ନୂଆଦିଲ୍ଲୀ, ୨୨।୪: କୋଭିଶିଲ୍ଡ ଟିକା ରାଜ୍ୟ ସରକାରଙ୍କୁ ୪୦୦ ଟଙ୍କାରେ ଏବଂ ଘରୋଇ ହସ୍ପିଟାଲଗୁଡ଼ିକୁ ୬୦୦ ଟଙ୍କାରେ ଯୋଗାଇ ଦିଆଯିବ ବୋଲି ସିରମ୍ ଇନ୍ଷ୍ଟିଚ୍ୟୁଟ ପକ୍ଷରୁ ବୁଧବାର ସୂଚନା ଦିଆଯାଇଛି। ତେବେ କେନ୍ଦ୍ର ସରକାରଙ୍କୁ ପୂର୍ବ ଭଳି ୧୫୦ ଟଙ୍କାରେ ଟିକା ଯୋଗାଣ ଜାରି ରହିବ। ମେ’ ୧ରୁ ୧୮ ବର୍ଷରୁ ଊର୍ଦ୍ଧ୍ୱ ସମସ୍ତେ କୋଭିଡ୍ ଟିକା ନେଇପାରିବେ ବୋଲି ଦୁଇଦିନ ପୂର୍ବରୁ ସରକାର ଘୋଷଣା କରିଥିଲେ। ଏଥିପାଇଁ ଟିକା ରଣନୀତିରେ କୋହଳ କରାଯାଇଛି। ପ୍ରସ୍ତୁତକାରୀ କମ୍ପାନୀ ପ୍ରତି ମାସରେ ଉତ୍ପାଦିତ ଟିକାର ୫୦% କେନ୍ଦ୍ର ସରକାରଙ୍କୁ ଯୋଗାଇବା ପରେ ଅବଶିଷ୍ଟ ୫୦ ପ୍ରତିଶତ ରାଜ୍ୟ ସରକାର ଓ ଖୋଲା ବଜାରରେ ବିକ୍ରି କରିବାର ସ୍ବାଧୀନତା ପାଇବେ। ଟିକା ଦାମ୍କୁ ନେଇ ରାଜନୀତି ଆରମ୍ଭ ହୋଇଯାଇଛି। ରାଜ୍ୟ ସରକାରଙ୍କ ପାଇଁ ସିରମ୍ କମ୍ପାନୀ ଟିକା ଦାମ୍ ବଢ଼ାଇଥିବାରୁ କଂଗ୍ରେସ ଏବଂ ବାମଦଳ କେନ୍ଦ୍ର ସରକାରଙ୍କୁ ସମାଲୋଚନା କରିଛନ୍ତି। କେନ୍ଦ୍ର ଓ ରାଜ୍ୟଙ୍କ ପାଇଁ ଟିକା ଦାମ୍ ସମାନ ହେବା ଆବଶ୍ୟକ ବୋଲି ଦୁଇ ଦଳ ଦାବି କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବନ୍ଧୁମାନଙ୍କୁ ସୁଯୋଗ ଦେବା ଲାଗି କେନ୍ଦ୍ର ଅନ୍ୟାୟ କରୁଥିବା କଂଗ୍ରେସ ନେତା ରାହୁଲ ଗାନ୍ଧୀ ଅଭିଯୋଗ କରିଛନ୍ତି। ଆର୍ଥିକ ସଙ୍କଟ ମଧ୍ୟରେ ଥିବା ରାଜ୍ୟ ପାଇଁ ସରକାରଙ୍କ ନୂଆ ନୀତି ଦୁର୍ବିଷହ ହେବ ବୋଲି କଂଗ୍ରେସ ନେତା ଜୟରାମ ରମେଶ କହିବା ସହ ଗୋଟିଏ ରାଷ୍ଟ୍ର ଗୋଟିଏ ମୂଲ୍ୟ ନୀତି ଆପଣାଇବାକୁ ଦାବି କରିଛନ୍ତି।
