ଭଦ୍ରକ ଅଫିସ, ୨୨ା୭- ଭଦ୍ରକ ଜିଲାରେ ବଢ଼ୁଥିବା କରୋନା ସଂକ୍ରମଣକୁ ନିୟନ୍ତ୍ରଣ କରିବା ପାଇଁ ବୁଧବାର ଜିଲାର ସମସ୍ତ ପୌରାଞ୍ଚଳ, ବିଜ୍ଞାପିତ ଅଞ୍ଚଳ ପରିଷଦ ଓ ବ୍ଲକ ମୁଖ୍ୟାଳୟମାନଙ୍କରେ ଜିଲା ପ୍ରଶାସନ ପକ୍ଷରୁ ଲକ୍ ଡାଉନ କଟକଣା ଜାରି କରାଯାଇଛି। ଏହି କଟକଣା ବୁଧବାରଠାରୁ ଚଳିତ ମାସ ୩୧ ତାରିଖ ପର୍ଯ୍ୟନ୍ତ ବଳବତ୍ତର ରହିବ ବୋଲି ଜିଲାପାଳ ଡ. ଜ୍ଞାନ ରଞ୍ଜନ ଦାସ ନିର୍ଦ୍ଦେଶାନାମା ଜାରି କରିଛନ୍ତି।
ସୂଚନା ଥାଉକି, ଭଦ୍ରକ ପୌରାଞ୍ଚଳ ଓ ଧାମନଗର ବିଜ୍ଞାପିତ ଅଞ୍ଚଳ ପରିଷଦରେ ୨୦ ତାରିଖରୁ ଅର୍ଥାତ୍ ଦୁଇଦିନ ପୂର୍ବରୁ ଏହି କଟକଣା ଆରମ୍ଭ ହୋଇ ୩୧ ତାରିଖ ପର୍ଯ୍ୟନ୍ତ ବଳବତ୍ତର ରହିଛି। ଏବେ ବାସୁଦେବପୁର ପୌରପାଳିକା, ଚାନ୍ଦବାଲି ଏନ୍ଏସି, ଭଣ୍ଡାରିପୋଖରୀ, ବନ୍ତ, ତିହିଡ଼ି ବ୍ଲକ ମୁଖ୍ୟାଳୟମାନଙ୍କରେ ଲକ୍ ଡାଉନ କଟକଣା ଜାରି କରାଯାଇଛି। ଏହି ସବୁ ଅଞ୍ଚଳରେ ପୋଷ୍ଟ ଅଫିସ, ବ୍ୟାଙ୍କ, ଟେଲିଫୋନ୍ ସେବା, ଏଟିଏମ୍ ସେବା, ବ୍ଲକ, ପୌରପାଳିକା, ପୋଲିସ, ଅଗ୍ନିଶମ ଓ କରୋନା ସମ୍ପର୍କୀତ ସେବା ଯୋଗାଉଥିବା ଅନୁଷ୍ଠାନ, ଡାକ୍ତର, ଔଷଧ ଦୋକାନ, ଜନ ସ୍ବାସ୍ଥ୍ୟ ବିଭାଗ, ଗ୍ୟାସ୍, ବିଦ୍ୟୁତ୍ ବିଭାଗ ସମେତ ଅତ୍ୟାବଶ୍ୟକ ସେବା ଯୋଗାଉଥିବା କାର୍ଯ୍ୟାଳୟ ଖୋଲା ରହିବ। ପରିବା ଦୋକାନ, ଗ୍ରସୋରି, କ୍ଷୀର, ମାଛ, ମାଂସ, ଫଳ ଦୋକାନ ସକାଳ ୫ଟାରୁ ଅପରାହ୍ନ ୧ଟା ପର୍ଯ୍ୟନ୍ତ ଖୋଲା ରହିବ। ଅନ୍ୟ ସମୟରେ ଏହି ଅଞ୍ଚଳମାନଙ୍କରେ କର୍ଫ୍ୟୁ ଭଳି ପରିସ୍ଥିତି ଜାରି ରହିବ ବୋଲି କୁହାଯାଇଛି। ସରକାରୀ କଟକଣା ନ ମାନିଲେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରଶାସନ ସୂଚନା ଦେଇଛି।
