ଋତୁରାଜ ବସନ୍ତରେ ଆଉ ନାହିଁ ସେ ଥଣ୍ଡା ଥଣ୍ଡା ସୁଲୁସୁଲିଆ ମଳୟ ପବନର ସୁନ୍ଦର ଅନୁଭବ, ଏବେ ଝାଞ୍ଜି ପବନରେ ହନ୍ତସନ୍ତ ସଭିଏଁ। ଏବେଠୁ ତାପମାତ୍ରା ବୃଦ୍ଧି ଯୋଗୁ ବିଭିନ୍ନ ସ୍ବାସ୍ଥ୍ୟ ସମସ୍ୟା ସାଜିଲାଣି ଚିନ୍ତାର କାରଣ। ଆଗକୁ ଖରାଦିନେ ଗରମ ଆହୁରି ବଢି ବଢି ଚାଲିବ। ତେଣୁ ଏମିତିରେ ଶରୀରକୁ ସୁସ୍ଥ ରଖିବା ଲାଗି ଏବେଠୁ ସଜାଗ ରହିବା ସହ ଶରୀରର ବିଶେଷ ଯତ୍ନ ନେବା ଆବଶ୍ୟକ…
ଋତୁରାଜ ବସନ୍ତରେ ନା ଥାଏ ଅଧିକ ଶୀତ ନା ଗରମ। ଚାରିଆଡ଼େ ସୁଲୁସୁଲିଆ ପବନ ସାଙ୍ଗକୁ କୋଇଲିର ସ୍ବର ଓ ଭଳିକି ଭଳି ଫୁଲର ସମ୍ଭାର। ଯେଉଁଥିପାଇଁ ବର୍ଷର ଅନ୍ୟ ଦିନଗୁଡ଼ିକ ତୁଳନାରେ ଏହି ସମୟରେ ପ୍ରକୃତି ଲାଗେ ଖୁବ୍ ସୁନ୍ଦର। ହେଲେ ବର୍ତ୍ତମାନ ଜନସଂଖ୍ୟା ବୃଦ୍ଧି, ଜଙ୍ଗଲ କ୍ଷୟ, କଳକାରଖାନା ଏବଂ ଯାନବାହନରୁ ନିର୍ଗତ ଧୂଆଁ ଇତ୍ୟାଦି ପୃଥିବୀକୁ ଏତେମାତ୍ରାରେ ଉତ୍ତପ୍ତ କରିଦେଇଛି ଯେ, ବସନ୍ତରରେ ଆଉ ସେ ଅନନ୍ଦ ନାହିଁ ବରଂ ଅସମୟରେ ଅତ୍ୟଧିକ ତାପମାତ୍ରା ବୃଦ୍ଧି, ଜଳର ଅଭାବ ସହ ଶରୀରର ତାପମାତ୍ରା ବଢ଼ିବା ହେତୁ ଅଧିକାଂଶଙ୍କଠାରେ ବିଭିନ୍ନ ସ୍ବାସ୍ଥ୍ୟ ସମସ୍ୟା ଦେଖାଦେଉଛି। ବିଶେଷକରି କଲେଜ, କୋଚିଂ, ଜବ୍ ହେଉ ଅବା ଅନ୍ୟ କାରଣ ଲାଗି ବାହାରକୁ ଯାଉଥିବା ଯୁବପିଢ଼ିଙ୍କ ଲାଗି ପ୍ରକୃତିର ଏଭଳି ଅସ୍ବାଭାବିକ ପରିବର୍ତ୍ତନ ଅସୁବିଧା ସୃଷ୍ଟି କରୁଛି। ତେଣୁ ଏଦିନେ କିପରି ଶରୀର ପ୍ରତି ସଜାଗ ରହିବେ, ଏବଂ ଏ ଦିଗରେ ବିଶେଷ ସଜାଗ ରହିବା ଦରକାର।
ଏହି ଋତୁରେ ସାଧାରଣତଃ ପାଗ ଥଣ୍ଡା ରହିଥାଏ। ହେଲେ ବର୍ତ୍ତମାନ ଅଧିକ ଗରମ ହେବା ଯୋଗୁ ଅଧିକାଂଶ ଯୁବତୀଯୁବକ କିଛି ଥଣ୍ଡା ଖାଦ୍ୟପେୟ ଯେପରି ଥଣ୍ଡା ପାଣି, ଆଇସ୍କ୍ରିମ୍, ଚୁସ୍କିି, କୋଲ୍ଡ ଡ୍ରିଙ୍କ୍ସ ଆଦିକୁ ସର୍ବପ୍ରଥମେ ବାଛୁଛନ୍ତି। ହେଲେ ଯେହେତୁ ଏ ସମୟରେ ବାୟୁମଣ୍ଡଳର ତାପମାତ୍ରା ଅନୁଯାୟୀ ଶରୀରର ତାପମାତ୍ରା ଅଧିକ ରହୁଛି, ତେଣୁ ହଠାତ୍ ଏଭଳି ଥଣ୍ଡା ଖାଦ୍ୟ ଖାଇବା ଦ୍ବାରା ଶରୀରର ତାପମାତ୍ରା ଅସନ୍ତୁଳିତ ହୋଇପଡୁଛି। ଫଳରେ ଥଣ୍ଡା, କାଶ, ଥ୍ରୋଟ୍ ବା ଗଳା ଇନ୍ଫେକ୍ସନ୍ ଭଳି ସମସ୍ୟା ଦେଖାଦେଉଛି। ଏଦିନେ ଅସ୍ବାଭାବିକ ଖରା ବଢ଼ିବା ଯୋଗୁ ଅନେକଙ୍କ ଠାରେ ବାନ୍ତି, ମୁଣ୍ଡବିନ୍ଧା, ଝାଡା, ନିମ୍ନ ରକ୍ତଚାପ ଭଳି ସମସ୍ୟା ବି ଦେଖାଦେଇଥାଏ। ଏମିତିକି କେହି କେହି ଅଚେତ ମଧ୍ୟ ହୋଇ ପଡନ୍ତି। ଏଦିନେ ଅଧିକାଂଶ ଯୁବତୀଯୁବକଙ୍କର ପରୀକ୍ଷା ଚାଲିଥାଏ। ତେଣୁ ପାଠ ପଢିବା ଆଳରେ ଖାଦ୍ୟ ଏବଂ ବିଶେଷକରି ପ୍ରଚୁର ପରିମାଣରେ ପାଣି ପିଇବାରେ ଆଦୌ ଅବହେଳା କରନ୍ତୁ ନାହିଁ। ଏଦିନେ ପାଣି ଅଧିକ ପିଇବା ସହ ଫାଷ୍ଟଫୁଡ୍, ତେଲମସଲାଯୁକ୍ତ ଖାଦ୍ୟ ଏବଂ ଅନ୍ୟ ଗରିଷ୍ଠ ଖାଦ୍ୟଠାରୁ ଦୂରେଇ ରହିବା ଭଲ।
ଡିହାଇଡ୍ରେଶନ୍ ସମସ୍ୟା
ହୋଇପାରେ କ୍ଷତିକାରକ
ଶୀତ ପରେ ହଠାତ୍ ଖରାର ପ୍ରକୋପ ବଢିଯିବାରୁ ଅଧିକାଂଶଙ୍କ ଠାରେ ଝାଳ ଆକାରରେ ଶରୀରରୁ ସ୍ନେହସାର, ଖଣିଜ ଲବଣ ଓ ଜଳୀୟ ଅଂଶ କ୍ଷୟ ହୋଇ ଶରୀରରେ ଜଳ ଶୁଷ୍କତା ଦେଖାଦିଏ। ଫଳରେ ଖାଦ୍ୟ ହଜମ ହେବାରେ କଷ୍ଟ ହୁଏ, ଏସିଡିଟି ବା ଅମ୍ଳ ହେବା ସହ ଅନ୍ୟାନ୍ୟ ସ୍ବାସ୍ଥ୍ୟ ସମସ୍ୟା ବି ଦେଖାଦିଏ। ତେଣୁ ଏଦିନେ ଶରୀରକୁ ହାଇଡ୍ରେଟ୍ ରଖିବା ସହ ଖାଦ୍ୟପେୟ ପ୍ରତି ବିଶେଷ ଯତ୍ନଶୀଳ ହେବା ଆବଶ୍ୟକ…
ଜଳୀୟାଂଶ କମିଗଲେ ଜଳଶୁଷ୍କତା(ଡିହାଇଡ୍ରେଶନ) ହୋଇଥାଏ ଓ ଏହା ଗୁରୁତର ହେଲେ ବ୍ରୁକକ୍ ଅକାମୀ(ରେନାଲ୍ ଫେଲ୍ୟୁୟର) ହୋଇ ମୃତ୍ୟୁ ହେବାର ଆଶଙ୍କା ଥାଏ।
ଉତ୍ତାପ ବୃଦ୍ଧି ପାଇଲେ ଅର୍ଥାତ୍ ମାତ୍ର ୪୦ଡିଗ୍ରୀ ସେଲ୍ସିୟସ୍ରୁ ଉର୍ଦ୍ଧ୍ୱ ହେଲେ ଶରୀର ସହ୍ୟ କରିପାରେନାହିଁ ଏବଂ ଅଂଶୁଘାତ ହୋଇଥାଏ।
କମିବା ସହିତ ଗୁରୁତ୍ୱପୂର୍ଣ୍ଣ ଲବଣ ସୋଡିୟମ ଓ ପଟାସିୟମ କମିବା ସହିତ ବାଇକାବ୍ରୋନେଟ୍, କ୍ୟାଲ୍ସିୟମ ଇତ୍ୟାଦି ମଧ୍ୟ କମିଥାଏ। ସୋଡିୟମ କମିଲେ ଜୀବକୋଷଗୁଡିକ କାର୍ଯ୍ୟକ୍ଷମତା ହରାଇଥାନ୍ତି। ମଣିଷ ବାଉଳିଲା ଭଳି ହେବା ସହିତ ଅଚେତ ହୋଇଯାଏ, ପଟାସିୟମ କମିଲେ ହୃଦ୍ଯନ୍ତ୍ର କାର୍ଯ୍ୟ କରିପାରେ ନାହିଁ।
ମୃଦୁ ଥଣ୍ଡାପାନୀୟ, ବିୟର, କାର୍ବୋନେଟେଡ୍ ଜଳ ଅପେକ୍ଷା ସାଧା ପରିସ୍କାର ପାଣି ଅଧିକ ଉପଯୋଗୀ। ଫଳରସ, ତୋରାଣୀ, ଦହି ପାଣି ବା ଚହ୍ଲା, ପଖାଳ, ତରଭୁଜ ଇତ୍ୟାଦି ସହିତ ଓଆର୍ଏସ୍ ଦ୍ରବଣ ସବୁଠାରୁ ଉପକାରୀ। ଓଆର୍ଏସ୍ ଦ୍ରବଣ ସାଲାଇନ୍ ପରି କାମ କରିଥାଏ। ଏହା ସଠିକମାତ୍ରାରେ ର୍ଥାତ୍ ଏକ ଲିଟର ପରିସ୍କାର ପାଣିରେ ଏକ ପ୍ୟାକେଟ୍ ଗୋଳାଇ ପିଇବା ଉଚିତ୍।
ପାଣି ପିଇବାରେ ତୃପ୍ତି ଆଣୁ ଥିଲେ ହେଁ ଏହା କୋଷମାନଙ୍କୁ ସଂକୁଚିତ କରିଥାଏ। ପାକସ୍ଥଳୀ ଓ ଅନ୍ୟାନ୍ୟ ରସକ୍ଷରଣ କମାଇଥାଏ, ହୃଦ୍ସ୍ପନ୍ଦନ କମାଇଥାଏ। ମାତ୍ର ଥଣ୍ଡା ପାଣିରେ ମୁହଁ, ମୁଣ୍ଡ, ହାତ, ଗୋଡ ଓ ଶରୀର ଧୋଇଲେ ବାହ୍ୟ ଉତ୍ତାପ କମିଥାଏ। ଗରମ କିମ୍ବା ଥଣ୍ଡା ତରଳ ପଦାର୍ଥ ପାକସ୍ଥଳୀ ମଧ୍ୟକୁ ଗଲେ ତାହାର ତାପମାତ୍ରା ଶରୀରର ସାମାନ୍ୟ ତାପମାତ୍ରାକୁ ଆସିଥାଏ।
ଖରାଦିନେ ସଦାସର୍ବଦା କେବଳ ପାଣି ନ ପିଇ, ଓଆର୍ଏସ୍ ଦ୍ରବଣଯୁକ୍ତ ପାଣି, ତୋରାଣୀ, ଘୋଳଦହି, ତରଭୁଜ, କାକୁଡି, ଲେମ୍ବୁପାଣି ଇତ୍ୟାଦି ପଇବା ସ୍ବାସ୍ଥ୍ୟପ୍ରତି ଲାଭଦାୟକ।
– ଡା. ରାମଚନ୍ଦ୍ର ରାଉତ
ବରିଷ୍ଠ ଚିକିତ୍ସକ
