ବ୍ରହ୍ମପୁର ଅଫିସ,୨୮ା୨: ଗତ ୨୪ ତାରିଖ ସନ୍ଧ୍ୟାରେ ବ୍ରହ୍ମପୁର ସଦର ଥାନା ଅଧୀନ ଅଳକାପୁରୀ ସପ୍ତମ ଲେନ୍ରେ ରହୁଥିବା ବିଜୟ ଚନ୍ଦ୍ର ବେହେରାଙ୍କ ସ୍ତ୍ରୀ ସୁରଜାଙ୍କୁ ହତ୍ୟା କରାଯାଇଥିଲା। ପୋଲିସ ହତ୍ୟାକାରୀଙ୍କୁ ସୋମବାର ଗିରଫ କରିଛି। ସେ ହେଲେ ବଳିଆ ଓରଫ ବଳରାମ ସାହୁ (୨୬)। ସୁନା ଗହଣା ଓ ଟଙ୍କା ଲୁଟ ଉଦ୍ଦେଶ୍ୟରେ ବଳିଆ ଏହି ହତ୍ୟାକାଣ୍ଡ ଘଟାଇଥିବା ପୋଲିସ ସ୍ପଷ୍ଟ କରିଛି। ଅଭିଯୁକ୍ତ ଜଣଙ୍କ କବିସୂର୍ଯ୍ୟନଗର ଥାନା ଅନ୍ତର୍ଗତ ବୋଇରାଣୀର ମୂଳ ନିବାସୀ ହୋଇଥିବା ବେଳେ ବର୍ତ୍ତମାନ ସଦର ଥାନା ଅନ୍ତର୍ଗତ ଭାବିନିପୁରରେ ରହୁଛନ୍ତି। ବଳିଆ ଜଣେ ଅଲମୀରା ଚାବି ମେକାନିକ ଅଟନ୍ତି।
ଘଟଣା ଦିନ ବିଜୟଙ୍କ ଘରେ ଥିବା ଏକ ଅଲମୀରା ମରାମତି ପାଇଁ ବଳିଆ ୨/୩ ଥର ଯାଇଥିଲେ। ଘଟଣା ଦିନ ସନ୍ଧ୍ୟାରେ ବିଜୟ ଘରୁ କୌଣସି କାମରେ ବାହାରକୁ ଯିବା ପରେ ତାଙ୍କ ଘର ପାଚେରି ଡେଇଁ ବଳିଆ ଭିତରକୁ ଯାଇଥିଲେ। ସୁରଜା ହଠାତ ବଳିଆଙ୍କୁ ଦେଖି, ତୁ ଘର ଭିତରକୁ କାହିଁକି ଆସିଲୁ ବୋଲି ପଚାରିଥିଲେ। ବଳିଆ ଘର ଭିତରେ ଧସେଇ ପଶିଥିଲେ। ସୁରଜା ଏନେଇ ପୋଲିସକୁ ଜଣାଇବେ ବୋଲି କହିଥିଲେ। ପରେ ସେଠାରେ ଉଭୟଙ୍କ ମଧ୍ୟରେ ଝଗଡା ହୋଇଥିଲା। ପରେ ବଳିଆ ଉତକ୍ଷିପ୍ତ ହୋଇ ସୁରଜାଙ୍କୁ ତାଙ୍କ ରୋଷେଇ ଘରେ ଥିବା ଏକ ଛୁରିରେ ଆକ୍ରମଣ କରିଥିଲେ। ସୋମବାର ଆୟୋଜିତ ଏକ ଖବରଦାତା ସମ୍ମିଳନୀରେ ବ୍ରହ୍ମପୁର ଏସ୍ପି ପିନାକ ମିଶ୍ର ଏନେଇ ସୂଚନା ଦେଇଛନ୍ତି। ଘଟଣା ପରେ ବଳିଆ ଲୁଟି ନେଇଥିବା ବୃଦ୍ଧାଙ୍କ ମୋବାଇଲ, ଭ୍ୟାନିଟ ବ୍ୟାଗ, କଳାମାଳି ଓ ଘଟଣା ଦିନ ବଳିଆ ପିନ୍ଧିଥିବା ପୋଷାକ ଓ ରକ୍ତଭିଜା ଛୁରି ମଧ୍ୟ ପୋଲିସ ଜବତ କରିଛି। ମାମଲା ନଂ.୯୫/୨୨ ରେ ବଳିଆଙ୍କୁ କୋର୍ଟ ଚାଲାଣ କରାଯାଇଛି।
