ପ୍ରେମ କରିବା କୌଣସି ପାପ ନୁହେଁ। କିନ୍ତୁ ଯଦି ପ୍ରେମ ତ୍ରିକୋଣୀୟ ହୋଇଯାଏ ତେବେ କଥା ସରିଲା। କାରଣ ଏପରି ପରିସ୍ଥିତିରେ ମାମଲା ଗଡ୍ବଡ୍ ହେବାର ସମ୍ଭାବନା ବେଶୀ ଥାଏ। ଏପରି ଏକ ମାମଲା କର୍ନାଟକର ହାସନ ଜିଲାର ସକଲେଶପୁରରୁ ଆସିଛି। ଏଠାରେ ତ୍ରିକୋଣୀୟ ପ୍ରେମ କେସ୍କୁ ଗ୍ରାମପଞ୍ଚାୟତରେ ସମାଧାନ କରାଯାଇଛି।
ଏକବର୍ଷ ପୂର୍ବେ ସକଲେଶପୁରରେ ରହୁଥିବା ୨୭ ବର୍ଷୀୟ ଯୁବକ ପଡୋଶୀ ଗ୍ରାମର ଜଣେ ୨୦ ବର୍ଷୀୟା ଯୁବତୀଙ୍କୁ ପ୍ରେମ କରୁଥିଲେ। ଉଭୟ ମିଳିମିଶା କରିବାକୁ ଲାଗିଲେ। କିନ୍ତୁ ୬ ମାସ ପରେ ସମ୍ପୃକ୍ତ ଯୁବକଙ୍କୁ ଅନ୍ୟ ଜଣେ ଯୁବତୀଙ୍କ ସହ ପ୍ରେମ ହୋଇଗଲା। ଉଭୟ ମଧ୍ୟ ବୁଲାବୁଲି କଲେ। କିନ୍ତୁ ଏ ବିଷୟରେ ପ୍ରଥମ ଯୁବତୀ ଜାଣି ନ ଥିଲେ। କିନ୍ତୁ ଏହି ତ୍ରିକୋଣୀୟ ପ୍ରେମରେ ସେତେବେଳେ ଟ୍ବିଷ୍ଟ୍ ଆସେ, ଯେତେବେଳେ ଯୁବକଙ୍କ ସମ୍ପର୍କୀୟ ତାଙ୍କୁ ପ୍ରେମିକାଙ୍କ ସହ ବୁଲୁଥିବାର ଦେଖିଦିଅନ୍ତି। ଏହି ସମୟରେ ଘର ଲୋକଙ୍କ ନିଜ ପ୍ରେମ ପ୍ରେମ ସମ୍ପର୍କ କଥା ଖୋଲିକି କୁହନ୍ତି। କିନ୍ତୁ ପରିବାର ଲୋକେ ରାଜି ନ ହୋଇ ଅନ୍ୟତ୍ର ବିବାହ ଠିକ୍ କରିବାକୁ ଲାଗନ୍ତି। ଖବର ପାଇ ପ୍ରଥମ ଏବଂ ଦ୍ୱିତୀୟ ପ୍ରେମିକା ନିଜ ନିଜ ପରିବାର ଲୋକଙ୍କ ଧରି ଆସି ଯୁବକଙ୍କ ଘରେ ପହଞ୍ଚନ୍ତି। ମାମଲା ଜଟିଳ ହେବାରୁ ଗ୍ରାମ ପଞ୍ଚାୟତ ଡକାଯାଇଥିଲା। ସେଠାରେ ଟସ୍ ପଡି ସମାଧାନ ହୋଇଥିଲା। ପଞ୍ଚାୟତରେ ପ୍ରଥମେ ଯୁବକଙ୍କୁ ପଚରାଯାଇଥିଲା ସେ କାହାକୁ ବିବାହ କରିବେ କିନ୍ତୁ ସେ କୌଣସି ଉତ୍ତର ନ ଦେବାରୁ ସେଦିନ କୌଣସି ନିର୍ଣ୍ଣୟ ନିଆଯାଇ ପାରି ନ ଥିଲା। ଏହାପରେ ଯୁବକଙ୍କ କୌଣସି ଉତ୍ତର ନ ଦେବା ଦେଖି ପ୍ରଥମ ଯୁବତୀ ବିଷାକ୍ତ ପଦାର୍ଥ ଖାଇ ଆତ୍ମହତ୍ୟା ଉଦ୍ୟମ କରିଥିଲେ। ବାଧ୍ୟ ହୋଇ ପଞ୍ଚାୟତ ପୁଣି ବସିଲା ଏଥର ଟସ୍ ପଡିଲା, ଯୁବକ କାହାକୁ ବିବାହ କରିବେ। ଶେଷରେ ଟସ୍ ଆତ୍ମହତ୍ୟା ଉଦ୍ୟମ କରିଥିବା ଯୁବତୀଙ୍କ ସପକ୍ଷରେ ଗଲା। ଏବଂ ଯୁବକ ପ୍ରଥମ ଯୁବତୀଙ୍କୁ ବିବାହ କରିବେ ବୋଲି ପଞ୍ଚାୟତରେ ନିଷ୍ପତ୍ତି ହେଲା।
