ଭୋପାଳ,୨୧।୧୧: ମଧ୍ୟପ୍ରଦେଶର ଧାର ଜିଲାର ବିଧାୟକ ତଥା ପୂର୍ବତନ ମନ୍ତ୍ରୀ ଉମଙ୍ଗ ସିଙ୍ଗାରଙ୍କ ବିରୋଧରେ ଏକ ବଳାତ୍କାର ମାମଲା ରୁଜୁ ହୋଇଛି। ଜଣେ ୩୮ ବର୍ଷୀୟା ମହିଳା ନୌଗାଓଁ ପୋଲିସ ଷ୍ଟେଶନରେ ଅଭିଯୋଗ କରିଛନ୍ତି। ମହିଳା ଜଣକ ନିଜକୁ ଉମଙ୍ଗଙ୍କ ସ୍ତ୍ରୀ ବୋଲି ବର୍ଣ୍ଣନା କରିଛନ୍ତି। ମହିଳା ଅଭିଯୋଗ କରିଛନ୍ତି, ଉମଙ୍ଗ ନଭେମ୍ବର ୨୦୨୧ରୁ ନଭେମ୍ବର ୧୮, ୨୦୨୨ ମଧ୍ୟରେ ଧାର ଜିଲାର ପିଡବ୍ଲ୍ୟୁଡି କାର୍ଯ୍ୟାଳୟ ପଛରେ ଅବସ୍ଥିତ ବିଧାୟକଙ୍କ ବାସଭବନରେ ତାଙ୍କୁ ଅନେକ ଥର ବଳାତ୍କାର କରିଥିଲେ। କେବଳତ ନୁହେଁ, ତାଙ୍କୁ ମାରପିଟ୍ ମଧ୍ୟ କରିଥିଲେ।
ଏହି ସମସ୍ତ ଅଭିଯୋଗ ଆଧାରରେ ଧାର ପୋଲିସ ଆଇପିସିର ଧାରା ୩୭୬, ୩୭୭ ଏବଂ ୪୯୮ ଅନୁଯାୟୀ ଉମଙ୍ଗ ସିଙ୍ଗାରଙ୍କ ବିରୋଧରେ ମାମଲା ରୁଜୁ କରିଛି। ଅଭିଯୋଗ କରିଥିବା ମହିଳା ଜଣକ ଜବଲପୁରର। ତାଙ୍କ ଅଭିଯୋଗରେ ପୋଲିସ କହିଛି ଯେ, ମହିଳା ଜଣଙ୍କ ଏକ ସାଧାରଣ କାର୍ଯ୍ୟକ୍ରମରେ ଉମଙ୍ଗ ସିଙ୍ଗରଙ୍କୁ ଭେଟିଥିଲେ। ଦୁହେଁ ଫୋନରେ କଥା ହେବା ଆରମ୍ଭ କଲେ। ଉମଙ୍ଗ ତାଙ୍କୁ ବିବାହର ପ୍ରତିଶୃତି ଦେଇଥିଲେ। ଏହା ପରେ ମହିଳା ଉମଙ୍ଗଙ୍କ ସହ ଦିଲ୍ଲୀ, ଗୁରୁଗ୍ରାମ, ଧାର ଏବଂ ଭୋପାଳରେ ଥିବା ତାଙ୍କ ବାସଭବନରେ ରହିଥିଲେ। ଏହି ସମୟରେ ଉମଙ୍ଗ ତାଙ୍କ ସହ ଶାରୀରିକ ସମ୍ପର୍କ ସ୍ଥାପନ କରିଥିଲେ ଏବଂ ପରେ ତାଙ୍କୁ ବିବାହ କରିବାକୁ ମନା କରିଦେଇଥିଲେ। ଯେତେବେଳେ ମହିଳା ଜଣକ ଏନେଇ ପୋଲିସରେ ଅଭିଯୋଗ କରିବାକୁ ଧମକ ଦେଇଥିଲେ, ଉମଙ୍ଗ ତାଙ୍କୁ ମାର୍ଚ୍ଚ ୧୬, ୨୦୨୨ରେ ଭୋପାଳସ୍ଥିତ ତାଙ୍କ ବାସଭବନରେ ବିବାହ କରିଥିଲେ। ତା’ପରେ ତାଙ୍କୁ ନିର୍ଯାତନା ଦେବା ଆରମ୍ଭ କଲେ।
