ତ ନିର୍ଦ୍ଦେଶନାମା ଜାରି କରିବାକୁ ନିର୍ବାଚନ ଆୟୋଗଙ୍କୁ ସେ ଅନୁରୋଧ କରିଥିଲେ।
