ଲକ୍ଷ୍ନୌ,୨୦ା୮: ଆଗ୍ରାର ସରୋଜିନୀ ନାଇଡୁ ମେଡିକାଲ କଲେଜରୁ ଏମ୍ବିବିଏସ୍ ପାସ କରିଥିବା ଜଣେ ମହିଳା ଡାକ୍ତରଙ୍କୁ ହତ୍ୟା କରାଯାଇଥିବା ଜଣାପଡ଼ିଛି। ତାଙ୍କ ସହ ୭ ବର୍ଷ ଧରି ପ୍ରେମସମ୍ପର୍କ ରଖିଥିବା ସାଥୀ ଡାକ୍ତର ତାଙ୍କୁ ହତ୍ୟା କରିଛନ୍ତି।
ଅଭିଯୁକ୍ତ ଡାକ୍ତର ବିବେକ ତିଓ୍ବାରୀ ପୋଲିସ ନିକଟରେ ସ୍ବୀକାର କରିଛନ୍ତି ଯେ, ଯୋଗିତାଙ୍କ ସହ ତାଙ୍କର ୭ ବର୍ଷ ଧରି ପ୍ରେମସମ୍ପର୍କ ଥିଲା। ମଙ୍ଗଳବାର ସନ୍ଧ୍ୟାରେ ସେ ତାଙ୍କ ପ୍ରେମିକା ଯୋଗିତାଙ୍କୁ ଭେଟିବା ପାଇଁ ଜାଲୁନରୁ ଆଗ୍ରା ଆସିଥିଲେ। ଯେତେବେଳେ ସେ ତାଙ୍କ କାରରେ ବସିଥିଲେ, ସେତେବେଳେ ଦୁହିଁଙ୍କ ମଧ୍ୟରେ ପ୍ରବଳ ଝଗଡ଼ା ହୋଇଥିଲା। ଏଥିପାଇଁ ସେ ରାଗି କି ଯୋଗିତାଙ୍କ ତଣ୍ଟି ଚିପି ଦେଇଥିଲେ। ପରେ ମରି ନ ଥିବା ଭାବି ବିବେକ କାର୍ରେ ରଖିଥିବା ଛୁରି ଭୁସି ଦେଇଥିଲେ। ମଙ୍ଗଳବାର ଯୋଗିତାଙ୍କୁ ହତ୍ୟା କରାଯାଇଥିଲା। ବୁଧବାର ସକାଳେ ଯୋଗିତାଙ୍କ ମୃତଦେହ ସହରଠାରୁ ବହୁ ଦୂରରେ ଥିବା ଡୁକି ପୋଲିସ ଷ୍ଟେଶନ ପରିସରର ବାମ୍ରାଉଲି କାଟାରା ଠାରେ ଏକ ଖୋଲାସ୍ଥାନରୁ ମିଳିଥିଲା। ଯେତେବେଳେ ପୋଲିସ ମୃତକାଙ୍କ ପରିଚୟ ଜାଣିବା ପାଇଁ ପ୍ରୟାସ ଆରମ୍ଭ କଲା, ସେତେବେଳେ ଆଶ୍ଚର୍ଯ୍ୟଜନକ ତଥ୍ୟ ବାହାରିଲା। ପୋଲିସ ଜାଣିବାକୁ ପାଇଥିଲା ଯେ, ମୃତକା ଜଣକ ଏସ୍ଏନ୍ ମେଡିକାଲ କଲେଜର ଏମ୍ବିବିଏସ ପାସ୍ଆଉଟ ଡାକ୍ତର ଯୋଗିତା ଗୌତମ।
ଯୋଗିତା ଦିଲ୍ଲୀର ବାସିନ୍ଦା ଥିଲେ। ତାଙ୍କ ପିତା ଏବଂ ଭାଇ ମଧ୍ୟ ଡାକ୍ତର। ଯୋଗିତା ମଙ୍ଗଳବାର ବିଳମ୍ବିତ ରାତିରୁ ନିଖୋଜ ଥିଲେ ଏବଂ ତାଙ୍କ ଫୋନ୍ ବନ୍ଦ ହୋଇଯାଇଥିଲା। ତେଣୁ ପରିବାର ଲୋକେ ତାଙ୍କ ସହ ଯୋଗାଯୋଗ କରିପାରି ନ ଥିଲେ।
ବୁଧବାର ସକାଳେ ଡାକ୍ତର ଯୋଗିତାଙ୍କ ପିତା ଏବଂ ଭାଇ ଆଗ୍ରା ଥାନା ଏମ୍ ଗେଟ୍ଠାରେ ଝିଅ ନିଖୋଜ ନେଇ ଏକ ମାମଲା ଦାୟର କରିଥିଲେ। ସେ ଅଭିଯୋଗ କରିଥିଲେ, ଓରାଇ ଜାଲାଉନ ମେଡିକାଲ କଲେଜର ମେଡିକାଲ ଅଫିସର ଡାକ୍ତର ବିବେକ ତିଓ୍ବାରୀ ତାଙ୍କ ଝିଅକୁ ସବୁବେଳେ ହଇରାଣ କରୁଥିଲେ। ଏପରିକି ସେ ହତ୍ୟା କରିବାକୁ ଧମକ ମଧ୍ୟ ଦେଉଥିଲେ।
ଏହା ପରେ ପୋଲିସ ଷ୍ଟେଶନ ପରିସରରେ ଥିବା ସିସିଟିଭି ମାଧ୍ୟମରେ ଖୋଜାଖୋଜି କରିଥିଲା। ଫଳରେ ଯୋଗିତାଙ୍କ ମୃତ୍ୟୁ ସହ ଜଡ଼ିତ କିଛି ସୂଚନା ପୋଲିସକୁ ମିଳିଥିଲା। ପୋଲିସ ଏହି ମାମଲାରେ କାର୍ଯ୍ୟାନୁଷ୍ଠାନ ଗ୍ରହଣ କରି ଅଭିଯୁକ୍ତ ଡାକ୍ତର ବିବେକ ତିଓ୍ବାରୀଙ୍କୁ ଗିରଫ କରିଛି।
