ଭୁବନେଶ୍ୱର,୧୧।୨(ବ୍ୟୁରୋ): ଚଣ୍ଡିଖୋଲ ବଜାରରେ ଏକ ହତ୍ୟା ମାମଲାରେ ଫେରାର ଥିବା ଜଣେ ହାର୍ଡକୋର୍ ଅପରାଧୀଙ୍କୁ ଗୁରୁବାର କ୍ରାଇମବ୍ରାଞ୍ଚର ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍) ୭ ବର୍ଷ ପରେ କଟକରୁ ଗିରଫ କରିଛି। ସେ ହେଲେ କଟକ ଜିଲା ସଦର ଥାନା ଅଞ୍ଚଳର କିଶୋର କୁମାର ମହାରଣା। ତାଙ୍କଠାରୁ ଗୋଟିଏ ପିସ୍ତଲ, ୫ ରାଉଣ୍ଡ ଗୁଳି ଓ ଗୋଟିଏ ମୋବାଇଲ ଫୋନ୍ ଜବତ କରାଯାଇଛି। କିଶୋରଙ୍କୁ କୋର୍ଟ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ତାଙ୍କ ନାମରେ ଏସ୍ଟିଏଫ୍ରେ ମାମଲା (ନଂ.୦୬/୨୦୧୪) ରହିଥିବାବେଳେ କେନ୍ଦ୍ରାପଡ଼ା ଥାନାରେ ଆଉ ଏକ ମାମଲା (ନଂ.୧୩୭/୨୦୧୫) ରହିଛି। ଏସ୍ଟିଏଫ୍ ଏସ୍ପି ତେଜରାଜ ପଟେଲ କହିଛନ୍ତି, କିଶୋର ଜଣେ ହାର୍ଡକୋର୍ ଅପରାଧୀ। ସେ ସବୁବେଳେ ବନ୍ଧୁକରେ ଖେଳେ ଓ ଅପରାଧ ମଧ୍ୟ ଘଟାଏ ବୋଲି ସେ କହିଛନ୍ତି।
ଅନୁଯାୟୀ, ପୂର୍ବ ଶତ୍ରୁତାକୁ କେନ୍ଦ୍ର କରି ୨୦୧୪ ମେ ୧୭ରେ କିଶୋର ତାଙ୍କ ୨ ସହଯୋଗୀଙ୍କ ସହ ମିଶି ଯାଜପୁର ଜିଲା ବଡ଼ଚଣା ଥାନା ସୁଙ୍ଗୁଡ଼ା ଗ୍ରାମର ଦୀପକ ନାଏକଙ୍କୁ ଚଣ୍ଡିଖୋଲ ବଜାରରେ ଗୁଳିକରି ହତ୍ୟା କରିଥିଲେ। ଏସ୍ଟିଏଫ୍ ହତ୍ୟା ଓ ଆମର୍ସ ଆକ୍ଟରେ ଏକ ମାମଲା (ନଂ.୦୬/୨୦୧୪) ରୁଜୁ କରି ତଦନ୍ତ ଆରମ୍ଭ କରିଥିଲା। ତେବେ ତଦନ୍ତ ପରେ ଏସ୍ଟିଏଫ୍ କିଶୋରଙ୍କୁ ପଳାତକ (ଆବସ୍କଣ୍ଡର) ଦର୍ଶାଇ ମୋଟ ୩ଜଣଙ୍କ ବିରୋଧରେ ଚାର୍ଜଶିଟ୍ ଦାଖଲ କରିଥିଲା। ମାମଲାର ଅନ୍ୟତମ ଅଭିଯୁକ୍ତ ଶେଷଦେବ ସ୍ବାଇଁ ଓରଫ୍ ବୁବା ଗିରଫ ହୋଇ ଜେଲ୍ରେ ଥିବାରୁ ଯାଜପୁର ଜିଲା ଦୌରାଜଜ୍ ତାଙ୍କର ଶୁଣାଣି କରି ଦଣ୍ଡାଦେଶ ଦେଇଥିବାବେଳେ ମୁଖ୍ୟ ଅଭିଯୁକ୍ତ କିଶୋରଙ୍କ ମାମଲା ଏବେ ବିଚାରାଧୀନ ରହିଛି।
ସୂଚନା ଅନୁଯାୟୀ, ୨୦୨୦ରୁ ଚୋରା ବନ୍ଧୁକ କାରବାର ବିରୋଧରେ ସ୍ବତନ୍ତ୍ର ଡ୍ରାଇଭ୍ କରାଯାଉଛି। ଏହି ଅଭିଯାନରେ ୬୮ଟି ବନ୍ଧୁକ ସହ ୧୪୬ ଗୁଳି ଜବତ କରାଯାଇଥିବା ଏସ୍ଟିଏଫ୍ ପ୍ରେସ ବିଜ୍ଞପ୍ତିରେ ସୂଚନା ଦେଇଛି।
