ନୂଆଦିଲ୍ଲୀ,୨୧ା୪: କୋଭିଡ୍-୧୯ ବିରୋଧରେ ଦେଶ ଏକ ବଡ଼ ଯୁଦ୍ଧକୁ ସାମ୍ନା କରୁଛି। ନିକଟରେ ନିଆଯାଇଥିବା ପଦକ୍ଷେପଗୁଡ଼ିକ ଯୋଗୁ ସ୍ଥିତିରେ ସୁଧାର ଆସିବ। ଲକ୍ଡାଉନ୍ ଜାରି କରିବା ଶେଷ ବିକଳ୍ପ ହେବା ଉଚିତ ବୋଲି ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସ୍ପଷ୍ଟ କରିଛନ୍ତି। ରାତି ୮ଟା ୪୫ରେ ଜାତି ଉଦ୍ଦେଶ୍ୟରେ ସମ୍ବୋଧିତ କରି ଏକ ଟେଲିଭିଜନ୍ ବାର୍ତ୍ତାରେ ପ୍ରଧାନମନ୍ତ୍ରୀ କହିଛନ୍ତି, ଆମକୁ ସବୁ ବଳ ଖଟାଇ ଭାଇରସ୍ ବିରୋଧରେ ଲଢ଼େଇ କରିବାକୁ ପଡ଼ିବ। ସମ୍ପ୍ରତି ଅକ୍ସିଜେନ ସଙ୍କଟ ଦେଖାଦେଇଛି। ଏହି ଚ୍ୟାଲେଞ୍ଜର ମୁକାବିଲା ପାଇଁ ସମସ୍ତ ପକ୍ଷଙ୍କ ସହ ଆଲୋଚନା ଚାଲିଛି। ଗତବର୍ଷଠାରୁ ଏବର୍ଷର ସ୍ଥିତି ଭିନ୍ନ। ଏବେ ଆମ ପାଖରେ ଭାକ୍ସିନ, ପିପିଇ କିଟ୍ ଓ ଅନ୍ୟ ଜରୁରୀ ଉପକରଣ ଅଛି। ତେଣୁ ଲକ୍ଡାଉନ୍ ଶେଷ ବିକଳ୍ପ ହେବା ଉଚିତ। ମାଇକ୍ରୋ କଣ୍ଟେନ୍ମେଣ୍ଟ ଜୋନ୍ ଉପରେ ଫୋକସ୍ ରହିବା ଉଚିତ। ରାଜ୍ୟଗୁଡ଼ିକ କୋଭିଡ୍-୧୯ ପ୍ରୋଟୋକଲକୁ କଡ଼ାକଡ଼ି କଲେ ଓ ତାକୁ ସମସ୍ତେ ମାନିଲେ ଲକ୍ଡାଉନ୍ ଜାରି କରିବାକୁ ପଡ଼ିବ ନାହିଁ। ଲୋକେ ଅନାବଶ୍ୟକ ଭାବେ ବାହାରକୁ ବାହାରନ୍ତୁ ନାହିଁ। ସମସ୍ତେ ଭାକ୍ସିନ ନିଅନ୍ତୁ ବୋଲି ମୋଦି ପରାମର୍ଶ ଦେଇଛନ୍ତି। ଏହି ଅବସରରେ ମହାମାରୀ ବିରୋଧରେ ଅଦମ୍ୟ ଉଦ୍ୟମ କରୁଥିବା ଡାକ୍ତର ଓ ସ୍ବାସ୍ଥ୍ୟସେବା କର୍ମୀମାନଙ୍କୁ ପ୍ରଧାନମନ୍ତ୍ରୀ ଧନ୍ୟବାଦ ଜଣାଇଛନ୍ତି। ପ୍ରଧାନମନ୍ତ୍ରୀଙ୍କ ସମ୍ବୋଧନ ପରେ ବିରୋଧୀ ଦଳଗୁଡ଼ିକ ତାଙ୍କୁ ଟାର୍ଗେଟ କରିଛନ୍ତି। କଂଗ୍ରେସ ଏହାକୁ ଏକ ଫମ୍ପା ଭାଷଣ ବୋଲି ଅଭିହିତ କରିଛି। ଦଳର ମୁଖପାତ୍ର ଅଜୟ ମାକେନ କହିଛନ୍ତି, ହସ୍ପିଟାଲରେ ଶଯ୍ୟା, ଅକ୍ସିଜେନ ମିଳୁ ନ ଥିବାରୁ ଏସବୁ ଉପଲବ୍ଧ କରାଇବା ପାଇଁ ସରକାର କି ପଦକ୍ଷେପ ନେଇଛନ୍ତି ମୋଦି ତାହା ଜଣାଇବା କଥା। ହେଲେ ମହାମାରୀରେ ଲୋକେ ମରୁଥିବାବେଳେ ସେ ଦେଶ ସୁରକ୍ଷା ଦାୟିତ୍ୱରୁ ଓହରିଯାଇ ଏନ୍ଜିଓ, ଶିଶୁ ଓ ଯୁବପିଢ଼ି ଉପରେ ବୋଝ ଲଦି ଦେଇଛନ୍ତି। ସେହିପରି ଭାରତର କମ୍ୟୁନିଷ୍ଟ ପାର୍ଟି-ମାର୍କ୍ସବାଦୀ ସାଧାରଣ ସମ୍ପାଦକ ସୀତାରାମ ୟେଚୁରୀଙ୍କ ମତରେ ଗତବର୍ଷର ଲକ୍ଡାଉନ୍ ଦେଶ ପାଇଁ ବିପର୍ଯ୍ୟୟ ଥିଲା ବୋଲି ପ୍ରଧାନମନ୍ତ୍ରୀଙ୍କ ଭାଷଣ ଏକ ସ୍ବୀକାରୋକ୍ତି। ସେ ରାଜ୍ୟଗୁଡ଼ିକ ଉପରେ ବୋଝ ଲଦିଦେଇଛନ୍ତି। କେନ୍ଦ୍ର ସରକାର କ’ଣ କରୁଛନ୍ତି ସେନେଇ ମୋଦି ପଦୁଟିଏ କହିଲେ ନାହିଁ। ସେହିପରି ତୃଣମୂଳ କଂଗ୍ରେସ ମୁଖପାତ୍ର ଡେରେକ୍ ଓ’ବ୍ରିଏନ୍ ପ୍ରଧାନମନ୍ତ୍ରୀଙ୍କ ଉଦ୍ଦେଶ୍ୟରେ ଟୁଇଟ୍ କରିଛନ୍ତି, ଆପଣ କ୍ଷମତାକୁ ଲୋଭ କଲେ। ତା’ପରେ ଖାଲି କଥା କହି ଲୋକଙ୍କୁ ବୋକା ବନାଇଲେ। ବହୁତ ହୋଇଗଲା, ଭାକ୍ସିନ କାହିଁ ବୋଲି ସେ ପ୍ରଶ୍ନ କରିଛନ୍ତି। ସର୍ବାଧିକ କରୋନା ପ୍ରଭାବିତ ରାଜ୍ୟ ମହାରାଷ୍ଟ୍ରର ମହାବିକାଶ ଅଘାଡ଼ି ସରକାର ମଧ୍ୟ ପ୍ରଧାନମନ୍ତ୍ରୀଙ୍କୁ ସମାଲୋଚନା କରିଛନ୍ତି। ଶିବସେନାର ରାଜ୍ୟ ସଭା ସଦସ୍ୟା ପ୍ରିୟଙ୍କା ଚତୁର୍ବେଦୀ କହିଛନ୍ତି, ମୋଦି ଶୃଙ୍ଖଳା ଓ ସାହସ ଦେଖାଇବାକୁ ଲୋକଙ୍କୁ ଅନୁରୋଧ କରିଛନ୍ତି। ୫ ରାଜ୍ୟର ବିଧାନସଭା ନିର୍ବାଚନ ବେଳେ ଏହା କାହିଁକି ପ୍ରଯୁଜ୍ୟ ହେଲା ନାହିଁ। ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେଙ୍କ କ୍ୟାବିନେଟ ସହଯୋଗୀ ତଥା ଜାତୀୟତାବାଦୀ କଂଗ୍ରେସ ପାର୍ଟି ମୁଖପାତ୍ର ନଓ୍ବାବ୍ ମଲିକ୍ କହିଛନ୍ତି, ମୋଦି ପ୍ରବାସୀ ଶ୍ରମିକ ଓ ଅନ୍ୟ ଦୁର୍ବଳ ବର୍ଗଙ୍କ ପାଇଁ ରିଲିଫ୍ ପ୍ୟାକେଜ ଘୋଷଣା କରିବେ ବୋଲି ଲୋକେ ଆଶା କରିଥିଲେ। ହେଲେ ସେ ସମସ୍ତଙ୍କୁ ନିରାଶ କରିଛନ୍ତି।
