ଥୁଆମୂଳ ରାମପୁର, ୨।୫ (ଦୁର୍ଗା କୀର୍ତ୍ତି): ଥୁଆମୂଳ ରାମପୁର ବ୍ଲକ ଅଞ୍ଚଳରେ ଗତ ୩୦ ତାରିଖ ରାତିରୁ ଆରମ୍ଭ କରି ୧ ତାରିଖ ମଧ୍ୟାହ୍ନ ପର୍ଯ୍ୟନ୍ତ କାଳବୈଶାଖୀ ଜନିତ ଝଡ଼ତୋଫାନ ଓ ପ୍ରବଳ ବର୍ଷା ଯୋଗୁ ବ୍ୟାପକ କ୍ଷୟକ୍ଷତି ଘଟିଛି। ପ୍ରକୃତିର ଏହି ତାଣ୍ଡବଲୀଳା ଯୋଗୁ ଅଞ୍ଚଳର ଏକାଧିକ ପଞ୍ଚାୟତରେ ଜନଜୀବନ ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଥିବାବେଳେ ଲୋକେ ଭୟଭୀତ ଅବସ୍ଥାରେ ରହିଛନ୍ତି।
୩୦ ତାରିଖ ବିଳମ୍ବିତ ରାତିରେ ହୋଇଥିବା ପ୍ରବଳ ପବନ ଯୋଗୁ ସିନ୍ଧିପଦର ଗ୍ରାମପଞ୍ଚାୟତର ଶ୍ରୀମସ୍କା ଗ୍ରାମର ସିଦାସ ନାଏକ ଓ ମହେଶ୍ୱର ନାଏକଙ୍କ ପରିବାର ଗଭୀର ଭାବେ କ୍ଷତିଗ୍ରସ୍ତ ହୋଇଛନ୍ତି। ପବନର ବେଗ ଏତେ ଶକ୍ତିଶାଳୀ ଥିଲା ଯେ ଉଭୟଙ୍କ ଘରର ଆଜବେଷ୍ଟସ ଛାତ ଉଡ଼ିଯିବା ସହ ବର୍ଷା ଜଳରେ ଘରର ସମସ୍ତ ଆସବାବପତ୍ର ଓ ଲୁଗାପଟା ଭିଜି ନଷ୍ଟ ହୋଇଯାଇଛି। ସେହିପରି ଗୋପାଳପୁର ଗ୍ରାମପଞ୍ଚାୟତ ଅନ୍ତର୍ଗତ ସର୍ଗିଗୁଡ଼ା ଗ୍ରାମର ତିଲିସିଂ ମାଝୀଙ୍କ ଘରର ଆଜବେଷ୍ଟସ ମଧ୍ୟ ଭାଙ୍ଗି ଚୂରମାର ହୋଇଯାଇଛି। ସର୍ବସ୍ବ ହରାଇ ଏହି ଗରିବ ପରିବାରଗୁଡ଼ିକ ଏବେ ଅସହାୟ ହୋଇପଡ଼ିଛନ୍ତି।
୧ ତାରିଖ ମଧ୍ୟାହ୍ନରେ ପୁଣିଥରେ ହୋଇଥିବା ପ୍ରବଳ ବର୍ଷା ଓ ପବନରେ ପଶୁ ସମ୍ପଦର ମଧ୍ୟ କ୍ଷୟକ୍ଷତି ଘଟିଛି। ତଳଝାପି ଗ୍ରାମର ବିନୋଦ ଗୌଡ଼ଙ୍କ ଗାଈଗୁଡ଼ିକ ଗାଁ ପାଖ ଜଙ୍ଗଲରେ ଥିବାବେଳେ ଏକ ବିଶାଳ ଗଛ ସେମାନଙ୍କ ଉପରେ ଭାଙ୍ଗି ପଡ଼ିଥିଲା। ଏହି ଦୁର୍ଘଟଣାରେ ଗୋଟିଏ ଗାଈ ଓ ଗୋଟିଏ ବାଛୁରୀର ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ଅନ୍ୟ ଏକ ଗାଈ ଗୁରୁତର ଭାବେ ଆହତ ହୋଇଛି।
୩୦ ତାରିଖ ରାତିରେ ହୋଇଥିବା ବର୍ଷା ଯୋଗୁ ମୋତାଚୁଆଁ, କାଠକୁରା ଓ ବଡ଼ ବଣ୍ଡେଲ ଆଦି ଗ୍ରାମରେ ଅନେକ ବିରାଟକାୟ ଗଛ ରାସ୍ତା ଉପରେ ଉପୁଡ଼ି ପଡ଼ିଥିଲା। ୧ ତାରିଖ ସକାଳୁ ଘଟଣାସ୍ଥଳରେ ଅଗ୍ନିଶମ ବିଭାଗ କର୍ମଚାରୀ ପହଞ୍ଚି ଗଛ ସବୁ କାଟି ରାସ୍ତା ସଫା କରି ଯୋଗାଯୋଗ ସ୍ବାଭାବିକ କରିଥିଲେ। ଅନ୍ୟପଟେ ୧ ତାରିଖ ମଧ୍ୟାହ୍ନର ଝଡ଼ତୋଫାନରେ ବିଦ୍ୟୁତ ସରବରହ ଗୁରୁତର ଭାବେ ପ୍ରଭାବିତ ହୋଇଛି। ଚନ୍ଦ୍ରଗିରି ଓ ବଡ଼ଛତରଙ୍ଗ ଲାଇନ ସମେତ ଗୋପାଳପୁର ଫିଡରର ସେମେଲପଦର, ବାଲିସରା, ପୋଖରୀଗୁଡ଼ା ଓ ରାଣୀଡୁମେର ମେନ ଲାଇନରେ ବ୍ୟାପକ କ୍ଷୟକ୍ଷତି ଘଟିଛି। ସିଲେଟ ପଞ୍ଚାୟତର ଦାଣ୍ଡପଦର ସଂଯୋଗୀକରଣ ବ୍ରିଜ ଉପରେ ଆମ୍ବ ଗଛ ପଡ଼ି ଯାତାୟାତ ବାଧାପ୍ରାପ୍ତ ହୋଇଥିଲା।
ବିଦ୍ୟୁତ ସେବା ବିପର୍ଯ୍ୟସ୍ତ ହେବା ଫଳରେ ୧ ତାରିଖ ସନ୍ଧ୍ୟା ୬ଟାରୁ ସମସ୍ତ ପ୍ରକାର ନେଟୱର୍କ ସେବା ବିଚ୍ଛିନ୍ନ ହୋଇଯାଇଥିଲା। ବିଦ୍ୟୁତ ବିଭାଗ କର୍ମଚାରୀମାନେ ମରାମତି କାର୍ଯ୍ୟ ପାଇଁ ଚେଷ୍ଟା ଜାରି ରଖିଥିଲେ ମଧ୍ୟ ସେମାନଙ୍କ କାର୍ଯ୍ୟରେ କିଛିଟା ଦାୟିତ୍ୱହୀନତା ଦେଖାଦେଇଥିବା ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଦୀର୍ଘ ସମୟ ପରେ ବିଳମ୍ବିତ ରାତି ପ୍ରାୟ ୨ଟା ବେଳେ ବିଦ୍ୟୁତ ସଂଯୋଗ ଫେରିବା ପରେ ନେଟୱର୍କ ସେବା ସ୍ବାଭାବିକ ହୋଇଥିଲା।
ଅଞ୍ଚଳରେ ହୋଇଥିବା ଏହି ବ୍ୟାପକ କ୍ଷୟକ୍ଷତି ପରେ ସ୍ଥାନୀୟ ପ୍ରଶାସନ ତୁରନ୍ତ ଏହାର ତଦନ୍ତ କରିବାକୁ ଦାବି ହେଉଛି। କ୍ଷତିଗ୍ରସ୍ତ ପରିବାରଗୁଡ଼ିକୁ ସରକାରୀ ସହାୟତା ଓ ବାସଗୃହ ଯୋଗାଇ ଦେବା ସହ ନିଜର ରୋଜଗାରର ମାଧ୍ୟମ ହରାଇଥିବା ବିନୋଦ ଗୌଡ଼ଙ୍କୁ ଉଚିତ କ୍ଷତିପୂରଣ ପ୍ରଦାନ କରିବାକୁ ସାଧାରଣରେ ଦାବି କରାଯାଇଛି।
