ହାଇଦ୍ରାବାଦ, ୨୪।୯: ତେଲଙ୍ଗାନାରେ ଜଣେ ୨୦ ବର୍ଷୀୟା ଇଞ୍ଜିନିୟରିଂ ଛାତ୍ରୀ ଥାନ୍ଦ୍ରା ଅକ୍ଷିତାରାଣୀଙ୍କ ମୃତ୍ୟୁ ଘଟିଛି। ପ୍ରଥମେ ଏହାକୁ ଆମତ୍ହତ୍ୟା ବିବେଚନା କରାଯାଉଥିବାବେଳେ ତଦନ୍ତ ପରେ ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ଜଣାପଡ଼ିଛି। ମୃତ ଛାତ୍ରୀ ଜଣଙ୍କ ଡିପ୍ଲୋମା ପଢ଼ିବା ସମୟରେ ନାସପୁରସ୍ଥିତ ସିଙ୍ଗାରେଣୀ କଲିରିଜ ପଲିଟେକ୍ନିକର ଜଣେ ଆଉଟସୋର୍ସିଂ ଅଧ୍ୟାପକ ନବୀନ କୁମାରଙ୍କ ସଂସ୍ପର୍ଶରେ ଆସିଥିଲେ। ପରେ ଅକ୍ଷିତାରାଣୀ ହାଇଦ୍ରାବାଦରେ ମାଇନିଂ ଇଞ୍ଜିନିୟରିଂ ପଢ଼ିବା ସମୟରେ ସିଙ୍ଗାରେଣୀ ଖଣିରେ ପ୍ରଶିକ୍ଷଣ ବେଳେ ରବି କୁମାର ନାମକ ଜଣେ ଖଣି ପର୍ଯ୍ୟବେକ୍ଷକଙ୍କ ସହ ସମ୍ପର୍କ ରଖିଥିଲେ। ଏହାକୁ ନବୀନ ସହ୍ୟ କରିପାରି ନଥିଲେ।
ସୂଚନା ଅନୁଯାୟୀ ଗତ ୧୨ରେ ନବୀନ କୁମାର ଛାତ୍ରୀଙ୍କୁ ରାସ୍ତାରୁ ଅପହରଣକରି ନିଜ କାର୍ ଭିତରେ ଜବରଦସ୍ତ କୀଟନାଶକ ପିଆଇବା ସହିତ ରବି କୁମାରଙ୍କ ନାଁରେ ଯୌନ ଶୋଷଣର ଏକ ଜାଲ୍ ସୁଇସାଇଡ୍ ନୋଟ୍ ଲେଖାଇଥିଲେ। ଅକ୍ଷିତାରାଣୀଙ୍କୁ ଠିକ୍ ସମୟରେ ଚିକିତ୍ସା ନ କରାଇ ମୃତ୍ୟୁମୁଖକୁ ଠେଲିବା ପରେ ନବୀନ ତାଙ୍କରି ଫୋନ୍ରୁ ପରିବାରକୁ ଫୋନ୍ କରି ଏହାକୁ ଏକ ଆମତ୍ହତ୍ୟା ବୋଲି ବିଶ୍ୱାସ ଜନ୍ମାଇବାକୁ ଚେଷ୍ଟା କରିଥିଲେ। ପରଦିନ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା।
ଫୁଟେଜ, କଲ୍ ଲଗ୍ ଆଦି ଯାଞ୍ଚ କରିବା ପରେ ସତ୍ୟ ସାମ୍ନାକୁ ଆସିଛି। ପୋଲିସ ମୁଖ୍ୟ ଅଭିଯୁକ୍ତ ନବୀନ କୁମାର (୩୮)ଙ୍କ ସହ ରବି କୁମାର(୩୫)ଙ୍କୁ ମଧ୍ୟ ଗିରଫ କରିଛି। ପୋଲିସ ଘଟଣାରେ ବ୍ୟବହୃତ କାର୍ ଓ ମୋବାଇଲ ଜବତ କରିବା ସହିତ ସମ୍ପୂର୍ଣ୍ଣ ଘଟଣାର ଅଧିକ ତଦନ୍ତ ଜାରି ରଖିଛି।
