ବ୍ରହ୍ମପୁର,୨୧ା୮(ସୁବାସ ଚନ୍ଦ୍ର ପାଢ଼ୀ):ମହାରାଜା କୃଷ୍ଣଚନ୍ଦ୍ର ଗଜପତି (ଏମ୍କେସିଜି) ମେଡିକାଲ ଓ ହସ୍ପିଟାଲର ଡାକ୍ତରଙ୍କ ଘରୋଇ କ୍ଲିନିକ ପ୍ରୀତି ରୋଗୀଙ୍କୁ ସମସ୍ୟାରେ ପକାଉଛି। ଡ୍ୟୁଟି ସମୟରେ ଡାକ୍ତର ଘରୋଇ କ୍ଲିନିକ୍ ଯାଇପାରିବେ ନାହିଁ ବୋଲି ସରକାର କଡ଼ା ନିୟମ କରଛନ୍ତି। କିନ୍ତୁ ଏହି ନିୟମକୁ ଡାକ୍ତରମାନେ ଖୋଲାଖୋଲି ଉଲ୍ଲଂଘନ କରୁଛନ୍ତି। ଗୋଇଲୁଣ୍ଡିରୁ ନୂଆବସଷ୍ଟାଣ୍ଡ୍ ରୋଡ଼ରେ ବହୁ ଘରୋଇ କ୍ଲିନିକରେ ଏମ୍କେସିଜିର ଡାକ୍ତରମାନେ ଚିକିତ୍ସା କରୁଛନ୍ତି।
ଏମକେସିଜି ମେଡିକାଲ ଉପରେ ପ୍ରତିଦିନ ଦକ୍ଷିଣ ଓଡିଶା ଓ ପଡୋଶୀ ଆନ୍ଧ୍ରପ୍ରଦେଶର ହଜାର ହଜାର ରୋଗୀ ନିର୍ଭର କରୁଛନ୍ତି। ହେଲେ ଏଠାରେ ବରିଷ୍ଠ ଡାକ୍ତରମାନେ କନିଷ୍ଠ ଡାକ୍ତରଙ୍କୁ ଦାୟିତ୍ୱ ହସ୍ତାନ୍ତର କରି ଘରୋଇ କ୍ଲିନିକ ମୁହାଁ ହେଉଥିବା ଦେଖାଯାଉଛି। ଯଦ୍ୱାରା ମେଡିକାଲର ବିଭିନ୍ନ ବିଭାଗ ଆଗରେ ରୋଗୀ ଓ ସମ୍ପର୍କୀୟମାନେ ଘଣ୍ଟାଘଣ୍ଟା ଧରି ଡାକ୍ତରଙ୍କୁ ଅପେକ୍ଷା କରୁଛନ୍ତି। ଏହାର ଫାଇଦା ଉଠାଇ କ୍ଲିନିକର ଦଲାଲମାନେ ଡାକ୍ତରଙ୍କୁ ଶୀଘ୍ର ଦେଖାଇବା ନାଁରେ ରୋଗୀଙ୍କଠାରୁ ମୋଟା ଅଙ୍କର ଟଙ୍କା ଆଦାୟ କରୁଛନ୍ତି। ଫଳରେ ଗରିବ ରୋଗୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଡାକ୍ତରଙ୍କ ଏଭଳି କାର୍ଯ୍ୟରେ ଅବହେଳା ଉପରେ ଅଙ୍କୁଶ ଲଗାଇବା ପାଇଁ ରାଜ୍ୟ ସରକାର ଏମ୍କେସିଜି ମେଡିକାଲରେ ବାୟୋମେଟ୍ରିକ ବ୍ୟବସ୍ଥା କଲେ। ବିଭିନ୍ନ ସ୍ଥାନରେ ସିସିଟିଭି କ୍ୟାମେରା ମଧ୍ୟ ଲଗାଇଲେ। ଏହା ସତ୍ତ୍ୱେ ଡ୍ୟୁଟି ସମୟରେ ଡାକ୍ତରମାନେ ଘରୋଇ କ୍ଲିନକକୁ ଯାଉଛନ୍ତି। ଏ ନେଇ ମାନବ ଅଧିକାର ସୁରକ୍ଷା ମଞ୍ଚର ଆବାହକ ଅବନୀ ଗୟା ନିଜ ପ୍ରତିକ୍ରିୟାରେ କହିଛନ୍ତି, ରୋଗୀ କ୍ଷେତ୍ରରେ ବିଭିନ୍ନ ସମସ୍ୟାର ସମାଧାନ ପାଇଁ ଘଣ୍ଟ ଯାତ୍ରା ଜରିଆରେ ପ୍ରତିବାଦ କରିଆସୁଛୁ। ଡ୍ୟୁଟି ସମୟରେ ଡାକ୍ତରମାନେ ଯେପରି ଘରୋଇ କ୍ଲିନିକ ଯାଇ ନ ପାରିବେ ସେ ଦିଗରେ ୫-ଟି ସଚିବ ଓ ଜିଲା ପ୍ରଶାସନ ଦୃଷ୍ଟି ଦେବାକୁ ସେ ଦାବି କରିଛନ୍ତି।
