ଲଣ୍ଡନ,୧୮।୯ : ଯେଉଁମାନେ କେବେ ବି ଧୂମପାନ କରିନାହାଁନ୍ତି, ସେମାନେ ମଧ୍ୟ ଫୁସଫୁସ କର୍କଟ ରୋଗରେ ଆକ୍ରାନ୍ତ ହେଉଛନ୍ତି। ଲଣ୍ଡନର ଫ୍ରାନ୍ସିସ କ୍ରିକ ପ୍ରତିଷ୍ଠାନର ଗବେଷକମାନେ ସେମାନଙ୍କ ଅଧ୍ୟୟନରେ ପ୍ରକାଶ କରିଛନ୍ତି ଯେ ବାୟୁ ପ୍ରଦୂଷଣ ମଧ୍ୟ ଫୁସଫୁସ କର୍କଟ ରୋଗର ଏକ ଗୁରୁତ୍ୱପୂର୍ଣ୍ଣ କାରଣ। ଅଧ୍ୟୟନରେ ଏହା ମଧ୍ୟ ପ୍ରକାଶ ପାଇଛି ଯେ ୨୦୧୯ ରେ ବିଶ୍ୱରେ ତିନି ଲକ୍ଷରୁ ଅଧିକ ଲୋକଙ୍କର ଫୁସଫୁସ କର୍କଟରେ ମୃତ୍ୟୁ ହେବାର କାରଣ ହେଉଛି ବାୟୁ ପ୍ରଦୂଷଣ। ବର୍ତ୍ତମାନ ପର୍ଯ୍ୟନ୍ତ, କେବଳ ଧୂମପାନ ଅଧ୍ୟୟନରେ ଫୁସଫୁସ କର୍କଟ ରୋଗର କାରଣ ବୋଲି ବିଶ୍ୱାସ କରାଯାଉଥିଲା ।
୪୦ ହଜାର ଲୋକଙ୍କ ଉପରେ କରାଯାଇଥିବା ସର୍ଭେରେ ବୈଜ୍ଞାନିକମାନେ କହିଛନ୍ତି ଯେ ବାୟୁରେ ଉପସ୍ଥିତ ୨.୫ ମାଇକ୍ରୋମିଟର ପ୍ରଦୂଷଣ କଣିବା ନିଶ୍ୱାସ ପ୍ରଶ୍ୱାସରେ ଫୁସଫୁସ୍କୁ ଯାଇ କର୍କଟ ସୃଷ୍ଟି କରିଥାଏ। ୭୦ ପ୍ରତିଶତରୁ ଅଧିକ କ୍ଷେତ୍ରରେ ଫୁସଫୁସରେ ପ୍ରଦାହ ପାଇଁ ଏହା ଦାୟୀ। ଯାହା ସାଧାରଣତଃ କର୍କଟ ସମସ୍ୟା ଲାଗି ସୁପ୍ତ କୋଷଗୁଡିକ ସକ୍ରିୟ କରିଥାଏ । ପିଏମ୍ ୨.୫ ଦ୍ୱାରା ସୃଷ୍ଟି ହୋଇଥିବା ପ୍ରଦାହ ସହିତ ଏହି କୋଷଗୁଡ଼ିକର ବିସ୍ତାର ଟ୍ୟୁମର ସୃଷ୍ଟି ହୋଇପାରେ ବୋଲି ଗବେଷଣା ରିପୋର୍ଟରେ ଉଲ୍ଲେଖ କରାଯାଇଛି।
ବ୍ରିଟେନରେ ପ୍ରତିବର୍ଷ ୬ ହଜାରରୁ ଅଧିକ ଲୋକଙ୍କର କର୍କଟ ଯୋଗୁ ମୃତ୍ୟୁ ଘଟିଥାଏ। ସେମାନଙ୍କ ମଧ୍ୟରୁ ଅଧିକାଂଶ ଯେଉଁମାନେ କେବେ ବି ଧୂମପାନ କରିନାହାଁନ୍ତି। ଏହି ଗବେଷଣା ରିପୋର୍ଟ ୟୁରୋପୀୟ ସୋସାଇଟି ଅଫ ମେଡିକାଲ ଅଙ୍କୋଲୋଜି କଂଗ୍ରେସରେ ମୁଖ୍ୟ ଗବେଷକ ତଥା କର୍କଟ ଔଷଧ ବିଶେଷଜ୍ଞ ପ୍ରଫେସର ଚାଲର୍ସ ସ୍ବେନଣ୍ଟନଙ୍କ ଦ୍ୱାରା ଉପସ୍ଥାପିତ ହୋଇଛି। ୟୁରୋପୀୟ ସୋସାଇଟି ଅଫ ମେଡିକାଲ ଅଙ୍କୋଲୋଜି ଅଙ୍କୋଲୋଜିଷ୍ଟମାନଙ୍କର ଏକ ଅଗ୍ରଣୀ ବୃତ୍ତିଗତ ସଂଗଠନ ଭାବେ ବେଶ୍ ଜଣାଶୁଣା। ଅନେକ ଭାରତୀୟ ସହର, ବିଶେଷକରି ଦିଲ୍ଲୀ ସମେତ ଗାଙ୍ଗେଟିକ ସମତଳ ଭୂମିରେ ଥିବା ସହରଗୁଡ଼ିକ ବହୁ ବର୍ଷ ଧରି ବାୟୁ ପ୍ରଦୂଷଣର ମୁକାବିଲା କରିଆସୁଛନ୍ତି। ୨୦୨୦ରେ ଲାନସେଟ ପ୍ଲାନେଟାରୀ ହେଲ୍ଥରେ ପ୍ରକାଶିତ ଏକ ବିଶ୍ଳେଷଣରୁ ଜଣାପଡିଛି ଯେ ୨୦୧୯ ରେ ଭାରତରେ ୧୬.୭ କୋଟି ଲୋକଙ୍କ ମୃତ୍ୟୁ ବାୟୁ ପ୍ରଦୂଷଣ ଯୋଗୁ ଘଟିଛି। ଦେଶର ସମଗ୍ର ମୃତ୍ୟୁ ମଧ୍ୟରୁ ଏହା ପ୍ରାୟ ୧୭.୮ ପ୍ରତିଶତ ଥିଲା।
ତେବେ ଫୁସଫୁସ କର୍କଟ ପାଇଁ ଧୂମପାନ ସବୁଠାରୁ ବଡ ବିପଦ କାରଣ ହୋଇ ରହିଛି ବୋଲି ଫ୍ରାନ୍ସିସ କ୍ରିକ ଇନଷ୍ଟିଚ୍ୟୁଟର କହିଛି। ଏହା ସତ୍ତ୍ୱେ ବ୍ରିଟେନରେ ଫୁସଫୁସ କର୍କଟ ସମସ୍ୟା ପ୍ରତି ୧୦ ଜରଙ୍କ ମଧ୍ୟରେ ଜଣଙ୍କୁ ହୋଇଥାଏ। ଏଥି ପାଇଁ ବାହ୍ୟ ବାୟୁ ପ୍ରଦୂଷଣ ଦାୟୀ। ଡାକ୍ତର ଏମିଲିଆ ଲିମ କହିଛନ୍ତି ଆମର ବିଶ୍ଳେଷଣରୁ ଜଣାପଡିଛି ଯେ ବାୟୁ ପ୍ରଦୂଷଣର ମାତ୍ରା ଫୁସଫୁସ କର୍କଟ, ମେସୋଥେଲିଓମା ଏବଂ ପାଟି ଏବଂ ଗଳାର କର୍କଟ ହେବାର ଆଶଙ୍କା ସହିତ ଜଡିତ।
ଦ ଲାନସେଟ ଅଙ୍କୋଲୋଜି ଫ୍ରାନ୍ସିସ କ୍ରିକଙ୍କ ଅଧ୍ୟୟନକୁ ଏକ ମହାନ ଆବିଷ୍କାର ବୋଲି କହିଛି । ସ୍ବେନଣ୍ଟନ କହିଛନ୍ତି ଯେ କର୍କଟ ସମସ୍ୟା ସୃଷ୍ଟି କରୁଥିବା ମ୍ୟୁଟେଶନ କୋଷଗୁଡ଼ିକ ଆମ ବୟସ ବଢ଼ିବା ସହିତ ସ୍ବାଭାବିକ ଭାବରେ ଜମା ହୋଇ ରହିଥାଏ। କିନ୍ତୁ ସେଗୁଡ଼ିକ ସାଧାରଣତଃ ସୁପ୍ତ ରହିଥାନ୍ତି। ବାୟୁ ପ୍ରଦୂଷଣ ଫୁସଫୁସରେ ଏହି କୋଷଗୁଡ଼ିକୁ ଜାଗ୍ରତ କରେ, ସେମାନଙ୍କୁ ବଢ଼ିବାକୁ ଉତ୍ସାହିତ କରେ ଏବଂ ଟ୍ୟୁମର ସୃଷ୍ଟି କରେ।
