ବେଙ୍ଗାଲୁରୁ: ପ୍ରତ୍ୟେକ ଦିନ ଅଜବ ଘଟଣା ସବୁ ଘଟୁଛି। ସେଥିରୁ କିଛି ଲୋକଙ୍କ ଆଖିରେ ପଡ଼ୁଥିବାବେଳେ କିଛି ଘଟଣା ଲୋକଲୋଚନକୁ ଆସିପାରୁ ନାହିଁ। ଏମିତି ଏକ ଅଜବ ଘଟଣା ଘଟାଇଛନ୍ତି ବେଙ୍ଗାଲୁରୁର ଜଣେ ସଫ୍ଟଓ୍ବେର୍ ଇଞ୍ଜିନିୟର। ଇଣ୍ଡିଗୋ ଫ୍ଲାଇଟ୍ ଜରିଆରେ ଆନନ୍ଦ କୁମାର ନାମକ ଜଣେ ଯୁବ ଇଞ୍ଜିନିୟର ପାଟଣାରୁ ବେଙ୍ଗାଲୁରୁ ଆସିଥିଲେ। ବିମାନ ଯାତ୍ରାବେଳେ ଆନନ୍ଦଙ୍କ ଲଗେଜ ହଜିଯାଇଥିଲା। ଭୁଲ୍ବଶତଃ ଆଉ ଜଣେ ଯାତ୍ରୀ ତାଙ୍କ ଲଗେଜ୍ ନେଇଯାଇଥିଲେ। ଆନନ୍ଦ ଏହାର ସୂଚନା ଇଣ୍ଡିଗୋ କଷ୍ଟମର କେୟାରକୁ ଫୋନ୍ କରି ଜଣାଇବାରୁ ସେମାନେ ତୁରନ୍ତ ଏହାର ସମାଧାନ କରିବେ ବୋଲି ଆନନ୍ଦଙ୍କୁ ପ୍ରତିଶ୍ରୁତି ଦେଲେ। କିଛିଦିନ ବିତିଯାଇଥିଲେ ମଧ୍ୟ କଷ୍ଟମର କେୟାରରୁ ଆନନ୍ଦଙ୍କ ପାଖକୁ କୌଣସି କଲ୍ ଆସି ନ ଥିଲା, ଯାହାପରେ ସେ ଇଣ୍ଡିଗୋ ଓ୍ବେବ୍ ସାଇଟ୍ ହ୍ୟାକ୍ କରିଥିଲେ। ଫଳସ୍ବରୂପ ତାଙ୍କ ଲଗେଜ୍ ନେଇଥିବା ବ୍ୟକ୍ତି ଜଣଙ୍କୁ ମଧ୍ୟ ସେ ଚିହ୍ନଟ କରିବାରେ ସଫଳ ହେଲେ ଏବଂ ତାଙ୍କ ଲଗେଜ୍ ମଧ୍ୟ ପାଇଗଲେ। ଟୁଇଟର ଜରିଆରେ ଆନନ୍ଦ ସମ୍ପୂର୍ଣ୍ଣ ଘଟଣା ଏକ ପୋଷ୍ଟ ମାଧ୍ୟମରେ ଶେୟାର କରିଛନ୍ତି। ଏହାପରେ ତ୍ରୁଟି ପାଇଁ ଇଣ୍ଡିଗୋ କର୍ତ୍ତୃପକ୍ଷ ତାଙ୍କୁ କ୍ଷମା ମାଗିଛନ୍ତି।
