ଟିଟିଲାଗଡ଼, ୭ା୭ (ଡି.ଏନ.ଏ.)- ବଲାଙ୍ଗୀର ଜିଲା ଟିଟିଲାଗଡ଼ ଥାନା ଅନ୍ତର୍ଗତ ଚୋରମରା ଗଁାରେ ଗତ ୨ତାରିଖ ଘଟିଥିବା ବର୍ଜୁ ରଣା (୫୪) ହତ୍ୟାକାଣ୍ଡର ପର୍ଦ୍ଦାଫାଶ ହୋଇଛି। ହତ୍ୟା ଘଟଣାର ମୁଖ୍ୟ ସୂତ୍ରଧର ସଇଁନ୍ତଳା ଥାନା ଅନ୍ତର୍ଗତ ବେଲଗଁା ଗ୍ରାମର ଆଦିଲ ମହମ୍ମଦ(୨୨)ବୋଲି ପୋଲିସ କହିଛି। ପ୍ରେମ ବ୍ୟାପାରକୁ ନେଇ ତାଙ୍କଠାରୁ ସୁପାରି ନେଇ ବେଲଗଁାର ସୁଦାମ ରଣା(୨୧), କୁମ୍ଭେପଡାର ଯୁବରାଜ ବିଶି(୨୨), ବୁର୍ଡିପଡାର ରାଜାରାମ ଛୁରା(୧୯) ଓ ଅନ୍ୟ ଜଣେ ବର୍ଜୁଙ୍କ ଗଳାକାଟି ହତ୍ୟା କରିଥିଲେ। ଅଭିଯୁକ୍ତମାନେ ସେମାନଙ୍କ ଦୋଷ ସ୍ବୀକାର କରିଛନ୍ତି। ହତ୍ୟାକାଣ୍ଡରେ ବ୍ୟବହୃତ ଛୁରି, ୫ ମୋବାଇଲ ଫୋନ, ଏକ ବାଇକ, ଘଟଣାସ୍ଥଳରେ ପଡିଥିବା ମଦ ବୋତଲ ଜବତ ହୋଇଛି। ଅନ୍ୟତମ ସୁପାରିକିଲର ଏବେ ଫେରାର ଅଛନ୍ତି। ତାଙ୍କୁ ଧରିବା ଲାଗି ପୋଲିସ ଜାଲ ବିଛାଇଛି। ମଙ୍ଗଳବାର ଟିଟିଲାଗଡ ଥାନା ପରିସରରେ ଆୟୋଜିତ ଖବରଦାତା ସମ୍ମିଳନୀରେ ଏ ନେଇ ସୂଚନା ଦେଇଛନ୍ତି ଏସ୍ଡିପିଓ ସୁରେନ୍ଦ୍ର ନାରାୟଣ ଶତପଥୀ।
ପୋଲିସ ସୂଚନା ଅନୁଯାୟୀ ଚୋରମରା ଗ୍ରାମର ବର୍ଜୁ ରଣା ଗତ ଗୁରୁବାର ଟିଟିଲାଗଡ ଆସି ଅପରାହ୍ନରେ ଘରକୁ ଫେରୁଥିଲେ। ଗ୍ରାମ ପେପର ମିଲ୍ ନିକଟସ୍ଥ ନିଛାଟିଆ ସ୍ଥାନରେ ତାଙ୍କୁ ଗଳାକାଟି ହତ୍ୟା କରାଯାଇଥିଲା। ଏକ ମାମଲା(ନଂ.୨୧୯/୨୦)ରୁଜୁ କରି ପୋଲିସ ତଦନ୍ତ ଜାରି ରଖିିଥିଲା । ହତ୍ୟାକାଣ୍ଡ ଘଟିବା ଦିନ ଆଦିଲ ତାଙ୍କୁ ଫୋନ କରି ବାପା କୁଆଡେ ଯାଇଛନ୍ତି ବୋଲି ପଚାରିଥିବା ତଦନ୍ତକାରୀ ଅଧିକାରୀଙ୍କୁ ବର୍ଜୁଙ୍କ ଝିଅ କହିଥିଲେ। ଏହି ତଥ୍ୟକୁ ଆଧାର କରି ପୋଲିସ ତଦନ୍ତ ଆଗକୁ ବଢାଇଥିଲା। ଆଦିଲଙ୍କ ଫୋନ ଟ୍ରାକିଂ କରି ଅନ୍ୟ ଅଭିଯୁକ୍ତମାନଙ୍କ ପାଖରେ ପହଞ୍ଚି ଯାଇଥିଲା ପୋଲିସ। ଜେରା ବେଳେ ଆଦିଲ ବର୍ଜୁଙ୍କ ଝିଅ ସହିତ ତାଙ୍କର ପ୍ରେମସମ୍ପର୍କ ରହିଥିବା କହିଥିଲେ। ତେବେ ଏଥିରେ ସେ ପ୍ରତିବନ୍ଧକ ସାଜିବାରୁ ବାଟରୁ ହଟାଇବାକୁ ଯୋଜନା କରିଥିଲି। ବର୍ଜୁଙ୍କୁ ହତ୍ୟା କରିବା ଲାଗି ୧ଲକ୍ଷ ଟଙ୍କା ସୁପାରିରେ କଥା ଛିଡ଼ିଥିଲା। ଅଭିଯୁକ୍ତମାନଙ୍କୁ ଅଗ୍ରିମ ଆକାରରେ ୫୦ ହଜାର ଟଙ୍କା ସେ ଦେଇଥିଲେ। ଯୋଜନା ମୁତାବକ ଉକ୍ତ ଦିନ ଅପରାହ୍ନରେ ୫ଜଣ ଅଭିଯୁକ୍ତ ବର୍ଜୁଙ୍କୁ ପେପର ମିଲ୍ ନିକଟସ୍ଥ ନିଛାଟିଆ ସ୍ଥାନକୁ ଡାକି ମଦ ପିଆଇଥିଲେ। ପରେ ତାଙ୍କ ଗଳାକୁ ଛୁରିରେ କାଟି ଦେଇଥିଲେ। ଘଟଣାସ୍ଥଳରେ ବର୍ଜୁଙ୍କ ମୃତ୍ୟୁ ଘଟିବା ପରେ ଅଭିଯୁକ୍ତମାନେ ଫେରାର ହୋଇଯାଇଥିଲେ। ମଙ୍ଗଳବାର ଗିରଫ ଚାରି ଅଭିଯୁକ୍ତ ଆଦିଲ ମହମ୍ମଦ, ସୁଦାମ ରଣା, କୁମ୍ଭେପଡାର ଯୁବରାଜ ବିଶି, ବୁର୍ଡିପଡାର ରାଜାରାମ ଛୁରାଙ୍କୁ କୋର୍ଟଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ସେମାନଙ୍କୁ ଟିଟିଲାଗଡ ସବ୍ଜେଲ ହାଜତକୁ ପଠାଇ ଦିଆଯାଇଛି। ଖବରଦାତା ସମ୍ମିଳନୀରେ ଆଇଆଇସି ପ୍ରଭାତ ରଞ୍ଜନ ମହାନ୍ତି, ଏସଆଇ ମନୋଜ ମୁଣ୍ଡା ଉପସ୍ଥିତ ଥିଲେ।
