ସମ୍ବଲପୁର,୧୮ା୪(ବ୍ୟୁରୋ): ସମ୍ବଲପୁରରେ ହନୁମାନ ଜୟନ୍ତୀ ବାଇକ୍ ଶୋଭାଯାତ୍ରା ସମୟରେ ଘଟିଥିବା ସାମ୍ପ୍ରଦାୟିକ ହିଂସା ଘଟଣାକୁ ନେଇ ଜିଲାରେ ୫ଦିନ ହେଲା ଇଣ୍ଟରନେଟ ସେବା ବନ୍ଦ କରିଦିଆଯାଇଛି। ଏହାସହ କର୍ଫ୍ୟୁ ମଧ୍ୟ ଲଗାଯାଇଛି। ଏଥିଯୋଗୁ ସାଧାରଣ ଜନଜୀବନ ଅସ୍ତବ୍ୟସ୍ତ ହୋଇପଡିିଛି। ବିଶେଷ କରି ନେଟ୍ ସେବା ବନ୍ଦ ଯୋଗୁ ଏହାର ପ୍ରଭାବ ବ୍ୟାଙ୍କ ଉପରେ ପଡିଛି। ଲୋକେ ଅନ୍ଲାଇନରେ ଟଙ୍କା ନେଣଦେଣ କରୁଥିଲେ। ଏପରି କି ଦୋକାନ ବଜାରରେ ମଧ୍ୟ ଅନ୍ଲାଇନରେ କିଣାବିକା ହେଉଥିଲା। ନେଟ୍ ସେବା ବନ୍ଦ ହେବା ଫଳରେ ଅନ୍ଲାଇନ ବ୍ୟାଙ୍କ ସେବା ମଧ୍ୟ ବନ୍ଦ ହୋଇଯାଇଛି। ଲୋକେ ନଗଦ ଟଙ୍କା ଉପରେ ଭରସା କରୁଥିବାରୁ ଏହାର ଚାହିଦା ବୃଦ୍ଧି ପାଇଛି। ଏଥିଯୋଗୁ ଏଟିଏମ୍ କାଉଣ୍ଟରରେ ଲମ୍ବା ଲାଇନ୍ ଲାଗୁଛି। ହେଲେ ସହରରେ ଥିବା କେତେକ ଏଟିଏମ୍ କାଉଣ୍ଟରରେ ଟଙ୍କା ବାହାରୁ ନାହିଁ। ସର୍ଭର ଡାଉନ ଥିବା ସୂଚନା ଆସୁଛି। ଜିଲାରେ ମୋଟାମୋଟି ଭାବେ ନଗଦ ଟଙ୍କାର ଅଭାବ ଦେଖାଦେଇଛି। ଫଳରେ ଜନସାଧାରଣ ହଇରାଣ ହେଉଛନ୍ତି। ଅନ୍ୟପଟେ ପଥରମାଡ଼ ଓ ପୋଡ଼ାଜଳା ଭଳି ହିଂସା ଘଟଣାରେ ସୋମବାର ଆଉ ୬ ଜଣଙ୍କୁ ଗିରଫ କରାଯାଇଛି। ଫଳରେ ମୋଟ ଗିରଫ ସଂଖ୍ୟା ୮୫ରେ ପହଞ୍ଚତ୍ଛି। ଆଗକୁ ଘଟଣାରେ ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ କରାଯିବ। ପରିସ୍ଥିତି ନିୟନ୍ତ୍ରଣାଧୀନ ରହିଛି ବୋଲି ଏସ୍ପି ବାତୁଲା ଗଙ୍ଗାଧର ସୂଚନା ଦେଇଛନ୍ତି। ଅନ୍ୟପଟେ ପ୍ରଶାସନ ପକ୍ଷରୁ କର୍ଫ୍ୟୁ ସମୟର ମଧ୍ୟ କୋହଳ କରାଯାଇଛି। ମଙ୍ଗଳବାର ସକାଳ ୭ଟାରୁ ଅପରାହ୍ନ ୧ଟା ଓ ଅପରାହ୍ନ ୩.୩୦ ମିନିଟରୁ ସନ୍ଧ୍ୟା ୬ଟା ପର୍ଯ୍ୟନ୍ତ କର୍ଫ୍ୟୁ କୋହଳ ହେବ ବୋଲି ଜିଲାପାଳ ଅନନ୍ୟା ଦାସ କହିଛନ୍ତି। ସେ ଆହୁରି କହିଥିଲେ, ପରିସ୍ଥିତି ସ୍ବାଭାବିକ ହେବାରେ ଲାଗିଛି। ପ୍ରଶାସନ ପକ୍ଷରୁ ସମସ୍ତ ଦିଗକୁ ନେଇ ଅନୁଧ୍ୟାନ କରାଯାଉଛି। ମଙ୍ଗଳବାର ବିଭିନ୍ନ ପଡାର ୭ ଗୋଟି ସଂଗଠନର କର୍ମକର୍ତ୍ତାଙ୍କ ସହ ଆଲୋଚନା କରାଯାଇଛି। ଲୋକମାନଙ୍କ ସହ ମିଶି ସେମାନେ ପରିସ୍ଥିତିରେ ସୁଧାର ଆଣିବା ନେଇ କାମ କରିବେ। ଜିଲା ପ୍ରଶାସନର ଅଧିକାରୀମାନେ ମଧ୍ୟ ଆଲୋଚନା କରି ସମାଧାନର ବାଟ ବାହାର କରିବାକୁ ଚେଷ୍ଟା କରୁଛନ୍ତି। ସବୁ ଦିଗରେ ପ୍ରଶାସନ ଯତ୍ନବାନ ରହିଛି ବୋଲି ସେ କହିଥିଲେ। ସୂଚନାଯୋଗ୍ୟ, ଏପ୍ରିଲ ୧୨ରେ ହନୁମାନ ଜୟନ୍ତୀ ପାଇଁ ସହରରେ ବାଇକ୍ ଶୋଭାଯାତ୍ରା ସମୟରେ ପଥରମାଡ଼ ହୋଇଥିଲା। ଏପ୍ରିଲ ୧୪ରେ ହନୁମାନ ଜୟନ୍ତୀ ଶୋଭାଯାତ୍ରା ସମୟରେ ମଧ୍ୟ ପୋଡ଼ାଜଳା, ଭଙ୍ଗାରୁଜା ଭଳି ଘଟଣା ଘଟିଥିଲା। ଉଭୟ ଘଟଣାରେ ପୋଲିସ ମାମଲା ରୁଜୁ କରି ତଦନ୍ତ କରୁଛି। ଉଭୟ ମାମଲାରେ ପୋଲିସ ୮୫ଜଣଙ୍କୁ ଗିରଫ କରିଛି।
