ଚେନ୍ନାଇ, ୧୧ା୪- ମନୀଷ ପାଣ୍ଡେ ଓ ଜନ୍ନି ବେଆରଷ୍ଟୋଙ୍କ ଅର୍ଦ୍ଧଶତକୀୟ ଇନିଂସ ସତ୍ତ୍ୱେ ସନରାଇଜର୍ସ ହାଇଦ୍ରାବାଦକୁ ୧୦ ରନ୍ରେ ହରାଇ ଦେଇଛି କୋଲକାତା ନାଇଟ୍ ରାଇଡର୍ସ (କେକେଆର)। ୧୮୮ ରନ୍ର ବିଶାଳ ଟାର୍ଗେଟର ପିଛା କରିଥିବା ହାଇଦ୍ରାବାଦ୍ ପ୍ରାରମ୍ଭିକ ଉଇକେଟ୍ ହରାଇଥିଲା। କିନ୍ତୁ ସ୍ଥିତି ସମ୍ଭାଳିଥିଲେ ମନୀଷ ପାଣ୍ଡେ ଓ ଜନ୍ନି ବେଆରଷ୍ଟୋ। ଦୁଇ ବ୍ୟାଟ୍ସମ୍ୟାନ ତୃତୀୟ ଉଇକେଟ ପାଇଁ ୯୨ ରନ୍ କରିଥିଲେ। ଦୁହିଁଙ୍କ ଯୋଗୁ ମ୍ୟାଚ୍ରେ ହାଇଦ୍ରାବାଦ୍ ଜିତିବାର ସମ୍ଭାବନା ସୃଷ୍ଟି ହୋଇଥିଲା। ବେଆରଷ୍ଟୋ (୫୫ ରନ୍, ୫ ଚୌକାଓ ୩ ଛକା) ଆଉଟ୍ ହେବା ପରେ ମଧ୍ୟ ଚାପର ବଶବର୍ତ୍ତୀ ହୋଇ ନ ଥିଲେ ପାଣ୍ଡେ। ମାତ୍ର ତାଙ୍କୁ ଅନ୍ୟ କୌଣସି ବ୍ୟାଟ୍ସମ୍ୟାନଙ୍କ ଠାରୁ ମିଳିଥିଲା ଉଚିତ ସହଯୋଗ । ଶେଷ ଆଡ଼କୁ ଅବଦୁଲ ସମଦ (୧୯ ରନ୍, ୨ ଛକା ) ଖେଳିଥିଲେ କିଛି ବଡ଼ ଶଟ୍। ହେଲେ ତାହା ଯଥେଷ୍ଟ ନ ଥିଲା। ହାଇଦ୍ରାବାଦ୍ ଶେଷ ପର୍ଯ୍ୟନ୍ତ ଖେଳି ୫ ଉଇକେଟ ହରାଇ ୧୭୭ ରନ୍ କରିବାକୁ ସକ୍ଷମ ହୋଇଥିଲା।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା କେକେଆର ପୂରା ୨୦ ଓଭରରେ ୬ ଉଇକେଟ ହରାଇ ୧୮୭ ରନ୍ କରିଥିଲା। ଦଳ ପାଇଁ ଓପନର ନୀତିଶ ରାଣା (୮୦ ରନ୍, ୫୬ ବଲ, ୯ ଚୌକା ଓ ୪ ଛକା) ଓ ରାହୁଲ ତ୍ରିପାଠି (୫୩ ରନ୍, ୨୯ ବଲ, ୫ ଚୌକା ଓ ୨ ଛକା) ଖେଳିଥିଲେ ବିସ୍ପୋରକ ଅର୍ଦ୍ଧଶତକୀୟ ପାଳି। ଦୁହେଁ ଦ୍ୱିତୀୟ ଉଇକେଟ ପାଇଁ ଦଳୀୟ ସ୍କୋରରେ ଯୋଡ଼ିଥିଲେ ୯୩ ରନ୍। ଦୁଇ ବ୍ୟାଟ୍ସମ୍ୟାନ ଆଉଟ୍ ହେବା ପରେ ହାଇଦ୍ରାବାଦ ମ୍ୟାଚ୍କୁ ଫେରିଥିଲା। ଶେଷ ଆଡ଼କୁ ଦୀନେଶ କାର୍ତ୍ତିକ ୨୨ ରନ୍ କରିଥିଲେ। ସନରାଇର୍ସ ପକ୍ଷରୁ ରଶିଦ ଖାଁ ଓ ମହମ୍ମଦ ନବି ହାତେଇଥିଲେ ୨ ଲେଖାଏ ଉଇକେଟ।
