ଭଦ୍ରକ ଅଫିସ,୧୦।୭: ଭଦ୍ରକ ଜିଲାରେ ବସୁନ୍ଧରା ଯୋଜନାରେ ଗରିବ ଭୂମିହୀନମାନଙ୍କୁ ରାଜସ୍ବ ବିଭାଗ ପକ୍ଷରୁ ଭୂମି ଅଧିକାର ପତ୍ର ବା ଜମି ପଟ୍ଟା ଯୋଗାଇ ଦିଆଯାଇଛି। ହେଲେ ଜାଗା ଚିହ୍ନଟ ଦେଉନି ରାଜସ୍ବ ବିଭାଗ। ପାଇଥିବା ପଟ୍ଟାକୁ ଧରି ଲୋକେ ରାଜସ୍ବ ନିରୀକ୍ଷକ, ତହସିଲ ଓ ଜିଲାପାଳଙ୍କ କାର୍ଯ୍ୟାଳୟକୁ ଦୌଡ଼ି ଦୌଡ଼ି ନୟାନ୍ତ ହେଲେଣି। ଏପରିକି ଏନେଇ ସେମାନେ ବହୁ ସମୟରେ ଧାରଣା ଦେବା ସହ ଆନ୍ଦୋଳନ କରିଛନ୍ତି। କେତେକ ସଙ୍ଗଠନ ମଧ୍ୟ ସେମାନଙ୍କ ପାଇଁ ଆଗକୁ ବାହାରି ବିଭିନ୍ନ ସମୟରେ ଆନ୍ଦୋଳନକୁ ଜୋର୍ଦାର କରିଛନ୍ତି। ତଥାପି କିଛି ସୁଫଳ ମିଳିପାରିନାହିଁ। ପ୍ରଶାସନିକ ଅବହେଳା ଯୋଗୁ ନିଜସ୍ବ ଘରବାଡ଼ି ପଟ୍ଟା ନ ଥିବାରୁ ଭୂମିହୀନମାନେ ସରକାରୀ ସୁବିଧା ତଥା ବାସସ୍ଥାନ, ଜାତିଗତ ଓ ଆୟ ପ୍ରମାଣପତ୍ର ପାଇପାରୁ ନାହାନ୍ତି। ପ୍ରଧାନମନ୍ତ୍ରୀ ଆବାସ ଓ ସ୍ବଚ୍ଛ ଭାରତ ମିଶନ ଯୋଜନାରେ ଶୌଚାଳୟ ପାଇଥିଲେ ବି ନିର୍ମାଣ କରିପାରୁ ନାହାନ୍ତି। ସେମାନଙ୍କ ପିଲାମାନେ ସ୍କୁଲରେ ଷ୍ଟାଇପେଣ୍ଡ ପାଇବାରୁ ବଞ୍ଚିତ ହେଉଛନ୍ତି। ସେହିପରି ମୁଖ୍ୟମନ୍ତ୍ରୀ ରିଲିଫ ଫଣ୍ଡରେ ଚିକିତ୍ସା ସୁବିଧା ପାଇଁ ଏହି ଲୋକେ ଆବେଦନ କରିପାରୁନାହାନ୍ତି।
ଏକ ବେସରକାରୀ ସଙ୍ଗଠନର ସର୍ଭେ ଅନୁସାରେ ଜିଲାରେ ୭ ତହସିଲ ଅଧୀନରେ ୨୧୮ ପଞ୍ଚାୟତ ରହିଛି। ଏଥିରେ ମୋଟ ୧୩୭୦ ରାଜସ୍ବ ଗ୍ରାମରେ ୪,୩୯୫ ଭୂମିହୀନ ପରିବାର ବିଭିନ୍ନ ସରକାରୀ ଅନାବାଦୀ, ଗୋଚର, ନଦୀବନ୍ଧ ଉପରେ ଦୟନୀୟ ଅବସ୍ଥାରେ ବସବାସ କରୁଛନ୍ତି। ଭଦ୍ରକ ତହସିଲରେ ସର୍ବାଧିକ ୨୨ଟି ବସ୍ତିରେ ୧୬୮୦ ଭୂମିହୀନ ପରିବାର ରହୁଥିବା ସରକାରୀ ରିପୋର୍ଟରେ ଦର୍ଶାଯାଇଛି। ଘରଡିହ ପାଇଁ ୪ ହଜାରରୁ ଊର୍ଦ୍ଧ୍ୱ ଆବେଦନପତ୍ର ଜିଲାର ବିଭିନ୍ନ ତହସିଲ କାର୍ଯ୍ୟାଳୟରେ ପଡ଼ି ରହିଛି। ବସୁନ୍ଧରା ଯୋଜନା ନେଇ ରାଜ୍ୟ ସରକାରଙ୍କଠାରୁ ୨୦୧୧ରେ ଚିଠି ପାଇବା ପରେ ତହସିଲଦାରମାନେ କେତେକ ବେସରକାରୀ ସଙ୍ଗଠନ ଓ ରାଜସ୍ବ ନିରୀକ୍ଷକଙ୍କୁ ଡାକି ଆଲୋଚନା କରିଥିଲେ। ସରକାରୀ ୱେବ୍ସାଇଟରୁ ମିଳିଥିବା ତଥ୍ୟ ଅନୁସାରେ ଏହି ଜିଲାରେ ୨୦୦୧ରୁ ୨୦୨୨ ମଧ୍ୟରେ ୫୭୮ ଭୂମିହୀନ ପରିବାରକୁ ପଟ୍ଟା ଯୋଗାଇ ଦିଆଯାଇଛି। ୨୦୧୮ରୁ ୨୦୨୦ ସର୍ଭେରେ ଜିଲାର ୭ ତହସିଲରେ ୧୭୧୦ ଭୂମିହୀନ ଥିବା ସରକାରୀ ରିପୋର୍ଟ ପ୍ରସ୍ତୁତ ହୋଇଥିଲା। ପରେ ସେମାନଙ୍କ ମଧ୍ୟରୁ ୧୦୫୭ଜଣଙ୍କୁ ଅଯୋଗ୍ୟ ଦର୍ଶାଇ କାଟି ଦିଆଯାଇଥିଲା। ଚାଷୀ ମୂଲିଆ ସଂଘ ପକ୍ଷରୁ ଏହାର ତଦନ୍ତ ପାଇଁ ଦାବି କରାଯାଇଥିଲା। କିନ୍ତୁ କାର୍ଯ୍ୟବ୍ୟସ୍ତତା ଆଳରେ ତହସିଲଦାରମାନେ ଏହାକୁ ଆଡ଼େଇ ଦେଇଥିଲେ। ବସୁନ୍ଧରା ଯୋଜନାରେ ୪ ଡିସିମିଲ ଜାଗାର ପଟ୍ଟା ପାଇ ଭୂମିହୀନମାନେ ବର୍ଷ ବର୍ଷ ଧରି ଅପେକ୍ଷାରେ ରହିଛନ୍ତି। ଯେଉଁ ମୌଜାରେ ସେମାନଙ୍କୁ ଜାଗା ଦିଆଯାଇଛି ସେଠାରେ ଅନ୍ୟ କେହି ଦଖଲ କରିସାରିଛନ୍ତି କିମ୍ବା ସେ ଜାଗାକୁ ଗଲେ ସ୍ଥାନୀୟ ଲୋକଙ୍କ ବିରୋଧ ଯୋଗୁ ରହିପାରୁ ନ ଥିବା ସେମାନେ ପ୍ରକାଶ କରିଛନ୍ତି। ଚାଷୀ ମୂଲିଆ ସଂଘର ସୂଚନା ଅନୁଯାୟୀ ପଟ୍ଟା ପାଇଥିବା ମୋଟ ଲୋକଙ୍କ ମଧ୍ୟରୁ ମାତ୍ର ୧୩୫ ପରିବାରକୁ ଜାଗା ଚିହ୍ନଟ କରାଯାଇ ଥଇଥାନ କରାଯାଇଛି।
ଅଖିଳ ଭାରତ କ୍ଷେତ ମୂଲିଆ ସଙ୍ଗଠନ ସମ୍ପାଦକ ପ୍ରତାପ କୁମାର ସେଠୀ କହିଛନ୍ତି, ଭୂମିହୀନଙ୍କର ଏହି ସମସ୍ୟା ନେଇ ସଙ୍ଗଠନ ପକ୍ଷରୁ ବିଭିନ୍ନ ସମୟରେ ଆନ୍ଦୋଳନ କରାଯାଉଛି। ଜିଲା ପ୍ରଶାସନ ଓ କର୍ମଚାରୀମାନଙ୍କ ଖିଆଲି ନୀତି ଯୋଗୁ ଭୂମିହୀନ ମିଶନ ସଫଳ ହୋଇପାରୁ ନାହିଁ। ମାନବାଧିକାର କର୍ମୀ ରାଧାକାନ୍ତ ତ୍ରିପାଠୀ କହନ୍ତି, ଦୀର୍ଘଦିନ ଧରି ଏହା ଉପରେ ସଂଘର୍ଷ କରିବା ପରେ କିଛି ପରିମାଣରେ ସଫଳତା ମିଳିଛି। ଡଗମୁଣ୍ଡ କଲୋନୀରେ ୧୪ ପରିବାରକୁ ୪ ଡିସିମିଲ ଲେଖାଏ ଜାଗା ଦିଆଯାଇଛି। ସେଠାରେ ସ୍କୁଲ ଓ ଅଙ୍ଗନୱାଡି କେନ୍ଦ୍ର ଖୋଲାଯାଇଛି। ଏ ସମ୍ପର୍କରେ ଜିଲାପାଳ ସିଦ୍ଧେଶ୍ୱର ବଳିରାମ ବୋନ୍ଦାରଙ୍କୁ ପଚାରିବାରୁ କିଛିଦିନ ହେଲା ସେ ଜିଲାପାଳ ଭାବେ ଏଠାରେ ଯୋଗ ଦେଇଛନ୍ତି, ଏହି ସମସ୍ୟା ନେଇ ଅଭିଯୋଗ ଆସିଛି ଏବଂ ତଦନ୍ତ କରାଯାଇ ଖୁବ୍ଶୀଘ୍ର ସମାଧାନ କରାଯିବ ବୋଲି କହିଛନ୍ତି।
- ସନାତନ ରାଉତ
