ଖୋର୍ଦ୍ଧା,୧୬ା୧(ପ୍ରଭାତ ପାଣିଗ୍ରାହୀ):ଖୋର୍ଦ୍ଧା ଜିଲାରେ ଖଣି ମାଫିଆଙ୍କ ଦୌରାତ୍ମ୍ୟ ବଢ଼ିଚାଲିଛି। ମାଫିଆମାନେ ବେଆଇନଭାବେ ପାହାଡ଼ ଖନନ କରିବା ସହ ଦୈନିକ ଶହ ଶହ ଟ୍ରକରେ ଲଘୁ ଖଣିଜ ସମ୍ପଦ ଜିଲା ତଥା ଜିଲା ବାହାରକୁ ଚାଲାଣ କରୁଛନ୍ତି। ମାଙ୍କଡ଼ା ପଥର, ମୋରମ, କଳାମୁଗୁନି ପଥର, ବଉଳାମାଳା ପଥର ଆଦି ଚାଲାଣ ହେଉଛି। ପ୍ରଶାସନର ଚଢ଼ାଉ ଏବଂ ଜରିମାନା ଆଦାୟ ସତ୍ତ୍ୱେ ଏଥିରେ କୌଣସି ଫରକ ପଡୁନାହିଁ। ଅନ୍ୟପଟେ ଚୋରାଚାଲାଣ ରୋକିବା ପରିବର୍ତ୍ତେ ମୋଟା ଅଙ୍କ ନେଇ ପ୍ରଶାସନର କେତେଜଣ ଅସାଧୁ କର୍ମଚାରୀ ସେମାନଙ୍କୁ ପରୋକ୍ଷରେ ପ୍ରୋତ୍ସାହିତ କରୁଛନ୍ତି। ମାସିକିଆ ବଟି ଦେଇ ଖଣି ମାଫିଆ ନିର୍ଭୟରେ ଖଣି ଲୁଟ୍ କରୁଥିବା ବିଶେଷ ସୂତ୍ରରୁ ଜଣାପଡିଛି।
ପ୍ରକାଶ ଯେ, ଶ୍ରୀମନ୍ଦିର ପ୍ରଶାସନର ଜମି, ସରକାରୀ ଏବଂ ଗୋଚର ଜମି ଉପରେ ଖଣି ମାଫିଆଙ୍କ ନଜର ରହିଛି। ପାଓ୍ବାର ଟ୍ରିଲର, ମେଶିନ ସାହାର୍ଯ୍ୟରେ ଏକର ଏକର ଜମିରୁ ମାଙ୍କଡ଼ା ପଥର କାଟି ନେବା ସହ ମୋରମ ଚାଲାଣ କରୁଛନ୍ତି। ଏପରିକି କାଜୁ ଜଙ୍ଗଲରୁ ମୋରମ, ମାଙ୍କଡା ଚାଲଣ କରୁଛନ୍ତି। ତାପଙ୍ଗ ମୁଣ୍ଡିଆ, ଟାଙ୍ଗୀ ଆରିଆପଡ଼ା ବୃଷବନ୍ଧ ପାହାଡ଼, ୧୬ନଂ. ଜାତୀୟ ରାଜପଥ ଉଭୟ ପାର୍ଶ୍ୱରେ ରହିଥିବା ପାହାଡ଼କୁ ନଣ୍ଡା କରିସାରିଲେଣି। ଏପରିକି ରାଜପଥ ସମ୍ପ୍ରସାରଣ ଆଳରେ ଠିକାଦାରମାନେ ପଥର ଏବଂ ମୋରମ ଚାଲାଣ କରୁଛନ୍ତି। ଜାତୀୟ ରାଜପଥ ଗଳାବାଟ ସାଜିଥିବା ବେଳେ ରାତିସାରା ହାଇଓ୍ବା, ଟ୍ରକରେ ଚାଲାଣ କରାଯାଉଛି। ଖୋର୍ଦ୍ଧାଠାରୁ ଟାଙ୍ଗୀ ପର୍ଯ୍ୟନ୍ତ ରାସ୍ତାର ଉଭୟ ପାର୍ଶ୍ୱ ପାହାଡ଼ କଟାଯିବାରୁ ରାସ୍ତା ଖାଲଖମା ହୋଇ ବର୍ଷା ହେଲେ କୁତ୍ରିମ ହ୍ରଦର ଭ୍ରମ ସୃଷ୍ଟି କରୁଛି। ବିଭିନ୍ନ ସମୟରେ ପ୍ରଶାସନ ପକ୍ଷରୁ ଚଢ଼ାଉ କରାଯାଇ ମେଶିନ, ଯନ୍ତ୍ରପାତି ଏବଂ ବିଭିନ୍ନ ପଥର ବୋଝେଇ ଟ୍ରକ ଜବତ କରାଯିବା ସହ ଜରିମାନା ଆଦାୟ କରାଯାଉଛି। ହେଲେ ଚଢ଼ାଉ ପୂର୍ବରୁ ସୂଚନା ପାଇ ଖଣି ମାଫିଆମାନେ ଘଟଣାସ୍ଥଳରୁ ଫେରାର ହୋଇଯାଉଛନ୍ତି। ଫଳରେ ପ୍ରଶାସନ ଖାଲି ହାତରେ ଫେରୁଛି। ତେବେ ଚଢ଼ାଉ ପୂର୍ବରୁ କିପରି ମାଫିଆମାନେ ସୂଚନା ପାଉଛନ୍ତି ତାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ବିଭିନ୍ନ ସ୍ଥାନରୁ ଏକାଧିକ ଗ୍ରାମବାସୀ ଜିଲା ପ୍ରଶାସନର କାର୍ଯ୍ୟାଳୟକୁ ଦୌଡୁଛନ୍ତି। ବେଆଇନ ପଥର ଖନନ, ବ୍ଲାଷ୍ଟିଂ, ପଥର ଚାଲାଣ ରୋକିବା ସହ ଗୋଚର, ଶ୍ରୀମନ୍ଦିର ପ୍ରଶାସନ ଜମିକୁ ସୁରକ୍ଷା ଦିଆଯାଉ ବୋଲି ଦାବି କରୁଛନ୍ତି। ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରଶାସନ ପକ୍ଷରୁ ପ୍ରତିଶ୍ରୁତି ଦିଆଯାଉଛି। କିନ୍ତୁ ଏଥିରେ କୌଣସି ଫରକ ପଡୁନାହିଁ। ରାଜନେତା ଏବଂ ପ୍ରଶାସନର କେତେଜଣ ଅସାଧୁ କର୍ମଚାରୀଙ୍କ ଛତ୍ରଛାୟା ତଳେ ଖଣି ମାଫିଆଙ୍କ ରାଜୁତି ଚାଲିଛି ବୋଲି ଚର୍ଚ୍ଚା ହେଉଛି। ଖୋର୍ଦ୍ଧା ଅଞ୍ଚଳରେ ଥିବା ପଥର ଖଣି, ମାଙ୍କଡା ଚାଲାଣ ବାବଦକୁ ଦୈନିକ କୋଟିଏ ଟଙ୍କାରୁ ଊର୍ଦ୍ଧ୍ୱ ଚାଲାଣ ହେଉଛି। ଖଣି ମାଫିଆଙ୍କ ଉପରେ ରୋକ ଲଗା ନ ଗଲେ ଆଗାମୀ ଦିନରେ ଲଘୁ ଖଣିଜ ସମ୍ପଦ ଲୋପ ପାଇଯିବ ବୋଲି ପରିବେଶବିତ୍ମାନେ ମତପ୍ରକାଶ କରିଛନ୍ତି। ଅନ୍ୟପଟେ ଏ ସମ୍ପର୍କରେ ଜିଲାପାଳ କେ.ସୁଦର୍ଶନ ଚକ୍ରବର୍ତ୍ତୀ କହିଛନ୍ତି, ଲଘୁ ଖଣିଜ ଚୋରା ଚାଲାଣ ରୋକିବା ପାଇଁ ଗୁରୁତ୍ୱ ଦିଆଯାଇଛି। ବେଆଇନଭାବେ ଚାଲିଥିବା ପଥର ଖଣି ଏବଂ କ୍ରସର ୟୁନିଟ ଉପରେ ଚଢ଼ାଉ କରାଯାଉଛି। ଚୋରାଚାଲାଣରେ ବ୍ୟବହାର ଯାନବାହନ ଧରାପଡିଲେ ଜରିମାନା ସହ ଏହାର ଲାଇସେନ୍ସ ମଧ୍ୟ ରଦ୍ଦ କରାଯିବ। ଚୋରାଚାଲାଣକୁ ପ୍ରଶ୍ରୟ ଦିଆଯିବ ନାହିଁ। ଜିଲା ପ୍ରଶାସନ ପକ୍ଷରୁ ସ୍ବତନ୍ତ୍ର ଡ୍ରାଇଭ ଆରମ୍ଭ କରାଯାଇ ଲକ୍ଷାଧିକ ଟଙ୍କା ଜରିମାନା ଆଦାୟ ସହ ଥାନାରେ ଏକାଧିକ ମାମଲା ରୁଜୁ ହୋଇଛ ବୋଲି ଚକ୍ରବର୍ତ୍ତୀ ପ୍ରକାଶ କରିଛନ୍ତି।
