ବ୍ରହ୍ମପୁର,୧୫।୧୦(ସ୍ମୃତି ରଞ୍ଜନ ମହାଲିକ): (୦୩) ଗଞ୍ଜାମ ଜିଲାର ବିଭିନ୍ନ ବିଦ୍ୟାଳୟରେ ଶିକ୍ଷକ ପଦବୀ ଖାଲିପଡି ଥିବାରୁ ପାଠ ପଢ଼ା ବ୍ୟାହତ ହୋଇଥିଲା। ଏନେଇ ଅଭିଭାବକ ଛାତ୍ରୀଛାତ୍ରଙ୍କ ଭବିଷ୍ୟତକୁ ନେଇ ଚିନ୍ତା ପ୍ରକଟ କରିଥିଲେ। ଫଳରେ ଶିକ୍ଷକ ପଦବୀ ପୂରଣ ପାଇଁ ଶିକ୍ଷକ ସଂଘଠାରୁ ଆରମ୍ଭ କରି ଅଭିଭାବକମାନେ ଦାବି କରିଆସୁଥିଲେ। ବିଳମ୍ବରେ ହେଲେ ମଧ୍ୟ ରାଜ୍ୟ ସରକାର ଶିକ୍ଷକ ଅଭାବ ପୂରଣ ନେଇ ପଦକ୍ଷେପ ଗ୍ରହଣ କରିଛନ୍ତି। ରାଜ୍ୟ ସରକାର ଟିଚର ଅନ୍ କଲ୍ ଯୋଜନା ମାଧ୍ୟମରେ ଅନୁଦାନ ପ୍ରାପ୍ତ, ନୂତନ ଗ୍ରାଣ୍ଟ ଇନ୍ ଏଡ୍ ଓ ସରକାରୀ ହାଇସ୍କୁଲଗୁଡିକରେ ଅବସର ପ୍ରାପ୍ତ ଶିକ୍ଷକଙ୍କୁ ଅତିଥି ଶିକ୍ଷକ ଭାବେ ନିଯୁକ୍ତି ଦେଇଛନ୍ତି। ଯାହାକି ଶିକ୍ଷକ ଅଭାବ ପଦବୀ ପୂରଣ ସାଙ୍ଗକୁ ପାଠ ପଢାରେ ବ୍ୟାହତ ହେବ ନାହିଁ। ଏଥିସହ ଛାତ୍ରୀଛାତ୍ରଙ୍କ ଗୁଣାତ୍ମକ ଶିକ୍ଷାର ବିକାଶ ଦିଗରେ ସହାୟକ ହେବ ବୋଲି ଆଶା କରାଯାଉଛି।
ଜିଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ସୂତ୍ରରୁ ମିଳିଥିବା ତଥ୍ୟ ମୁତାବକ, ଗଞ୍ଜାମ ଜିଲାରେ ୧୩୧ ହାଇସ୍କୁଲରେ ବିଭିନ୍ନ ବିଷୟରେ ୧୭୦ ଅବସର ପ୍ରାପ୍ତ ଶିକ୍ଷକଙ୍କୁ ନିଯୁକ୍ତି ଦିଆଯାଇଛି। ଏଥିମଧ୍ୟରୁ ୫୪ ସରକାରୀ ହାଇସ୍କୁଲ, ୩୨ ଅନୁଦାନ ପ୍ରାପ୍ତ ହାଇସ୍କୁଲ ଏବଂ ୪୫ ନୂତନ ଗ୍ରାଣ୍ଟ ଇନ୍ ଏଡ୍ ହାଇସ୍କୁଲରେ ନିଯୁକ୍ତି ଦିଆଯାଇଛି। ସେହିପରି ଟିଜିଟି ଆର୍ଟସ ବିଷୟରେ ୯୫ଜଣ, ପିସିଏମ୍ ବିଷୟରେ ୨୬ଜଣ , ହିନ୍ଦୀରେ ୨୪ଜଣ, ସିବିଜେଡ୍ରେ ୯ଜଣ ଏବଂ କ୍ଲାସିକାଲ ବିଷୟରେ ୧୬ଜଣ ଅବସରପ୍ରାପ୍ତ ଶିକ୍ଷକଙ୍କୁ ଅତିଥି ଶିକ୍ଷକ ଭାବେ ନିଯୁକ୍ତି ଦିଆଯାଇଛି।
ଅବସରପ୍ରାପ୍ତ ଶିକ୍ଷକମାନେ ମାସକୁ ୧୨ ହଜାର ଟଙ୍କା ଦରମାରେ ପାଠ ପଢାଇବେ। ଅତିଥି ଶିକ୍ଷକଙ୍କ ମାସିକ ୨୦ ଦିନ କାର୍ଯ୍ୟ କରିବେ। ସେମାନେ କେତୋଟି ପିରିୟଡ ପାଠ ପଢାଇବେ ତାହା ସ୍କୁଲର ପ୍ରଧାନ ଶିକ୍ଷୟିତ୍ରୀ କିମ୍ବା ପ୍ରଧାନ ଶିକ୍ଷକ ସ୍ଥିର କରିବେ ବୋଲି ଗଞ୍ଜାମ ଜିଲା ଶିକ୍ଷା ଅଧିକାରୀ ଅମିତା ପଟ୍ଟନାୟକ କହିଛନ୍ତି।
ଗତ ସେପ୍ଟମ୍ବର ୩୦ ତାରିଖ ସୁଦ୍ଧା ଅବସର ପ୍ରାପ୍ତ ଶିକ୍ଷକମାନଙ୍କୁ ନିଯୁକ୍ତି ହେବା ନିମନ୍ତେ ନିର୍ଦ୍ଦେଶ ରହିଥିଲା। ଗତ ୧୩ ତାରିଖ ସୁଦ୍ଧା ଜିଲାରେ ୯୬ଜଣ ଅତିଥି ଶିକ୍ଷକ କାର୍ଯ୍ୟରେ ଯୋଗ ଦେଇଥିବା ବେଳେ ପାଠ ପଢା ମଧ୍ୟ ଆରମ୍ଭ ହୋଇଥିବା ଜିଲା ଶିକ୍ଷା ଅଧିକାରୀ ସୂଚନା ଦେଇଛନ୍ତି। ଶିକ୍ଷକ ଅବସର ପରେ ପୁଣି ତାଙ୍କୁ ପୁଣି ନିଯୁକ୍ତି ଦିଆଯିବା ଏକ ଗ୍ରହଣୀୟ ପ୍ରସ୍ତାବ ନୁହେଁ ବୋଲି ଗଞ୍ଜାମ ଜିଲା ଶିକ୍ଷକ ମହାସଂଘ ଉପଦେଷ୍ଟା ରାଜେନ୍ଦ୍ର କୁମାର ପଣ୍ଡା କହିଛନ୍ତି।
ଅବସରପ୍ରାପ୍ତ ଶିକ୍ଷକଙ୍କ ବଦଳରେ ଜିଲାରେ ଥିବା ଓଟିଇଟି, ବିଇଡି ଶେଷ କରିଥିବା ଶିକ୍ଷିତ ଯୁବତୀ ଯୁବକଙ୍କୁ ନିଯୁକ୍ତି ଦିଆଗଲେ ଜିଲାରେ ଶିକ୍ଷାର ବିକାଶ ହେବ। ସରକାର କେବଳ ଆନ୍ଦୋଳନକୁ ରୋକିବା ପାଇଁ ଏଭଳି ପ୍ରୟାସ କରିଛନ୍ତି। ଏହାଦ୍ୱାରା ଶିକ୍ଷାର ବିକାଶରେ ବାଧା ଉପୁଜିବ ବୋଲି ସେ କହିଛନ୍ତି। ଏଣୁ ଅବସର ପ୍ରାପ୍ତ ଶିକ୍ଷକଙ୍କ ବଦଳରେ ଶିକ୍ଷକତା ନିମନ୍ତେ ବିଭିନ୍ନ ପ୍ରବେଶିକା ପରୀକ୍ଷାରେ ଉତ୍ତୀର୍ଣ୍ଣ ଛାତ୍ରୀଛାତ୍ରଙ୍କୁ ସୁଯୋଗ ଦେବା ପାଇଁ ଦାବି ହୋଇଛି।
