ବୀରମହାରାଜପୁର,୨୧।୫ (ଯୁଗଳ କିଶୋର ମିଶ୍ର ): ଉଚ୍ଚ ମାଧ୍ୟମିକ ଶିକ୍ଷା ପରିଷଦ ଦ୍ୱାରା ପରିଚାଳିତ ଦ୍ବାଦଶ ଶ୍ରେଣୀ (ଯୁକ୍ତ୨) ପରୀକ୍ଷା ବୁଧବାର ପ୍ରକାଶ ପାଇଛି । ସୁବର୍ଣ୍ଣପୁର ଜିଲା ବୀରମହାରାଜପୁର ଅଞ୍ଚଳର କୁନ୍ତି ସାହୁ ୯୯.୫ ପ୍ରତିଶତ ନମ୍ବର ଆଣିଛନ୍ତି। ସେ ସମ୍ବଲପୁରସ୍ଥିତ ଏମ୍ସ ହାୟର ସେକେଣ୍ଡାରି ସ୍କୁଲ ଅଫ ସାଇନ୍ସର ଛାତ୍ରୀ ଥିଲେ। କୁନ୍ତି ଇଂରାଜି, ସାହିତ୍ୟ ପଦାର୍ଥ ବିଜ୍ଞାନ ଏବଂ ରସାୟନ ବିଜ୍ଞାନରେ ଶତପ୍ରତିଶତ ନମ୍ବର ରଖିଛନ୍ତି। ଗଣିତରେ ୯୯ ଏବଂ ଜୀବବିଜ୍ଞାନରେ ୯୮ ନମ୍ବର ଆଣିଛନ୍ତି। ସୁବର୍ଣ୍ଣପୁରଜିଲା ବୀରମହାରାଜପୁର ଉପାନ୍ତ ଅଞ୍ଚଳ ବହଲପଦର ଗ୍ରାମପଞ୍ଚାୟତର ଭାଲୁଡୁଙ୍ଗୁରି ଗ୍ରାମର ଜଗଦାନନ୍ଦ ସାହୁ ଏବଂ ଜାହ୍ନବୀ ସାହୁଙ୍କୁ ଦ୍ବିତୀୟ ଝିଅ କୁନ୍ତି । ପରୀକ୍ଷାଫଳ ନେଇ ସନ୍ତୁଷ୍ଟ ପ୍ରକାଶ କରିଛନ୍ତି। ଏଥି ସହିତ ସେ କହିଛନ୍ତି, ମୋର ପରିଶ୍ରମର ଫଳ ପାଇଛି। ଯୁକ୍ତ ୨ରେ ଆସିଥିବା ରେଜଲ୍ଟ ପାଇଁ ବାପା-ମା, ଶିକ୍ଷକ-ଶିକ୍ଷୟିତ୍ରୀ ଏବଂ ମୋର ଶୁଭେଚ୍ଛୁଙ୍କ ଆଶୀର୍ବାଦ ଏବଂ ଭଲପାଇବା ପାଇଁ ସମ୍ଭବ ହୋଇପାରିଛି। ଏଥି ପାଇଁ ସେମାନଙ୍କୁ ଧନ୍ୟବାଦ ଜଣାଉଛି। ମେଡିକାଲ ପରୀକ୍ଷା ପାଇଁ ପ୍ରସ୍ତୁତି କରିବି। ଡାକ୍ତର ହୋଇ ରୋଗୀ ସେବା କରିବାର ଲକ୍ଷ୍ୟ ରଖିଛି। ଆମ ସମାଜରେ ଥିବା ଅନେକ ଗରିବ ଲୋକ ଆର୍ଥିକ ଅଭାବ କାରଣରୁ ମେଡିକାଲ କାମରେ ବହୁତ ହଇରାଣ ହେଉଛନ୍ତି। ଏଭଳି ଲୋକଙ୍କ ସେବା କରି ମୁଁ ଗ୍ରହଣ କରିଥିବା ଶିକ୍ଷାର ସଦୂପଯୋଗ କରିବି।
