ଖୋର୍ଦ୍ଧା ଅଫିସ,୧୬ା୫: ଖୋର୍ଦ୍ଧା ଜିଲାରେ ଲଘୁ ଖଣିଜ ସମ୍ପଦ ଲୁଟ୍ ଚାଲିଛି। ଦୈନିକ ଶହ ଶହ ଟ୍ରକରେ ମୋରମ, ବାଲି, କଳାମୁଗୁନି ପଥର, ବଉଳାମାଳା (ମନ୍ଦିର ନିର୍ମାଣରେ ବ୍ୟବହାର ହେଉଥିବା ମୂଲ୍ୟବାନ ପଥର) ଓ ମାଙ୍କଡ଼ା ପଥର ଚାଲାଣ କରାଯାଉଛି। ବେଆଇନ ଭାବେ ପାହାଡ଼ ଖନନ ଚାଲିଛି। ପ୍ରଶାସନ ପକ୍ଷରୁ ବାରମ୍ବାର ଚଢ଼ାଉ ଓ ଜରିମାନା ଆଦାୟ ସତ୍ତ୍ୱେ କୌଣସି ଫରକ ପଡୁନାହିଁ। ମହାପ୍ରଭୁ ଶ୍ରୀଜଗନ୍ନାଥଙ୍କ ଜମି, ସରକାରୀ ଓ ଗୋଚର ଜମି ଉପରେ ମୁଖ୍ୟତଃ ନଜର ରହିଛି। ସବୁଠି ବେଆଇନ ଭାବେ ପଥର ଓ ମୋରମ ଚାଲାଣ ଚାଲିଛି। ସେହିପରି ରାସ୍ତା ସମ୍ପ୍ରସାରଣ ଆଳରେ ତାପଙ୍ଗ ମୁଣ୍ଡିଆ, ଟାଙ୍ଗୀ, ଆରିଆପଡ଼ା ବୃଷବନ୍ଧ, ୧୬ ନମ୍ବର ଜାତୀୟ ରାଜପଥ ପାର୍ଶ୍ୱସ୍ଥ ପାହାଡ଼ରୁ ପଥର କଟା ଯୋଗୁ ଏଗୁଡ଼ିକ ନଣ୍ଡା ପାଲଟିଗଲାଣି। ବିଭିନ୍ନ ସ୍ଥାନରେ ଖନନ ଯୋଗୁ ବଡ଼ ବଡ଼ ଗର୍ତ୍ତ ସୃଷ୍ଟି ହୋଇଛି। ବର୍ଷା ହେଲେ ଏସବୁ ଗର୍ତ୍ତରେ ପାଣି ଜମି କୃତ୍ରିମ ହ୍ରଦର ଭ୍ରମ ସୃଷ୍ଟି କରୁଛି। ପ୍ରଶାସନ ଓ ପୋଲିସର ଅସାଧୁ କର୍ମଚାରୀଙ୍କୁ ହାତବାରିସି କରି ଖଣିଜ ସମ୍ପଦ ଲୁଟିନିଆଯାଉଛି। ଫଳରେ ସରକାର ବିପୁଳ ପରିମାଣର ରାଜସ୍ବ ହରାଉଛନ୍ତି।
ପକ୍ଷରୁ କାଁ ଭାଁ ଚଢ଼ାଉ କରାଯାଉଛି। ଗାଡ଼ି, ମେଶିନ, ଓ ଯନ୍ତ୍ରପାତି ପ୍ରଭୃତି ଜବତ କରାଯିବା ସହ ଜରିମାନା ଆଦାୟ ହେଉଛି। ତେବେ ଚାଲାଣକାରୀ ଖସିଯାଉଛନ୍ତି। ଚୋରା ଚାଲାଣ ପଛରେ ରାଜନୈତିକ ବ୍ୟକ୍ତି ଓ ବଡ଼ବଡ଼ିଆଙ୍କ ହାତ ରହୁଛି। ଫଳରେ ପ୍ରଶାସନ ଚୁପ୍ ବସୁଛି। ବୋଲଗଡ଼, ଚିଲିକା, ବାଣପୁର ସବୁଠି ଏଭଳି ଭାବେ ଚାଲାଣକାରୀ ସକ୍ରିୟ ରହିଛନ୍ତି। କୌଣସି ଖଣିରେ ଚଢାଉ ପୂର୍ବରୁ ମାଫିଆଙ୍କ ପାଖରେ ଖବର ପହଞ୍ଚିଯାଉଛି। ନମ୍ବର ବିହୀନ ଓ ଫିଟ୍ନେସ୍ ନ ଥିବା ଗାଡ଼ିରେ ଚୋରା ଚାଲାଣ ହେଉଥିବାବେଳେ ଏଗୁଡ଼ିକ ଖସିଯିବା ସହଜ ହେଉଛି। ପଥର ପାଇଁ ଖନନ ଯୋଗୁ ସୃଷ୍ଟି ହେଉଥିବା ଗର୍ତ୍ତରେ ଗୋରୁ, ଛେଳି, ମେଣ୍ଢା ପ୍ରଭୃତି ପଡ଼ି ଆହତ ହେଉଛନ୍ତି। ଚାଷ କାର୍ଯ୍ୟ ମଧ୍ୟ ବାଧାପ୍ରାପ୍ତ ହେଉଛି। ବିଭିନ୍ନ ସମୟରେ ଏଭଳି ଅଭିଯୋଗ ନେଇ ସ୍ଥାନୀୟ ବାସିନ୍ଦା ଜିଲା ପ୍ରଶାସନର ଦ୍ୱାରସ୍ଥ ହେଉଛନ୍ତି। ବେଆଇନ ପଥର ଚାଲାଣ, ଖନନ ଓ ବ୍ଲାଷ୍ଟିଙ୍ଗ ବନ୍ଦ ସହ କାର୍ଯ୍ୟାନୁଷ୍ଠାନ ଲାଗି ଦାବି କରୁଛନ୍ତି। ତେବେ କେବଳ ପ୍ରତିଶ୍ରୁତି ମିଳୁଥିଲେ ବି କାର୍ଯ୍ୟାନୁଷ୍ଠାନ ଶୂନ। ଦୀର୍ଘଦିନ ତଳେ ଏସ୍ଟିଏଫ୍ର ଚଢାଉ ଫଳରେ ମାଫିଆଙ୍କ ମଧ୍ୟରେ ଛନକା ପଶିଥିଲା। ସେହିପରି ନ୍ୟାଶନାଲ ଗ୍ରୀନ୍ ଟ୍ରିବ୍ୟୁନାଲ (ଏନ୍ଜିଟି)ର ଛାଟ ପରେ ଜିଲା ପ୍ରଶାସନ ପକ୍ଷରୁ ସ୍ବତନ୍ତ୍ର ଡ୍ରାଇଭ ଆରମ୍ଭ କରାଯାଇ ଲକ୍ଷାଧିକ ଟଙ୍କା ଜରିମାନା ଆଦାୟ କରାଯିବା ସହ କେତେକ ଚୋରାଚାଲାଣକାରୀଙ୍କ ନାମରେ ଥାନାରେ ମାମଲା ରୁଜୁ କରାଯାଇଥିଲା। ଫଳରେ ବେଆଇନ କାରବାର ବନ୍ଦ ରହିଥିଲା। ତେବେ ପରେ ପୁଣି ଯଥା ପୂର୍ବଂ ତଥା ପରଂ ସ୍ଥିତି। ଖଣି ମାଫିଆଙ୍କ ଉପରେ ରୋକ ଲଗା ନ ଗଲେ, ଆଗକୁ ଖୋର୍ଦ୍ଧା ସହରରେ ଲଘୁ ଖଣିଜ ସମ୍ପଦ ଲୋପ ପାଇଯିବ ବୋଲି ପରିବେଶବିତ ମତ ଦେଇଛନ୍ତି। ଜିଲାପାଳ ସଂଗ୍ରାମ କେଶରୀ ମହାପାତ୍ର କହିଛନ୍ତି, ଲଘୁ ଖଣିଜ ଚୋରା ଚାଲାଣ ରୋକିବା ଲାଗି ଜିଲା ପ୍ରଶାସନ ପକ୍ଷରୁ ସ୍ବତନ୍ତ୍ର ଟାସ୍କଫୋର୍ସ ଗଠନ କରାଯାଇଛି। ସେହିପରି ବିଭିନ୍ନ ତହସିଲ ପକ୍ଷରୁ ଚଢ଼ାଉ କରାଯିବା ସହ ଜରିମାନା ଆଦାୟ ହେଉଛି।
