ଲଣ୍ଡନ, ୫ା୧୦ (ଏପି)- ଇଥିଓପିଆର ଶୁରା କିଟାଟା ଲଣ୍ଡନ ମାରାଥନ ଜିତିଛନ୍ତି। ରବିବାର ଅନୁଷ୍ଠିତ ଏହି ଇଭେଣ୍ଟରେ ୪ଥର ଟାଇଟଲ ବିଜେତା ଏଲିଉଡ୍ କିପ୍ଚୋଗେଙ୍କୁ ପଛରେ ପକାଇ ବିଜୟ ଲାଭ କରିଛନ୍ତି। ରୋମାଞ୍ଚକ ସ୍ପ୍ରିଣ୍ଟ୍ ଫିନିଶରେ କେନିୟାର ଭିନ୍ସେଣ୍ଟ କିପ୍ଚୁମ୍ବାଙ୍କୁ ପଛରେ ପକାଇ ୨ଘଣ୍ଟା ୫ ମିନିଟ ୪୧ ସେକେଣ୍ଡ ଟାଇମିଂରେ କିଟାଟା ବିଜୟୀ ହୋଇଥିଲେ। କିପ୍ଚୁମ୍ବା ୨:୦୫:୪୧ ଟାଇମିଂରେ ରେସ୍ ଶେଷ କରିଥିଲେ। ପୁରୁଷ ବିଭାଗରେ ତୃତୀୟ ସ୍ଥାନରେ ରହିଥିଲେ ସିସେ ଲେମା (୨:୦୫:୪୫)। ପେଣ୍ଡାରେ ଇଞ୍ଜୁରି ଯୋଗୁ କେନେନିସା ବେକେଲି ଶୁକ୍ରବାର ରେସ୍ରୁ ଓହରିଯିବା ପରେ କିପ୍ଚୋଗେ ଫେଭରାଇଟ୍ ଥିଲେ। ମାତ୍ର ସେ ୨:୦୬:୪୯ ଟାଇମିଂରେ ରେସ୍ ଶେଷ କରି ୮ମ ହୋଇଥିଲେ। ତାଙ୍କ ବିଶ୍ୱରେକର୍ଡ ୨:୦୧: ୩୯ଠାରୁ ସେ ବହୁ ପଛରେ ରହିଯାଇଥିଲେ। ୨୦୧୩ପରେ ଏହା ତାଙ୍କର ପ୍ରଥମ ମାରାଥନ ପରାଜୟ। ମହିଳା ରେସ୍ରେ କିନ୍ତୁ ବିପର୍ଯ୍ୟୟ ଘଟିନାହିଁ। ଗତଥରର ଚାମ୍ପିୟନ ତଥା ବିଶ୍ୱରେକର୍ଡ ଅଧିକାରିଣୀ ବ୍ରିଗିଡ୍ କେନିୟାର କୋସଗେଇ ପୁଣି ଟାଇଟଲ ଜିତିଛନ୍ତି। ସେ ୨:୧୮: ୮୫ ଟାଇମିଂରେ ବିଜୟ ଲାଭ କରିଥିଲେ। ରେସ୍ରେ ଆମେରିକାର ସାରା ହଲ୍ (୨:୨୨:୦୧) ଟାଇମିଂରେ ଦ୍ୱିତୀୟ ସ୍ଥାନରେ ରହିଥିଲେ। ୨୦୦୬ରେ ଦିନା କାଷ୍ଟରଙ୍କ ପରେ ପ୍ରଥମ ଆମେରିକୀୟ ଭାବେ ସେ ମାରାଥନ ପୋଡିୟମ ଅଳଂକୃତ କରିଥିଲେ। କାଷ୍ଟର ସେ ସମୟରେ ଆମେରିକାନ ରେକର୍ଡ ପ୍ରତିଷ୍ଠା କରିଥିଲେ। ବର୍ଷା ମଧ୍ୟରେ ଆୟୋଜିତ ଏହି ରେସ୍ରେ କେନିୟାର ରୁଥ୍ ଚେପନଗେଟିଚ୍ (୨:୨୨:୦୪) ତୃତୀୟ ସ୍ଥାନରେ ରହିଥିଲେ। ମାର୍ଚ୍ଚ ୧୧ରେ କୋଭିଡ୍-୧୯କୁ ବିଶ୍ୱ ମହାମାରୀ ଭାବେ ଘୋଷଣା କରାଯିବା ପରେ ଏହା ହେଉଛି ବିଶ୍ୱର ପ୍ରଥମ ପ୍ରମୁଖ ମାରାଥନ। ପ୍ରକୃତରେ ଏହା ଏପ୍ରିଲ ୨୬ରେ ଆୟୋଜନ ହୋଇଥାନ୍ତା। ମାତ୍ର କରୋନା ପାଇଁ ଏହାକୁ ଅକ୍ଟୋବର ୪ରେ କରିବା ଲାଗି ସ୍ଥିର ହୋଇଥିଲା। ଆୟୋଜକଙ୍କ ତରଫରୁ ଏଥିପାଇଁ ଜୈବ-ସୁରକ୍ଷିତ ବବ୍ଲ ସୃଷ୍ଟି କରାଯାଇଥିଲା। ଧାବକମାନଙ୍କ ଲାଗି ଏକ ସ୍ବତନ୍ତ୍ର ହୋଟେଲରେ ରହଣି ବ୍ୟବସ୍ଥା କରାଯାଇଥିଲା। ଏହି ହେଟେଲର ଚତୁଃପାର୍ଶ୍ୱରେ ୪୦ ଏକର ପରିମିତ ଅଞ୍ଚଳ ରହିଥିଲା। ଧାବକମାନଙ୍କ ଅଭ୍ୟାସ ଲାଗି ଏଥିରେ ସୁବିଧା ରହିଥିଲା। ପ୍ରୋଟୋକଲ ଅନୁସାରେ ସମସ୍ତଙ୍କର କୋଭିଡ୍ ଟେଷ୍ଟ ରାଯାଇଥିଲା। ରବିବାର ରେସ୍ ପାରମ୍ପରିକ ଷ୍ଟ୍ରିଟ୍ରେ ନ ହୋଇ ସେଣ୍ଟ ଜେମ୍ସ ପାର୍କରେ ବିନା ଦର୍ଶକରେ କରାଯାଇଥିଲା। ଏହା ୧୯.୬ ଲାପ୍ ବିଶିଷ୍ଟ ଥିଲା।
