ଭୁବନେଶ୍ୱର,୨୨।୮(ବ୍ୟୁରୋ): ରାଜ୍ୟରେ ଏବେ ବଡ଼ ବଡ଼ ସାଇବର ଠକେଇ ଘଟଣା ଘଟୁଛି। ସାଇବର ଠକମାନେ ବାହାର ରାଜ୍ୟ ଓ ଦେଶରେ ରହି ଅଭିନବ ଉପାୟରେ ଓଡ଼ିଶାର ଲୋକଙ୍କୁ ଟାର୍ଗେଟ କରୁଛନ୍ତି। ପୂର୍ବରୁ ବିଭିନ୍ନ ଥାନାରେ ଏକାଧିକ ମାମଲା ରୁଜୁ ହୋଇଥିବାବେଳେ ଏବେ ଆଉଏକ ବଡ଼ ଧରଣର ଠକେଇ ହୋଇଛି। ଜଣେ ବିଦେଶିନୀ ୧୫ କୋଟିର ଲୋଭ ଦେଖାଇ ୪୫ ଲକ୍ଷ ଲୁଟି ନେଇଛନ୍ତି। ଠକେଇର ଶିକାର ହୋଇଛନ୍ତି କଟକ ପୁରୀଘାଟରେ ରହୁଥିବା ମାନସ ରଞ୍ଜନ ମିଶ୍ରା। ଏନେଇ ସେ କଟକ ସାଇବର ଥାନାରେ ଅଭିଯୋଗ କରିଛନ୍ତି। ଏହି ଠକେଇରେ ଲଣ୍ଡନ ଲିଙ୍କ୍ ରହିଥିବା ଜଣାପଡିବା ପରେ କ୍ରାଇମବ୍ରାଞ୍ଚ ସାଇବର ସେଲ୍ ପକ୍ଷରୁ ତଦନ୍ତ ଆରମ୍ଭ ହୋଇଛି। ଏଥିସହ ଉଭୟଙ୍କ ମଧ୍ୟରେ ଚୁକ୍ତି ହୋଇଥିବା ଭୁବନେଶ୍ୱରର ଏକ ହୋଟେଲରେ ଛାନ୍ଭିନ୍ କରିଛି କ୍ରାଇମବ୍ରାଞ୍ଚ।
ଅଭିଯୋଗ ଅନୁଯାୟୀ, ୨୦୧୭ ଜାନୁୟାରୀରେ ମାନସଙ୍କ ମେଲ୍କୁ ଲଣ୍ଡନରେ ରହୁଥିବା ଜଣେ ବିଦେଶିନୀ ଏଜିଲାବେଥ୍ ନାଁରେ ଏକ ମେଲ୍ କରିଥିଲେ। ସେଥିରେ ସେ ଓଡ଼ିଶାରେ ପାର୍ଟନରଶିପ୍ରେ ଏକ କମ୍ପାନୀ ଖୋଲିବାକୁ ଚାହୁଁଥିବା ଜଣାଇଥିଲେ। ହେଲେ ମାନସ ପାର୍ଟନରଶିପ୍ ପ୍ରସ୍ତାବକୁ ଖାରଜ କରିଦେଇଥିଲେ। ଏହାପରେ ବିଦେଶିନୀ ଜଣକ ଆଉଏକ ମେଲ୍ କରି କମ୍ପାନୀ ଖୋଲିବା ନେଇ ତାଙ୍କର ସହାୟତା ଲୋଡ଼ିଥିଲେ ଓ ତାଙ୍କୁ ମ୍ୟାନେଜର ଭାବେ ନିଯୁକ୍ତି ଦେବାକୁ କହିଥିଲେ। ଏଥିସହ କମ୍ପାନୀର ସମସ୍ତ ଏଗ୍ରିମେଣ୍ଟ କାଗଜ ତାଙ୍କୁ ମେଲ୍ରେ ପଠାଇଥିଲେ। ଏହି ପ୍ରସ୍ତାବକୁ ପଢି ମାନସ ତାଙ୍କ ଜାଲରେ ଫସି ଯାଇଥିଲେ। ଖୁବ୍ଶୀଘ୍ର ଭାରତ ଆସିବେ
ବୋଲି ଏଲିଜାବେଥ୍ କହିଥିଲେ। ତେବେ ଏହାର କିଛିଦିନ ପରେ ସେ ଭାରତରେ ପହଞ୍ଚତ୍ଥିବା ଜଣାଇଥିଲେ। ତେବେ ଦିଲ୍ଲୀ ବିମାନ ବନ୍ଦରରେ ତାଙ୍କୁ କଷ୍ଟମବିଭାଗ ଅଫିସରମାନେ ଅଟକାଇ ରଖିଥିବାର ମିଛ କାହାଣୀ ରଚିଥିଲେ। ତାଙ୍କ ନିକଟରେ ଗ୍ରେଟ୍ ବ୍ରିଟେନ୍ ପାଉଣ୍ଡ୍ ରହିଥିବାରୁ ସେ ମୁମ୍ବାଇ ଆସି ଜରିମାନା ବାବଦକୁ କିଛି ଗ୍ରେଟ୍ ବ୍ରିଟେନ୍ ପାଉଣ୍ଡ୍ କଷ୍ଟମ୍ସ ବିଭାଗରେ ଜମା କରିଛନ୍ତି। ପାଖରେ ଥିବା ବାକି ୧.୫ ମିଲିୟନ୍ ଗ୍ରେଟ ବ୍ରିଟେନ୍ ପାଉଣ୍ଡ(ପାଖାପାଖି ୧୫ କୋଟି)କୁ ସ୍ଥାନୀୟ ସିଆଇଟିଆଇ ବ୍ୟାଙ୍କ୍ରେ ଏଫ୍ଡି ଆକାରରେ ଜମା କରି ମାନସଙ୍କୁ ନୋମିନି ରଖିଥିବା ଜଣାଇଥିଲେ। ଏହାପରେ ବିଦେଶିନୀ ଜଣକ ସେଠାରୁ ଭୁବନେଶ୍ୱରରେ ପହଞ୍ଚତ୍ବା ପରେ ଏକ ତାରକା ହୋଟେଲରେ ରହିଥିଲେ। ସେଠାରେ ମାନସଙ୍କ ସହ କମ୍ପାନୀ ପାଇଁ ଡିଲ୍ କରି ସମସ୍ତ କାଗଜପତ୍ରର ଦସ୍ତଖତ ନେଇ ସେ ଲଣ୍ଡନ ପଳାଇଥିଲେ। ଏହାର କିଛି ମାସ ପରେ ମାନସଙ୍କ ନିକଟକୁ ଏକ ଫୋନ୍ କଲ୍ ଆସିଥିଲା। କଲ୍ କରିଥିବା ବ୍ୟକ୍ତିଜଣକ ମୁମ୍ବାଇ ସିଆଟିଆଇ ବ୍ୟାଙ୍କ୍ର କର୍ମଚାରୀ ପରିଚୟ ଦେଇ ଏଲିଜାବେଥ୍ଙ୍କ ମୃତ୍ୟୁ ଘଟିଥିବା ସୂଚନା ଦେଇଥିଲେ। ତେବେ ସେ ଜମା ରଖିଥିବା ୧୫ କୋଟି ଟଙ୍କାରେ ମାନସ ନୋମିନି ଥିବା ଜଣାଇଥିଲେ। ଉକ୍ତ ଟଙ୍କା ପାଇବା ପାଇଁ ୪୨.୩୨ ଲକ୍ଷ ଡିପୋଜିଟ୍ କରିବାକୁ ହେବ ଓ ଏଥିପାଇଁ ସେ କେତେକ ପରାମର୍ଶ ଦେଇଥିଲେ। ତାଙ୍କ କଥାରେ ବିଶ୍ୱାସ କରି ମାନସ ସେ ଦେଇଥିବା ବିଭିନ୍ନ ଆକାଉଣ୍ଟରେ ୪୨.୩୨ଲକ୍ଷ ଟଙ୍କା ଜମା କରିଥିଲେ। ଏହାପରେ ମାନସ ଉକ୍ତ ନମ୍ବରକୁ କଲ୍ କରିଥିଲେ ମଧ୍ୟ ତାହା ବନ୍ଦ ରହିଥିଲା। ଏଥିସହ ଏଲିଜାବେଥ୍ଙ୍କ ସହ କଥା ହୋଇଥିବା ସମସ୍ତ ନମ୍ବରକୁ ଯୋଗାଯୋଗ କରିଥିଲେ ମଧ୍ୟ କିଛି ସୁଫଳ ମିଳି ନ ଥିଲା। ବିଦେଶିନୀ ଜଣକ ଦେଇଥିବା କମ୍ପାନୀ କାଗଜପତ୍ର ଯାଞ୍ଚ କରିବାରୁ ତାହା ଜାଲ ଥିବା ମାନସ ଜାଣିବାକୁ ପାଇ ସାଇବର ଥାନାର ଦ୍ୱାରସ୍ଥ ହୋଇଥିଲେ।
