ଭୁବନେଶ୍ୱର,୨୪।୧୦(ବ୍ୟୁରୋ): ରାଜ୍ୟ ସରକାର ଅସ୍ଥାବର ସମ୍ପତ୍ତିର ବେଞ୍ଚ ମାର୍କ ଭେଲ୍ୟୁ ବିଏମ୍ଭି ସଂଶୋଧନ କରିବାକୁ ଯାଉଛନ୍ତି। ଏହି ପଦକ୍ଷେପ ଦ୍ୱାରା ଜମି ଏବଂ ଘର ମହଙ୍ଗା ହୋଇପାରେ। ଏଥିପାଇଁ ବୋର୍ଡ ଅଫ ରେଭିନ୍ୟୁ ଆଇଜି ସବୁ ଜିଲାପାଳ ଏବଂ ଜିଲା ସ୍ତରୀୟ ମୂଲ୍ୟାୟନ କମିଟିକୁ ଚିଠି ଲେଖିଛନ୍ତି। ଉଭୟ ଗ୍ରାମାଞ୍ଚଳ ଏବଂ ସହରାଞ୍ଚଳରେ ଏହି ପ୍ରକ୍ରିୟା ହେବ। ବିଏମ୍ଭି ଭେଲ୍ୟୁ ସଂଶୋଧନ ପାଇଁ ପୂର୍ବରୁ ପ୍ରସ୍ତାବ ରହିଥିଲା।
ତେବେ ୨୦୨୦-୨୧ ଆର୍ଥିକ ବର୍ଷ ଶେଷ ପଯର୍ୟନ୍ତ ୨୦୧୯-୨୦ ର ସଂଶୋଧିତ ବିଏମ୍ଭି ଲାଗୁ କରିବାକୁ ବିଜ୍ଞପ୍ତି ଜାରି ହୋଇଥିଲା। ୨୦୨୨ ମାର୍ଚ୍ଚ ୩୧ ତାରିଖ ପଯର୍ୟନ୍ତ ସଂଶୋଧିତ ବିଏମ୍ଭିକୁ ସ୍ଥଗିତ ରଖାଯାଇଥିଲା। ଏବେ କୋଭିଡ୍ ସ୍ଥିତିରେ ସୁଧାର ଆସିବା ପରେ ଏବଂ କଟକଣା କୋହଳ ହେବାରୁ ବିଏମ୍ଭିକୁ ସଂଶୋଧିତ କରି ପୁନଃ ନିର୍ଦ୍ଧାରଣ କରିବାକୁ ନିଷ୍ପତ୍ତି ହୋଇଛି। ତହସିଲ ଏବଂ ଜିଲା ସ୍ତରରେ ମୂଲ୍ୟାୟନ କମିଟି ଗଠନ କରିବାକୁ କୁହାଯାଇଛି।
