ବେଙ୍ଗାଲୁରୁ, ୨୧।୨: କର୍ନାଟକରେ ଆଇପିଏସ୍, ଆଇଏଏସ୍ କଳି ଏବେ ରାଜ୍ୟ ରାଜନୀତିକୁ ସରଗରମ କରିଛି। ରବିବାର ଆଇପିଏସ୍ ଅଧିକାରୀ ଡି. ରୁପା ମୋଉଦଗିଲ ଆଇଏଏସ୍ ଅଫିସର ରୋହିଣୀ ସିନ୍ଧୁରିଙ୍କ ଆପତ୍ତିଜନକ ଫଟୋ ଫେସ୍ବୁକ୍ରେ ଅପ୍ଲୋଡ୍ କରିଥିଲେ। ରୋହିଣୀ ଏହି ଫଟୋକୁ ୨୦୨୧ରୁ ୨୦୨୨ ମଧ୍ୟରେ ୩ ପୁରୁଷ ଆଇଏଏସ୍ ଅଫିସରଙ୍କୁ ପଠାଇଥିବାବେଳେ ସେ ସେବା ଆଚରଣ ଉଲ୍ଲଂଘନ କରିଥିବା ରୁପା କହିଛନ୍ତି। ଏହା ପୂର୍ବରୁ ଶନିବାର ରୋହିଣୀଙ୍କ ଦୁର୍ନୀତିର ଏକ ତାଲିକା ରୁପା ପ୍ରକାଶ କରିଥିଲେ। ରୁପା ଏ ନେଇ କର୍ନାଟକ ମୁଖ୍ୟମନ୍ତ୍ରୀ ବାସଭରାଜ ବୋମାଇ ଏବଂ ମୁଖ୍ୟ ଶାସନ ସଚିବ ବନ୍ଦିତା ଶର୍ମାଙ୍କୁ ଅବଗତ କରାଇଥିବା କହିଛନ୍ତି। ଆଇପିଏସ୍ ଅଧିକାରୀଙ୍କ ଅଭିଯୋଗକୁ ଖଣ୍ଡନ କରିଛନ୍ତି ରୋହିଣୀ। ତାଙ୍କ ଚରିତ୍ର ସଂହାର କରିବା ଲାଗି ରୁପା ସୋସିଆଲ ମିଡିଆ ଏବଂ ହ୍ବାଟ୍ସଆପ୍ ଷ୍ଟାଟସ୍ରୁ ଫଟୋ ସ୍କ୍ରିନ୍ସଟ୍ ଜରିଆରେ ସଂଗ୍ରହ କରିଛନ୍ତି। ଏଥିସହ ରୋହିଣୀ ଯେଉଁ ଆଇଏଏସ୍ ଅଧିକାରୀଙ୍କୁ ନିଜ ଫଟୋ ଶେୟାର କରିଛନ୍ତି ସେମାନଙ୍କ ନାଁ ଗଣମାଧ୍ୟମରେ କହିବା ଲାଗି ରୁପାଙ୍କୁ ଚ୍ୟାଲେଞ୍ଜ କରିଛନ୍ତି। ରୁପା ମାନସିକ ରୋଗରେ ଆକ୍ରାନ୍ତ ବୋଲି ରୋହିଣୀ ଗଣମାଧ୍ୟମକୁ କହିଛନ୍ତି।
ଘଟଣା ସମ୍ପର୍କରେ ମୁଖ୍ୟମନ୍ତ୍ରୀ ଏବଂ ପୋଲିସ ମୁଖ୍ୟ ଅବଗତ ଅଛନ୍ତି। ରୁପା କର୍ନାଟକ ହସ୍ତତନ୍ତ ବିକାଶ ନିଗମର ପ୍ରବନ୍ଧ ନିର୍ଦ୍ଦେଶକ ଦାୟିତ୍ୱରେ ଥିବାବେଳେ ରୋହିଣୀ ହିନ୍ଦୁ ଧର୍ମୀୟ ସଂସ୍ଥାନ ଏବଂ ଚାରିଟେବୁଲ ଏଣ୍ଡାଓମେଣ୍ଟ ଡିପାର୍ଟମେଣ୍ଟର ଆୟୁକ୍ତ ଦାୟିତ୍ୱରେ ଅଛନ୍ତି।
