ଭୁବନେଶ୍ୱର,୬।୫(ବ୍ୟୁରୋ): ରାଜଧାନୀରେ ରୋଡ଼ ରୋମିଓଙ୍କ ଆତଙ୍କରାଜ ଦେଖିବାକୁ ମିଳିଛି। ଜଣେ ଯୁବତୀଙ୍କୁ କମେଣ୍ଟ ଓ ଢ଼େଲା ମାଡ଼କୁ ବିରୋଧ କରିବାରୁ ୧୦ରୁ ଉଦ୍ଦର୍ବ ଯୁବକ ତାତିଯାଇ ହାଇଡ୍ରାମା କରିଛନ୍ତି। ନୟାପଲ୍ଲୀ ଥାନା ଅନ୍ତର୍ଗତ ବେହେରାସାହି ସ୍ଥିତି ଉଗ୍ରତାରା ଲେଡିଜ୍ ହଷ୍ଟେଲକୁ ଅସାମାଜିକ ଯୁବକମାନେ ପଥର ମାଡ଼ କରି ଭଙ୍ଗାରୁଜା କରିଛନ୍ତି। ପଥର ମାଡ଼ରେ ହଷ୍ଟେଲର କାଚ, ପାଚେରି, ଝରକା ଆଦି ଭାଙ୍ଗିଯାଇଥିବା ବେଳେ ୧୦ରୁ ଉର୍ଦ୍ଧ୍ୱ ଯୁବତୀ ଆହତ ହୋଇଛନ୍ତି। ଏନେଇ ହଷ୍ଟେଲ ଅନ୍ତେବାସୀମାନେ ଥାନାରେ ଏତଲା ଦେଇଛନ୍ତି। ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।
ଅନୁଯାୟୀ, ଉକ୍ତ ହଷ୍ଟେଲ ନିକଟରେ ପ୍ରତ୍ୟେକ ଦିନ କିଛି ଯୁବକ ଖଟି କରୁଛନ୍ତି। ଏପରିକି ଆଖପାଖରେ ରହୁଥିବା ଯୁବତୀଙ୍କୁ ସେମାନେ ପ୍ରାୟ ସମୟରେ କମେଣ୍ଟ ମାରନ୍ତି। ହେଲେ ଯୁବତୀମାନେ ଭୟରେ ଏହା ବିରୋଧରେ ପ୍ରତିବାଦ କରନ୍ତି ନାହିଁ। ହେଲେ ଶନିବାର ପରିସ୍ଥିତି ଅଣାୟତ ହୋଇଥିଲା। ନିଳାବତୀ ସ୍ବାଇଁ ନାମ୍ନୀ ଜଣେ ଯୁବତୀ ଉଗ୍ରତାରା ହଷ୍ଟେଲ ସାମ୍ନାରେ ତାଙ୍କ ଗାଡ଼ି ଧରି ଠିଆ ହୋଇଥିଲେ। ଖଟି କରୁଥିବା ରୋଡ ରୋମିଓମାନେ ତାଙ୍କୁ ଢ଼େଲା ମାଡ଼ କରିଥିଲେ। ଏହାକୁ ବିରୋଧ କରି ଲିଳାବତୀ ପ୍ରତିବାଦ କରିଥିଲେ। ଫଳରେ ଯୁବକମାନେ ତାଙ୍କୁ ଗାଳିଗୁଲଜ କରିବା ସହ ମାଡ଼ ମାରିଥିଲେ। ଏପରିକି ହଷ୍ଟେଲ ଭିତରକୁ ବଳପୂର୍ବକ ପଶି ଅନ୍ୟ ଯୁବତୀଙ୍କୁ ମଧ୍ୟ ସେମାନେ ମାଡ଼ ମାରିଥିଲେ। ଏଥିସହ ଢ଼େଲା ମାଡ଼ କରିଥିଲେ। ଫଳରେ ହଷ୍ଟେଲରେ ଥିବା ଗାଡ଼ି ଅନ୍ୟ ଆସବାବ ପତ୍ର ଭାଙ୍ଗି ଯାଇଛି। ୧୫ ମିନିଟରୁ ଉର୍ଦ୍ଧ୍ୱ ସମୟ ଯୁବକମାନେ ଏଭଳି ଆତଙ୍କରାଜ ଖେଳାଇଥିଲେ। ଏନେଇ ଖବର ଦିଆଯିବା ପରେ ପୋଲିସ ଘଟଣାସ୍ଥଳରେ ପହଞ୍ଚିଥିଲା। ପରେ ଯୁବକମାନେ ଛତ୍ରଭଙ୍ଗ ଦେବାରୁ ପରିସ୍ଥିତି ଶାନ୍ତ ପଡ଼ିଥିଲା। ତେବେ ଏହା ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରି ନ୍ୟାୟ ଦେବାକୁ ଏତଲା ଫର୍ଦ୍ଦରେ ଯୁବତୀମାନେ ଦର୍ଶାଇଛନ୍ତି। ଅନ୍ୟପକ୍ଷରେ ରାଜଧାନୀରେ କିଛି ବାଉନସର ଗ୍ୟାଙ୍ଗ ଅପରାଧ ରଚୁଥିବା ବେଳେ ଏବେ ରୋଡ ରୋମିଓଙ୍କ ଏଭଳି କାଣ୍ଡକୁ ନେଇ ବିଭିନ୍ନ ମହଲରେ ଚର୍ଚ୍ଚାର ବିଷୟ ହୋଇଛି।
