ରାୟପୁର, ୧୯।୪: କର୍ନାଟକ, ମିଜୋରାମ, ମଧ୍ୟପ୍ରଦେଶ, ଛତିଶଗଡ, ରାଜସ୍ଥାନ ଏବଂ ତେଲଙ୍ଗାନାରେ ହେବାକୁ ଥିବା ବିଧାନସଭା ନିର୍ବାଚକୁ ନେଇ ରାଜନୀତି ତୀବ୍ର ହୋଇଛି।
କର୍ନାଟକରେ ଆସନ୍ତା ମେ’୧୦ରେ ନିର୍ବାଚନ ହୋକୁ ଥିବା ବେଳେ ଅନ୍ୟ ରାଜ୍ୟରେ ଏଯାଏ ତାରିଖ ଘୋଷଣା ହୋଇନାହିଁ। ତେବେ ନିର୍ବାଚନ ଆଗକୁ ଥିବା ବେଳେ ଏବେ ଶାସକ ଦଳ ଏବଂ ବିରୋଧୀ ଦଳ ମଧ୍ୟରେ ଆରୋପ ପ୍ରତ୍ୟାରୋପ ଆରମ୍ଭ ହୋଇଯାଇଛି। ଏହି ସମୟରେ ଛତିଶଗଡ ମୁଖ୍ୟମନ୍ତ୍ରୀ ଭୁପେଶ ବାଘେଲ ଏବଂ ପୂର୍ବତନ ମୁଖ୍ୟମନ୍ତ୍ରୀ ରମଣ ସିଂଙ୍କ ମଧ୍ୟରେ ଟୁଇଟର ଯୁଦ୍ଧ ଆରମ୍ଭ ହୋଇଛି। ଉଭୟ ନିଜ ନିଜ ସରକାରରେ ଉନ୍ନତ କାର୍ଯ୍ୟ କରିଛନ୍ତି ବୋଲି ଦାବି କରୁଛନ୍ତି। ପୂର୍ବତନ ମୁଖ୍ୟମନ୍ତ୍ରୀ ରମଣ ସିଂ ଟୁଇଟ୍ କରି ଦାବି କରିଛନ୍ତି ଯେ, ୨୦୦୮ ରୁ ୨୦୧୮ ମଧ୍ୟରେ ତାଙ୍କ ସରକାର ଲୋକଙ୍କୁ ରେକର୍ଡ ଲିଜ ଦେଇଛନ୍ତି ଏବଂ ଦେଶରେ ଦ୍ୱିତୀୟ ସ୍ଥାନରେ ଅଛନ୍ତି। ଏହାକୁ ନେଇ ଭୂପେଶ ବାଘେଲ ଟୁଇଟରେ ପାଲଟା ଜବାବ ଦେଇ କହିଛନ୍ତି, ୧୫ ବର୍ଷ ଧରି ରାଜ୍ୟକୁ ଠକିଥିବା ଝୁଠେ କି ସରତାଜ, ଜଙ୍ଗଲ ଅଧିକାର ଚିଠିର ବାସ୍ତବତା କ’ଣ?
ମୁଁ ଆପଣଙ୍କୁ କହୁଛି। ଆପଣ ହଜାର ହଜାର ଯୋଗ୍ୟ ବ୍ୟକ୍ତିଙ୍କ ଆବେଦନ ଅଳିଆରେ ପକାଇଦେଇଥିଲେ, ଆମେ ସେମାନଙ୍କୁ ଲିଜ ଦେଲୁ।
ଏହାପରେ ରମଣ ସିଂ କହିଛନ୍ତି, ମିଛର ବୟସ ମାତ୍ର କିଛି ଦିନ, ସତ୍ୟ ସାମ୍ନାକୁ ଆସିଲେ ସମସ୍ତେ ଡରନ୍ତି। ସାଢେ ୪ ବର୍ଷ ଧରି କୁଶାସନ ଚଳାଇ ରାଜ୍ୟରେ ଯେଉଁ ଅବସ୍ଥା କରିଛନ୍ତି, ତାହାର ସତ୍ୟତାରୁ ଆପଣ ପଳାଇ ପାରିବେ ନାହିଁ।
