ହାଇଦ୍ରାବାଦ,୨୯।୬: ଆନ୍ଧ୍ରପ୍ରଦେଶର ପୂର୍ବ ଗୋଦାବରୀ ଜିଲାର ଏକ ନଦୀ ମୁହାଣରୁ ଏକ ବିଶାଳକାୟ ସମୁଦ୍ର ଗେଣ୍ଡା ଉଦ୍ଧାର ହୋଇଛି। ଏହି ସାମୁଦ୍ରିକ ଗେଣ୍ଡାକୁ ୧୮ହଜାର ଟଙ୍କାରେ ନିଲାମ କରାଯାଇଛି। ଏହି ଗେଣ୍ଡାକୁ ସିରିନକ୍ସ ଆର୍ୟୁନସ ଭାବେ ଚିହ୍ନଟ କରାଯାଇଛି। ଏହା ବିଶ୍ୱର ସବୁଠାରୁ ବଡ଼ ଓ ବିରଳ ପ୍ରଜାତିର। ଯାହା ଉଭୟ ସ୍ଥଳଭାଗ ଓ ଜଳଭାଗରେ ମିଳିଥାଏ। ଏହାର ଲମ୍ବ ୭୦ ସେଣ୍ଟିମିଟର ଯାଏ ବଢ଼ୁଥିବା ବେଳେ ଏହାର ଓଜନ ୧୮ କିଲୋଗ୍ରାମ୍ ପର୍ଯ୍ୟନ୍ତ ହୋଇପାରେ। ଏହା ବିରଳ ପ୍ରଜାତିର ହୋଇଥିବା ବେଳେ ପ୍ରାୟତଃ ବନ୍ୟା ଓ ବାତ୍ୟା ପରେ ଏହି ଗେଣ୍ଡାଗୁଡ଼ିକୁ କୂଳରେ ଦେଖିବାକୁ ମିଳିଥାଏ। ବର୍ଷା ଦିନେ ଏମାନଙ୍କ ଚଳପ୍ରଚଳ ଅଧିକ ଥିବା ବେଳେ ଶୀତଦିନେ ଏମାନେ ମାଟି ତଳେ ଲୁଚି ରହିଥାନ୍ତି। ତେବେ ଏହି ମାଂସାହାରୀ ଗେଣ୍ଡା ଏବେ ବିଳୁପ୍ତ ହେବାକୁ ବସିଲେଣି। ଅନେକ ଲୋକେ ଏହି ଗେଣ୍ଡାକୁ ଶିକାର କରି ଏହାକୁ ଆଭୂଷଣ ରୂପେ ପିନ୍ଧୁଥିବା ଜଣାପଡ଼ିଛି। କ୍ୱିନ୍ସଲ୍ୟାଣ୍ଡ ସଂଗ୍ରହାଳୟ ଅନୁସାରେ ଗହଣା ବା ନମୁନା ରୂପେ ଏହି ଗେଣ୍ଡାର ଲୋକପ୍ରିୟତା ରହିଛି। ତେଣୁ ବିରାଟକାୟ ଗେଣ୍ଡା ଏବେ ଏତେଟା ଆଉ ସହଜରେ ଦେଖିବାକୁ ମିଳୁନାହିଁ। ତେବେ ଏହି କମଳା ରଙ୍ଗର ବିଶାଳକାୟ ଗେଣ୍ଡାର ଏକ ଫଟୋକୁ ଟୁଇଟରରେ ଶେୟାର କରାଯାଇଛି। ଏହି ଫଟୋ ଏବେ ଏହା ସୋସିଆଲ ମିଡିଆରେ ଭାଇରାଲ ହୋଇଥିବା ବେଳେ ୟୁଜର୍ସ ପ୍ରତିକ୍ରିୟା ଦେଇଛନ୍ତି।
