ଭୁବନେଶ୍ବର, ୩୧।୮(ବ୍ୟୁରୋ)ଆଜି ହେଉଛି ସ୍ବାୟତ୍ତ ଶାସନ ଦିବସ। ଏହି ଦିନରେ ରାଜଧାନୀ ଭୁବନେଶ୍ୱରରେ ପ୍ରତିବର୍ଷ ରାଜ୍ୟସ୍ତରୀୟ କାର୍ଯ୍ୟକ୍ରମ ସହ ୩ଦିନ ଧରି ବିଭିନ୍ନ ପ୍ରକଳ୍ପର ଶିଳାନ୍ୟାସ, ଉଦ୍ଘାଟନ, ସଭା ଓ ବୈଠକ ଚାଲିଥାଏ। କିନ୍ତୁ ଏବର୍ଷ ସେପରି କିଛି ସ୍ବତନ୍ତ୍ର କାର୍ଯ୍ୟକ୍ରମ ହେବନାହିଁ। କରୋନା ସ୍ଥିତିକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀଙ୍କ ଦ୍ୱାରା କେବଳ ପତାକା ଉତ୍ତୋଳନ କରାଯିବା ସହ ବିଏମ୍ସି ଅଞ୍ଚଳରେ ଦୁଇଟି ପ୍ରକଳ୍ପର ଉଦ୍ଘାଟନ କରାଯିବ। ମାତ୍ର କିଛି ମିନିଟ୍ ଭିତରେ କାର୍ଯ୍ୟକ୍ରମ ସାରିବାକୁ ଯୋଜନା ରଖାଯାଇଛି ବୋଲି ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ ସୂଚନା ଦେଇଛନ୍ତି।
ସେ କହିଛନ୍ତି, ସ୍ବାୟତ୍ତଶାସନ ଦିବସ ଅବସରରେ ମୁଖ୍ୟମନ୍ତ୍ରୀଙ୍କ ଦ୍ବାରା ଭର୍ଚୁଆଲ ମାଧ୍ୟମରେ ବିଭିନ୍ନ ପୌରାଞ୍ଚଳରେ ହୋଇଥିବା ପରିମଳ ପ୍ରକଳ୍ପ, କମ୍ପୋଷ୍ଟ ପ୍ଲାଣ୍ଟ ଆଦିକୁ ଉଦ୍ଘାଟନ କରାଯିବାର କାର୍ଯ୍ୟକ୍ରମ ରହିଛି। ଏନେଇ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ସମସ୍ତ ପ୍ରକଳ୍ପର ତାଲିକା ପଠାଯାଇଥିବାବେଳେ ନଗର ଉନ୍ନୟନ ବିଭାଗ ସମସ୍ତ ପ୍ରସ୍ତୁତି ସାରିଛି। ତେବେ ଉଦ୍ଘାଟିତ ହେବାକୁ ଥିବା ପ୍ରକଳ୍ପ ମଧ୍ୟରେ ଭୁବନେଶ୍ୱରର ଦୁଇଟି ରହିଛି। ଗୋଟିଏ ଏମ୍ସିସି ଓ ଅନ୍ୟଟି ଏମ୍ଆର୍ଏଫ୍ କେନ୍ଦ୍ରକୁ ମୁଖ୍ୟମନ୍ତ୍ରୀ ଉଦ୍ଘାଟନ କରିବେ। ଏବେ ସାମାଜିକ କାର୍ଯ୍ୟକ୍ରମ ଉପରେ ରୋକ୍ ଲାଗିଥିବାରୁ ଓ ସାମାଜିକ ଦୂରତା ରଖିବା ନିତାନ୍ତ ଆବଶ୍ୟକ ଥିବାରୁ ସମସ୍ତ କାର୍ଯ୍ୟକ୍ରମ ଭର୍ଚୁଆଲ ଉପାୟରେ କିମ୍ବା କମ୍ ଲୋକଙ୍କୁ ନେଇ କରାଯିବ ବୋଲି ସେ କହିଛନ୍ତି।
ବିଏମ୍ସି ସିଟି ଇଞ୍ଜିନିୟର ଦେବସୁନ୍ଦର ମହାପାତ୍ର କହିଛନ୍ତି, ରାଜଧାନୀରେ ମୋଟ ୪୩ କମ୍ପୋଷ୍ଟ ପ୍ଲାଣ୍ଟ ନିର୍ମାଣ ହେବ। ଏବେ ସୁଦ୍ଧା ପାଖାପାଖି ୧୦ରୁ ୧୨ଟିର ନିର୍ମାଣ କାର୍ଯ୍ୟ ସରିଛି। ହେଲେ ଅନ୍ୟ ଆନୁଷଙ୍ଗିକ କାର୍ଯ୍ୟ ଏବେ ମଧ୍ୟ ବାକି ଅଛି। ତେଣୁ ବର୍ତ୍ତମାନ ଏଗୁଡିକର ଉଦ୍ଘାଟନ କରାଯିବ ନାହିଁ। ଏହି ପ୍ରକଳ୍ପ ସମ୍ପୂର୍ଣ୍ଣ କାର୍ଯ୍ୟକ୍ଷମ ହେଲେ ସ୍ବଚ୍ଛ ଭାରତ ଅଭିନଯାନରେ ବିଏମ୍ସିକୁ ଆସନ୍ତାବର୍ଷ ଭଲ ର଼୍ୟାଙ୍କ୍ ମିଳିବ ବୋଲି ସେ କହିଛନ୍ତି।
ଅପରପକ୍ଷେ କରୋନା ଯୋଗୁ ରାଜ୍ୟ ସରକାର ବି ନୂଆ ପ୍ରକଳ୍ପ ଆରମ୍ଭ ଉପରେ ରୋକ ଲଗାଇଛନ୍ତି। ପୁଣି ପ୍ରଳକ୍ପ ପାଇଁ ଅନୁଦାନର ମଧ୍ୟ ଆବଶ୍ୟକତା ରହିଛି। କରୋନା ପାଇଁ ବିଏମ୍ସିର ରାଜସ୍ବ ଆଦାୟ ପ୍ରଭାବିତ ହୋଇଥିବାବେଳେ ଏପଟେ ନିଜ ସଞ୍ଚତ୍ତ ପୁଞ୍ଜିରୁ ବିଏମ୍ସି ଅଧିକ ଖର୍ଚ୍ଚ କରିବାକୁ ଉଚିତ ମଣୁନି। ତେଣୁ ଆଗକୁ ନୂଆ କିଛି ପ୍ରକଳ୍ପ ହେବାର ଆଶଙ୍କା ମଧ୍ୟ ନାହିଁ। ଚଳିତ ବଜେଟରେ ଯେଉଁ ପ୍ରକଳ୍ପ ପାଇଁ ଅର୍ଥ ବରାଦ ହୋଇଥିଲା ସେସମସ୍ତ ପ୍ରକଳ୍ପ ପାଇଁ ଆବଶ୍ୟକ ଅନୁଦାନ ମିଳିପାରୁନି। କେବଳ ଜରୁରିକାଳୀନ ପ୍ରକଳ୍ପ ଯଥା ରାସ୍ତା, ଡ୍ରେନ ମରାମତି, ବକେୟା ବିଲ୍ରେ ଅର୍ଥ ଖର୍ଚ୍ଚ କରିବାକୁ ଯୋଜନା ରଖାଯାଇଥିବା ବିଶେଷସୂତ୍ରରୁ ଜଣାପଡିଛି।
