ଥୁଆମୂଳ ରାମପୁର, ୧୬।୬(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ୍ ଅନ୍ତର୍ଗତ କର୍ଲାପାଟ ଅଭୟାରଣ୍ୟ ପାର୍ଶ୍ୱ ଖଣ୍ଡୁଆଳ ମାଳି ପାହାଡ଼ ଉପରେ ଆସନ୍ତା ଜୁନ୍ ୧୯ ଓ ୨୦ ତାରିଖରେ ବାବା ଖଣ୍ଡୁଆ ବୁଢ଼ା ଏବଂ ମା’ ଡୋକରୀ ବୁଢ଼ୀଙ୍କ ପ୍ରସିଦ୍ଧ ବାର୍ଷିକ ଯାତ୍ରା ଅନୁଷ୍ଠିତ ହେବାକୁ ଯାଉଛି। ଚଳିତ ବର୍ଷ ଏହି ପାରମ୍ପରିକ ଗଣଯାତ୍ରା କେବଳ ଧାର୍ମିକ ରୀତିନୀତିରେ ସୀମିତ ନରହି ଏକ ବଡ଼ ଜନଆନ୍ଦୋଳନର ରୂପ ନେବାକୁ ଯାଉଛି। ନିଜର ଭିଟାମାଟି, ଜଳ-ଜଙ୍ଗଲ-ଜମି ଏବଂ ଅସ୍ତିତ୍ୱର ସୁରକ୍ଷା ପାଇଁ ପାହାଡ଼ ଉପରେ ଏକତ୍ରିତ ହେବାକୁ ଥିବା ହଜାର ହଜାର ମୂଳନିବାସୀ ପ୍ରସ୍ତାବିତ ଖଣ୍ଡୁଆଳ ମାଳି ଖଣି ଖନନ ବିରୋଧରେ ଏକ ବଜ୍ର ଶପଥ ନେବେ, ଯାହା ଚଳିତ ବର୍ଷ ଯାତ୍ରାର ମୁଖ୍ୟ ଆକର୍ଷଣ ସାଜିଛି।
ସୂଚନାଯୋଗ୍ୟ ଯେ, ଅଞ୍ଚଳରେ ଚାଲିଥିବା ଖଣି ବିରୋଧୀ ଜନଆନ୍ଦୋଳନ ଯୋଗୁଁ ଗତ ମାର୍ଚ୍ଚ ମାସରେ ହେବାକୁ ଥିବା ଏହି ଶତାବ୍ଦୀ ପ୍ରାଚୀନ ଯାତ୍ରା ସଠିକ୍ ସମୟରେ ହୋଇପାରି ନଥିଲା। ‘ଖଣ୍ଡୁଆଳ ମାଳି ସୁରକ୍ଷା ସମିତି’ ପକ୍ଷରୁ ଆୟୋଜିତ ଏହି ମହୋତ୍ସବରେ ଆସନ୍ତା ୧୯ ତାରିଖ ସକାଳୁ ପାରମ୍ପାରିକ ରୀତିନୀତି ଅନୁସାରେ ବାବା ଖଣ୍ଡୁଆଳ ଦେବତାଙ୍କ ଅନେକ ପୂଜାବିଧି ଆରମ୍ଭ ହେବ। ମୁଖ୍ୟ ପୂଜକ ରମସିଂ ମାଝୀ ସମସ୍ତ ପୂଜାକାର୍ଯ୍ୟ ସମ୍ପାଦନ କରିବେ ଏବଂ ଶ୍ରଦ୍ଧାଳୁମାନେ ସୃଷ୍ଟିର କଲ୍ୟାଣ ଉଦ୍ଦେଶ୍ୟରେ ମାନସିକ ଅନୁସାରେ ବଳି ପ୍ରଦାନ କରିବେ।
ମୂଳନିବାସୀଙ୍କ ଅଭିଯୋଗ ଅନୁଯାୟୀ, ସମ୍ବିଧାନର ପଞ୍ଚମ ଅନୁଚ୍ଛେଦ ଓ ପେସା (PESA) ଆଇନକୁ ଉଲ୍ଲଂଘନ କରି ଗ୍ରାମସଭାର ବିନା ସମ୍ମତିରେ ପ୍ରାକୃତିକ ସମ୍ପଦ ଲୁଟ୍ ଓ ପୋଲିସ ଦମନ ଚାଲିଛି। ଏହାର ପ୍ରତିବାଦରେ ସମସ୍ତ ବୁଦ୍ଧିଜୀବୀ ଓ ସାମ୍ବାଦିକ ବନ୍ଧୁ ମୂଳନିବାସୀଙ୍କ ଜୀବନ ଜୀବିକାର ଏହି ଲଢ଼େଇକୁ ସମର୍ଥନ କରିବାର କାର୍ଯ୍ୟକ୍ରମ ରହିଛି। ପାର୍ଶ୍ୱବର୍ତ୍ତୀ ୭ଟି ଗ୍ରାମ ପଞ୍ଚାୟତର ଜନସାଧାରଣଙ୍କ ସହଯୋଗରେ ହେଉଥିବା ଏହି ଯାତ୍ରାରେ ରାତିରେ ପାରମ୍ପରିକ ସାଂସ୍କୃତିକ କାର୍ଯ୍ୟକ୍ରମର ମଧ୍ୟ ବ୍ୟବସ୍ଥା କରାଯାଇଛି।
ଏହି ମାଳି ପର୍ବକୁ ସୂଚାରୁରୂପେ ସମ୍ପାଦନ କରିବା ପାଇଁ ‘ଖଣ୍ଡୁଆଳ ମାଳି ସୁରକ୍ଷା ସମିତି’ର ସଭାପତି କାର୍ତ୍ତିକ ମାଝୀ, ଦୁଷ୍ଟି ମାଝୀ, ରାମକୃଷ୍ଣ ମାଝୀ, ଲିଙ୍ଗୁ ମାଝୀ, କୁନି ମାଝୀ, ଚମ୍ପା ମାଝୀ, ଲୋକନାଥ ମାଝୀ, ବୈଦ୍ୟନାଥ )ନାୟକ, ବନ ମାଝୀ, ଘାସି ମାଝୀ, କୁଞ୍ଜ ମାଝୀ, ମାଧବ ବେନିଆ, ଜିତେନ୍ଦ୍ର ବେନିଆ, ବିକାଶ ମାଝୀ ଓ ବ୍ରିଟିଶ କୁମାର ପ୍ରମୁଖ ସଦସ୍ୟମାନେ ପରିଚାଳନା ଦାୟିତ୍ୱ ତୁଲାଉଛନ୍ତି। ଯାତ୍ରାକୁ ଦୃଷ୍ଟିରେ ରଖି ସ୍ଥାନୀୟ ଅଞ୍ଚଳରେ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି।
