କଣାସ,୧୦ା୫(ବିଭୂତି ଭୂଷଣ ତ୍ରିପାଠୀ): କେନ୍ଦ୍ର ଓ ରାଜ୍ୟ ସରକାର ନଦୀନାଳର ସୁରକ୍ଷା ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଥିବାବେଳେ କଣାସ ବ୍ଲକର ଦୟା ଓ ଲୁଣାନଦୀର ମଧ୍ୟବର୍ତ୍ତୀ ୧୧ଟି ପଞ୍ଚାୟତର ବର୍ଷା ଓ ବନ୍ୟାଜଳ ନିଷ୍କାସନ ପାଇଁ ଥିବା ଖରଖରା ନାଳଟି କଲିକତି ଦଳରେ ପରିପୂର୍ଣ୍ଣ ହୋଇଯାଇଛି। ଫଳରେ ଚଳିତବର୍ଷର ବର୍ଷା ଓ ବନ୍ୟାଜଳ ନିଷ୍କାସନରେ ବାଧକ ସାଜୁଛି। ତ୍ରିଲୋଚନପୁର, କଣାସ, ସିରେଇ, ବିଜିପୁର, ଅଣ୍ଡରସିଂହ, ଗଡ଼ସାହି, ଖଣ୍ଡହତା, ଆଳିବାଡ଼, ଯାମଳଗୋଦା, ଗଡ଼ିଶାଗୋଦା ଗ୍ରାମ ପଞ୍ଚାୟତର ୭୯ଟି ଗ୍ରାମର ଧାନଜମିରେ ଆଗାମୀ ବର୍ଷାଋତୁରେ ବର୍ଷା ଓ ବନ୍ୟାଜଳ ଲହଡ଼ି ମାରିବାର ସମ୍ଭାବନା ରହିଛି। ଦୟା ଓ ଲୁଣାନଦୀର ମଧ୍ୟବର୍ତ୍ତୀ ଅଞ୍ଚଳ ଏହି ୧୧ଟି ଗ୍ରାମପଞ୍ଚାୟତର ବର୍ଷା ଓ ବନ୍ୟାଜଳ ନିଷ୍କାସନ ପାଇଁ କଣାସ ପଞ୍ଚାୟତ ସମିତି କାର୍ଯ୍ୟାଳୟଠାରୁ ଗୋଟିଏ ନାଳ ବଣଗାଁ ଜଗନ୍ନାଥ ସଡ଼କ, ଦାମୋଦରପୁର, ଦୁପୁର ଏବଂ ବ୍ରହ୍ମପଡ଼ା ଦେଇ ଚିଲିକା ମଧ୍ୟକୁ ଜଳ ନିଷ୍କାସନ ପାଇଁ ୧୪କି.ମି. ଧରି ରହିଛି। ପ୍ରତିବର୍ଷ ଉକ୍ତ ନାଳରେ କଲିକତି ଦଳ ଜମା ହୋଇ ପଚି ପୋତି ହୋଇପଡ଼ୁଥିବାବେଳେ ଚଳିତବର୍ଷ କଲିକତି ଦଳ ପୂର୍ଣ୍ଣହୋଇ ଯିବାରୁ ବର୍ଷା ଓ ବନ୍ୟାଜଳ ନିଷ୍କାସନରେ ଗୁରୁତର ବ୍ୟାଘାତ ସୃଷ୍ଟି ହେବାର ସମ୍ଭାବନା ରହିଛି। ପ୍ରତ୍ୟେକ ବର୍ଷ ଏହି ଅଞ୍ଚଳର ଚାଷୀ ବର୍ଷା ଓ ବନ୍ୟାଜଳ ଜମି ରହୁଥିବାରୁ ଶାରଦ ଫସଲ ହରାଇ ଚାଷୀ ଦାଦନ ଖଟିବାକୁ ବାହାର ରାଜ୍ୟକୁ ଯାଉଛନ୍ତି। ଏହି ନାଳଟି ଡ୍ରେନେଜ୍ ବିଭାଗର ହୋଇଥିବାରୁ, ଡ୍ରେନେଜ୍ ବିଭାଗର ସହକାରୀ ଯନ୍ତ୍ରୀ ପ୍ରଦୀପ କୁମାର ଜେନାଙ୍କୁ ପଚାରିବାରୁ, ଦଳ ସଫା କରିବାକୁ ଆମର କୌଣସି ଆର୍ଥିକ ବ୍ୟବସ୍ଥା ନାହିଁ। କିନ୍ତୁ ନାଳଗୁଡିକ ପ୍ରତି ୫ ବର୍ଷରେ ଥରେ ଲେଖାଏଁ ଖୋଳା ହେବାର ବ୍ୟବସ୍ଥା ରହିଛି। ୪ ବର୍ଷ ହେଲା ଖୋଳା ହୋଇ ନ ଥିବାରୁ ନାଳଗୁଡ଼ିକ ପୋତି ହୋଇଯାଇଛି।
