ନୂଆଦିଲ୍ଲୀ, ୧ା୧୨ (ପି.ଟି.): ସିଡ୍ନୀଠାରେ ଅନୁଷ୍ଠିତ ଅଷ୍ଟ୍ରେଲିଆ ବିପକ୍ଷ ଦ୍ୱିତୀୟ ଅନ୍ତର୍ଜାତୀୟ ଦିନିକିଆ କ୍ରିକେଟ ମ୍ୟାଚ୍ରେ ଭାରତୀୟ କ୍ରିକେଟ ଦଳର ଅଧିନାୟକ ବିରାଟ କୋହଲି ଓପନିଂ ସ୍ପେଲ୍ରେ ତାଙ୍କର ପ୍ରମୁଖ ବୋଲର ଯଶପ୍ରୀତ ବୁମ୍ରାଙ୍କୁ ମାତ୍ର ୨ଓଭର ବୋଲିଂ ଦେଇ ମସ୍ତବଡ଼ ଭୁଲ୍ କରିଛନ୍ତି। ବିଶ୍ୱ କ୍ରିକେଟରେ ଅନ୍ୟ କେହି ଏପରି କରି ନ ଥାନ୍ତେ ବୋଲି କହିଛନ୍ତି ପୂର୍ବତନ ଓପନର ଗୌତମ ଗମ୍ଭୀର। କୋହଲିଙ୍କ ଅଧିନାୟକତ୍ୱର ଅନ୍ୟତମ ସମାଲୋଚକ ଗମ୍ଭୀର ଦୁଇଦଳର ଅଧିନାୟକଙ୍କ ମଧ୍ୟରେ ଏକ ତୁଳନା କରିଛନ୍ତି। ସେ କହିଛନ୍ତି ଅଷ୍ଟ୍ରେଲିଆ ଅଧିନାୟକ ଆରୋନ୍ ଫିଞ୍ଚ୍ ତାଙ୍କ ଦଳର ପ୍ରମୁଖ ପେସ୍ ବୋଲର ଜୋସ୍ ହାଜେଲଉଡ୍ଙ୍କର ଠିକଣା ସଦୁପଯୋଗ କରିବାରୁ ଆୟୋଜକ ଦେଶ ପ୍ରଥମ ଦୁଇଟି ଅନ୍ତର୍ଜାତୀୟ ଦିନିକିଆରେ ସହଜ ବିଜୟ ଲାଭ କରିପାରିଛି। ପାଖରେ ଯଶପ୍ରୀତ ବୁମ୍ରାଙ୍କ ଭଳି ପ୍ରତିଭାସମ୍ପନ୍ନ ବୋଲର ଥିଲେ ନୂଆ ବଲ୍ରେ ତାଙ୍କୁ ମାତ୍ର ୨ ଓଭର ବୋଲିଂ ଦେବା ମସ୍ତବଡ଼ ଭୁଲ୍ ବୋଲି ଗମ୍ଭୀର କହିଛନ୍ତି। ତାଙ୍କ ମତରେ ଓନିଂ ସ୍ପେଲ୍ରେ ଯଶପ୍ରୀତ ବୁମ୍ରା ଓ ମହମ୍ମଦ ସାମି ପ୍ରତ୍ୟେକଙ୍କୁ ୫ ଓଭର ଲେଖାଏଁ ବୋଲିଂ ଦିଆଯିବା ଉଚିତ୍। ଦୁହେଁ ଟପ୍ ଅର୍ଡରରେ ଅତିକମ୍ରେ ୨ଟି ଉଇକେଟ ଖସାଇବା ଲାଗି ଉଦ୍ୟମ କରିବେ। ବର୍ତ୍ତମାନ ଅଷ୍ଟ୍ରେଲିଆର ୩ ଟପ୍ ଅର୍ଡର ବ୍ୟାଟ୍ସମ୍ୟାନ ଆରୋନ ଫିଞ୍ଚ୍, ଡେଭିଡ୍ ଓ୍ବାର୍ନର ଏବଂ ଷ୍ଟିଭ୍ ସ୍ମିଥ୍ ଜବରଦସ୍ତ ଫର୍ମରେ ଅଛନ୍ତି। ଭାରତୀୟ ଦଳରେ ଯଦି କୌଣସି ବୋଲର ଏହି ୩ଜଣଙ୍କୁ ଆଉଟ କରିବା ଲାଗି ଦକ୍ଷତା ରଖିଥାନ୍ତି ସେ ହେଉଛନ୍ତି ବୁମ୍ରା। ପ୍ରଥମେ ୨ ଓଭର ବୋଲିଂ ଦେଇ ୧୦ ଓଭର ପରେ ବୋଲିଂ ପାଇଁ ଡାକିବା ବେଳକୁ ବଲ୍ ପୁରୁଣା ହୋଇଯାଇଥିବ। ସେତେବେଳ ଓ୍ବାର୍ନରଙ୍କ ଭଳି ଖେଳାଳିଙ୍କୁ ଆଉଟ କରିବା ସହଜ ହେବ ନାହିଁ ବୋଲି ଗମ୍ଭୀର କହିଛନ୍ତି।
