ଭୁବନେଶ୍ୱର,୧୩୯(ସତ୍ୟଜିତ୍ ରାଉତ): ଦମ୍ପତିଙ୍କ ସହ ୨ ସହଯୋଗୀ ମିଶି ରଚିଥିଲେ ଆପରାଧିକ ଷଡ଼ଯନ୍ତ୍ର। ଜଣେ ଡାକ୍ତରଙ୍କୁ ଚିକିତ୍ସା ଆଳରେ ଘରକୁ ଡାକି ମାଡ଼ ମାରିବା ସହ ଗୃହବନ୍ଦୀ କରି ୨୫ ଲକ୍ଷ ଟଙ୍କା ଦାବି କରିଥିଲେ। ହେଲେ ଲକ୍ଷେ ଟଙ୍କା ସହ ୯ଲକ୍ଷ ଟଙ୍କାର ଚେକ୍ ପାଇବା ପରେ ଅଭିଯୁକ୍ତମାନେ ଡାକ୍ତରଙ୍କୁ ତାଙ୍କ ଘରେ ଛାଡ଼ିଥିଲେ। ଏହି ଅପହରଣ ମାମଲାରେ ମଙ୍ଗଳବାର ତମାଣ୍ଡୋ ଥାନା ପୋଲିସ ଉକ୍ତ ଦମ୍ପତିଙ୍କ ସମେତ ୪ଜଣଙ୍କୁ ଗିରଫ କରିଛି। ସେମାନେ ହେଲେ ତମାଣ୍ଡୋ ଥାନା ଅନ୍ତର୍ଗତ ଏକ ଆପାର୍ଟମେଣ୍ଟରେ ରହୁଥିବା ଇରାନୀ ପାତ୍ର (୨୭), ସ୍ବାମୀ ନିଶିକାନ୍ତ ପାତ୍ର ଓରଫ ବାପି (୩୩), ସିଜିପୁଟ ଗ୍ରାମର ସହଯୋଗୀ ମନୋରଞ୍ଜନ ପ୍ରଧାନ ଓରଫ ଗଣେଶ (୩୦) ଓ ଶକ୍ତିକାନ୍ତ ହରିଚନ୍ଦନ ଓରଫ ଗିରିଜା (୩୬)। ଅଭିଯୁକ୍ତଙ୍କଠାରୁ ୩୦ ହଜାର ଟଙ୍କା, ଅପରାଧରେ ବ୍ୟବହୃତ ଛୁରି, ୨ଟି ମୋବାଇଲ ଓ ୯ ଲକ୍ଷ ଟଙ୍କାର ଚେକ୍କୁ ଜବତ କରିଛି ପୋଲିସ। ଅଭିଯୁକ୍ତମାନଙ୍କୁ କୋର୍ଟଚାଲାଣ କରାଯିବା ପରେ ଜାମିନ ନାମଞ୍ଜୁର ହେବାରୁ ସମସ୍ତଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ସୂଚନା ଅନୁଯାୟୀ, ଡାକ୍ତର ଜଣକ ଯାଜପୁର ମଧୁବନ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ କାର୍ଯ୍ୟରତ ଥିବାବେଳେ ଅଭିଯୁକ୍ତ ତଥା ସ୍ଥାନୀୟ ଅଞ୍ଚଳର ଇରାନୀଙ୍କ ସହ ପରିଚୟ ହୋଇଥିଲା। ପରେ ଡାକ୍ତର ଜଣକ ଭୁବନେଶ୍ୱର ଟ୍ରାନ୍ସଫର୍ ହୋଇ ଇନ୍ଫୋସିଟି ଥାନା ଅଞ୍ଚଳର ଏକ ସରକାରୀ ଡାକ୍ତରଖାନାରେ କାର୍ଯ୍ୟ କରୁଛନ୍ତି। ଏପଟେ ଭୁବନେଶ୍ୱରରେ ରହୁଥିବା ଇରାନୀ ଓ ତାଙ୍କ ସ୍ବାମୀ ବାପି ଅନ୍ୟ ଦୁଇ ସହଯୋଗୀଙ୍କ ସହ ମିଶି ତାଙ୍କଠାରୁ ବିପୁଳ ଟଙ୍କା ଲୁଟିବା ପାଇଁ ଷଡ଼ଯନ୍ତ୍ର କରିଥିଲେ। ସେପ୍ଟେମ୍ବର ୮ ରାତିରେ ଡାକ୍ତରଙ୍କୁ ଇରାନି ଚିକିତ୍ସା ପାଇଁ ଘରକୁ ଡାକିଥିଲେ। ସେ ନିଜ କାର୍ ଯୋଗେ ଇରାନିଙ୍କ ଘରକୁ ଆସିବା ପରେ ପୂର୍ବପ୍ରସ୍ତୁତି ଅନୁଯାୟୀ ଅଭିଯୁକ୍ତମାନେ ତାଙ୍କୁ ଗୃହବନ୍ଦୀ କରି କାର୍ ଚାବି, ସୁନା ବ୍ରେସ୍ଲେଟ୍ ଓ ମୋବାଇଲ ଫୋନ୍ ଛଡ଼ାଇ ନେଇଥିଲେ। ଏହାପରେ ଡାକ୍ତରଙ୍କୁ ମାଡ଼ ମାରିବା ସହ ଛୁରି ଦେଖାଇ ଭୟଭୀତ କରି ୨୫ ଲକ୍ଷ ଟଙ୍କା ମାଗିଥିଲେ। ଟଙ୍କା ନ ଦେଲେ ମିଛ ମାମଲା କରିଦେବାକୁ ଇରାନି ଧମକ ଦେବାରୁ ଡାକ୍ତର ଜଣକ ୧୦ଲକ୍ଷ ଟଙ୍କା ଦେବାକୁ ରାଜି ହୋଇଥିଲେ। ଏହାପରେ ବଳପୂର୍ବକ ଡାକ୍ତରଙ୍କ ଫୋନ୍ପେ’ରୁ ଅଭିଯୁକ୍ତମାନେ ୧ଲକ୍ଷ ଟଙ୍କା ନେଇଯାଇଥିଲେ। ପରେ ଅଭିଯୁକ୍ତମାନେ ଡାକ୍ତରଙ୍କ କାର୍ରେ ତାଙ୍କ ଘରକୁ ଯାଇ ୯ଲକ୍ଷ ଟଙ୍କାର ଚେକ୍ ଧରି ନିଜ ଘରକୁ ପଳାଇଥିଲେ। ଦୁଇଦିନ ପରେ ଡାକ୍ତର ଜଣଙ୍କ ଥାନାରେ ଏତଲା ଦେଇଥିଲେ। ପୋଲିସ ଆଇପିସି ଦଫା ୩୪୨, ୩୬୫, ୩୮୫, ୩୮୬, ୩୮୭ ଓ ୩୮୯ରେ ଏକ ମାମଲା (ନଂ.୨୩୩/୨୦୨୩) ରୁଜୁ କରି ତଦନ୍ତ ଆରମ୍ଭ କରିଥିଲା। ଅଭିଯୁକ୍ତ ଗିରିଜାଙ୍କ ନାଁରେ ଜଙ୍କିଆ ଥାନାରେ ଏକ ହତ୍ୟା ମାମଲା ରହିଥିବାବେଳେ ଅନ୍ୟ ଅଭିଯୁକ୍ତଙ୍କ ଆପରାଧିକ ଇତିହାସ ବିଷୟରେ ପୋଲିସ ଅଧିକ ଖୋଳତାଡ଼ କରୁଛି। ଏହି ଗ୍ୟାଙ୍ଗ ପୂର୍ବରୁ ଏଭଳି ଦୁଇଜଣଙ୍କଠରୁ ଟଙ୍କା ଲୁଟିଥିବାବେଳେ ଏନେଇ ଥାନାରେ ରିପୋର୍ଟ ହୋଇ ନ ଥିବା ପୋଲିସ ପକ୍ଷରୁ କୁହାଯାଇଛି।
