ବେଙ୍ଗାଲୁରୁ, ୧୯।୪: ଆସନ୍ତା ୧୦ ତାରିଖରେ କର୍ନାଟକରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି। ଏହାପୂର୍ବରୁ ରାଜ୍ୟରେ ରାଜନୈତିକ ହଟଚମଟ ଦେଖାଯାଇଛି । ଟିକେଟ ବଣ୍ଟା ନେଇ ଭାଜପାରେ ଉତ୍ତେଜନା ଦେଖାଦେଇଛି। ଯେଉଁମାନେ ଟିକେଟ ପାଇନାହାନ୍ତି ସେମାନେ ଅନ୍ୟ ଦଳରୁ ଟିକେଟ୍ ପାଇବା ଆଶାରେ ଦଳ ଛାଡୁଛନ୍ତି। ବହୁ ହେଭିଓ୍ବେଟ୍ ନେତା ଦଳ ଛାଡ଼ିସାରିଛନ୍ତି। ତେବେ ଏଭଳି ପରିସ୍ଥିତିରେ ଭାଜପାକୁ ଆଉ ଏକ ଝଟ୍କା ଲାଗିବାକୁ ଯାଉଛି। ଭାଜପା ନେତା ତଥା ଏମ୍ଏଲସି ଅୟାନୁର ମଞ୍ଜୁନାଥ ଟିକେଟ୍ ନ ମିଳିବାରୁ ବିଧାନ ପରିଷଦ ସଦସ୍ୟ ଓ ଦଳରୁ ଇସ୍ତଫା ଦେବାକୁ ଘୋଷଣା କରିଛନ୍ତି।
ଗଣମାଧ୍ୟମ ସହ କଥାବାର୍ତ୍ତା କରି ଅୟାନୁର କହିଛନ୍ତି, ସେ ବିଧାନସଭା ନିର୍ବାଚନ ପାଇଁ ଶିବାମୋଗା ନିର୍ବାଚନମଣ୍ଡଳୀରୁ ଲଢ଼ିବେ। ଏଥିପାଇଁ ସେ ଆଜି ନାମାଙ୍କନପତ୍ର ଦାଖଲ କରିପାରନ୍ତି। କିନ୍ତୁ ସେ କେଉଁ ଦଳରୁ ପ୍ରତିଦ୍ୱନ୍ଦ୍ୱିତା କରିବେ ନା ସ୍ବାଧୀନ ପ୍ରାର୍ଥୀ ଭାବେ ଲଢିବେ ତାହା ସ୍ପଷ୍ଟ କରିନାହାନ୍ତି।
