ଦୁବାଇ, ୫।୧୦: ଚଳିତ ଆଇପିଏଲ୍ର ୧୯ତମ ମୁକାବିଲାରେ ସୋମବାର ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ଓ ଦିଲ୍ଲୀ କ୍ୟାପିଟାଲ୍ସ ମୁହଁାମୁହିଁ ହୋଇଛନ୍ତି। ଏହି ମ୍ୟାଚ୍ ଅବସରରେ ଆର୍ସିବି ଅଧିନାୟକ ବିରାଟ କୋହଲି ଏକ ସ୍ବତନ୍ତ୍ର କୀର୍ତ୍ତିମାନ ସ୍ଥାପନ କରିଛନ୍ତି। ପ୍ରଥମ ଭାରତୀୟ ବ୍ୟାଟ୍ସମ୍ୟାନ ଭାବେ କୋହଲି ଟି୨୦ କ୍ରିକେଟ୍ରେ ୯ ହଜାର ରନ୍ ପୂରଣ କରିଛନ୍ତି। ଏହି ମ୍ୟାଚ୍ ପୂର୍ବରୁ କୋହଲି ଓଭରଅଲ୍ (ଜାତୀୟ, ଅନ୍ତର୍ଜାତୀୟ ଓ ଆଇପିଏଲ୍) ଟି୨୦ କ୍ରିକେଟ୍ରେ ୮,୯୯୦ ରନ କରିଥିଲେ। ୯ ହଜାର ରନ୍ ପୂରଣ କରିବାକୁ ତାଙ୍କୁ ଆଉ ୧୦ ରନ୍ ଆବଶ୍ୟକ ହେଉଥିଲା। ଦିଲ୍ଲୀ ବିପକ୍ଷ ମ୍ୟାଚ ଅବସରରେ ସେ ଏହି ରନ୍ ହାସଲ କରି ବିରଳ କ୍ଲବରେ ନିଜକୁ ସାମିଲ କରିଛନ୍ତି। ଏଥିସହ ବିଶ୍ୱର ୬ଷ୍ଠ ବ୍ୟାଟ୍ସମ୍ୟାନ ଭାବେ କୋହଲି ଓଭରଅଲ୍ ଟି୨୦ କ୍ରିକେଟ୍ରେ ୯ ହଜାର ରନ୍ ପୂରଣ କରିବାର ସୌଭାଗ୍ୟ ଲାଭ କରିଛନ୍ତି। ଏହି ତାଲିକାରେ କ୍ରିସ୍ ଗେଲ୍ (୧୩,୨୯୬ ରନ) ସର୍ବାଗ୍ରେ ରହିଛନ୍ତି। ତାଙ୍କ ପଛକୁ କିରନ ପୋଲାର୍ଡ (୧୦,୩୭୦), ଶୋଏବ ମଲିକ (୯,୯୨୬), ବ୍ରେଣ୍ଡନ ମ୍ୟାକ୍କୁଲମ (୯,୯୨୨) ଓ ଡେଭିଡ୍ ଓ୍ବାର୍ନର (୯,୪୫୧) ରହିଛନ୍ତି।
