ମୁମ୍ବାଇ: କରୋନା ସଂକ୍ରମଣ ପାଇଁ ଏବେ ବଲିଉଡ୍ ଇଣ୍ଡଷ୍ଟ୍ରି ସବୁଠାରୁ କ୍ଷତିରେ ଚାଲିଛି ବୋଲି କୁହାଯାଉଛି । ଏହି ସମୟର ଅଧିକାଂଶ ଫିଲ୍ମ ଓଟିଟି ପ୍ଲାଟଫର୍ମରେ ରିଲିଜ୍ ହେଉଛି । ନିକଟରେ କ୍ରିତି ସାନନଙ୍କ ଅଭିନୀତ ଫିଲ୍ମ ‘ମିମି’ ବି ଓଟିଟି ପ୍ଲାଟଫର୍ମରେ ରିଲିଜ ହେବ ବୋଲି ଅନୁମାନ କରାଯାଉଛି । ଏହା ପୂର୍ବରୁ ମୁଭିର ଫାଷ୍ଟ ଲୁକ୍ ଶେୟାର କରିଛନ୍ତି ଅଭିନେତ୍ରୀ । ସୋସିଆଲ ମିଡିଆରେ ଶେୟାର କରିଥିବା ଏହି ଫାଷ୍ଟ ଲୁକରେ କ୍ରିତି ବେବି ବମ୍ପରେ ଦେଖାଯାଇଛନ୍ତି । ଏକ ଭିଡିଓ ଶେୟାର କରି ଜୁଲାଇକୁ ସାଧାରଣରୁ ଅସାଧାରଣ ଆଶା କରିଛନ୍ତି କ୍ରିତି । ତାଙ୍କର ପ୍ରଶଂସକମାନେ ବି ଏହାକୁ ନେଇ କମେଣ୍ଟ କରିଛନ୍ତି । କ୍ରିତିଙ୍କ ଭଉଣୀ ନୁପୁର ଲେଖିଛନ୍ତି ୟେ ବେଷ୍ଟ ହୋନେ ବାଲା ହୈ । ଆଉ କେତେଜଣ ପ୍ରଶଂସକ ଲେଖିଛନ୍ତି ମିମି ପାଇଁ ଆଉ ଅପେକ୍ଷା କରି ହେଉନି । ଏପର୍ଯ୍ୟନ୍ତ ନାୟିକାଙ୍କ ଏହି ଭିଡିଓକୁ ୫ ଲକ୍ଷରୁ ଅଧିକ ଲୋକ ପସନ୍ଦ କରି ସାରଲେଣି । ଏଥିରେ କ୍ରିତି ଏକ ସରୋଗେଟ ମଦର ଭୂମିକାରେ ନଜର ଆସିବେ । ଅଭିନେତ୍ରୀ ହେବାର ଆଶା ନେଇ ଗାଁରୁ ସହର ଆସିଥିବା କ୍ରିତି ଜଣେ ଦମ୍ପତିଙ୍କ ସହ ସାକ୍ଷାତ୍ କରିବା ପରେ ସେରୋଗେସିକୁ ଆପଣାଇଛନ୍ତି । ହେଲେ ଏହାପରେ କ’ଣ ହେଉଛି ସେଥିପାଇଁ ଅପେକ୍ଷା କରିବାକୁ ପଡିବ । କ୍ରିତିଙ୍କ ସହ ଏଥିରେ ମୁଖ୍ୟ ଭୂମିକାରେ ଅଛନ୍ତି ପଙ୍କଜ ତ୍ରିପାଠି । ଉଭୟ ପୂର୍ବରୁ ଲୁକାଛୁପି ଓ ବରେଲି କି ବର୍ଫିରେ ନଜର ଆସିସାରିଛନ୍ତି ।
