ଭୁବନେଶ୍ୱର,୧୬।୭(ଅନୁରାଧା ମହାରଣା)ରମାଦେବୀ ମହିଳା ବିଶ୍ୱବିଦ୍ୟାଳୟରୁ ଜୁନିୟର କଲେଜ ଅଲଗା ହେବ। ଖୋର୍ଦ୍ଧା ଜିଲାପାଳଙ୍କ ଅଧ୍ୟକ୍ଷତାରେ ଗଠିତ କମିଟିର ସୁପାରିସକ୍ରମେ ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି। ଉକ୍ତ ନିଷ୍ପତ୍ତି ଅନୁସାରେ, ଜୁନିୟର କଲେଜ ବା ରମାଦେବୀ ମହିଳା ଉଚ୍ଚ ମାଧ୍ୟମିକ ବିଦ୍ୟାଳୟକୁ ଅଲଗା କରାଯାଇ ନିକଟରେ ଥିବା ୟୁନିଟ-୯ ବାଳିକା ଉଚ୍ଚ ବିଦ୍ୟାଳୟକୁ ସ୍ଥାନାନ୍ତର କରାଯିବ। ଉକ୍ତ ବାଳିକା ଉଚ୍ଚ ବିଦ୍ୟାଳୟର ଷଷ୍ଠରୁ ଦଶମ ଶ୍ରେଣୀ ପର୍ଯ୍ୟନ୍ତ ୟୁନିଟ୍-୯ ବାଳକ ବିଦ୍ୟାଳୟରେ ସାମିଲ କରାଯିବ। ଏହି ପୃଥକୀକରଣ ପ୍ରକ୍ରିୟାକୁ ରମାଦେବୀ ମହିଳା ବିଶ୍ୱବିଦ୍ୟାଳୟ କୁଳପତି ଅପରାଜିତା ଚୌଧୁରୀ ଗୁରୁତ୍ୱର ସହ ନେଇଛନ୍ତି। ରମାଦେବୀ ମହିଳା ଡିଗ୍ରୀ କଲେଜ ବିଶ୍ୱବିଦ୍ୟାଳୟରେ ପରିଣତ ହେବା ପରେ ଗୋଟିଏ କ୍ୟାମ୍ପସରେ ବିଶ୍ୱବିଦ୍ୟାଳୟ ସହ ରମାଦେବୀ ମହିଳା ଉଚ୍ଚ ମାଧ୍ୟମିକ ବିଦ୍ୟାଳୟର(ଯୁକ୍ତ୨) ଚାଲୁଥିବାରୁ ବିଭିନ୍ନ ଅସୁବିଧା ହେଉଛି। ଶ୍ରେଣୀଗୃହ ଅଭାବରୁ ଯୁକ୍ତ୨ ପାଠପଢ଼ା ଦିନକୁ ମାତ୍ର ତିନି ଘଣ୍ଟା ଅର୍ଥାତ୍ ସକାଳ ୭ରୁ ୧୦ଟା ପର୍ଯ୍ୟନ୍ତ ଚାଲୁଛି। ଏହାଦ୍ୱାରା ଯୁକ୍ତ ୨ର ପ୍ରାୟ ୨୪୦୦ ଛାତ୍ରୀଙ୍କ ପାଠପଢ଼ା ପ୍ରଭାବିତ ହେଉଛି। ତେବେ ସ୍ଥାନାନ୍ତର ନିଷ୍ପତ୍ତି ହେବା ପରେ ଉଚ୍ଚଶିକ୍ଷା ସଚିବ, ଉଚ୍ଚ ମାଧ୍ୟମିକ ଶିକ୍ଷା ନିର୍ଦ୍ଦେଶକ, ରମାଦେବୀ ବିଶ୍ୱବିଦ୍ୟାଳୟ କୁଳପତି ଓ ରମାଦେବୀ ଯୁକ୍ତ୨ କଲେଜର ପ୍ରିନ୍ସିପାଲ ୟୁନିଟ-୯ ବାଳିକା ଉଚ୍ଚ ବିଦ୍ୟାଳୟ ପରିଦର୍ଶନ କରିଥିଲେ। ଶ୍ରେଣୀଗୃହରେ କିଛି ମାତ୍ରାରେ ଭିତ୍ତିଭୂମି ସଜାଡ଼ିଲେ କଳା ଏବଂ ବାଣିଜ୍ୟ ବିଭାଗ ସ୍ଥାନାନ୍ତରିତ ହୋଇପାରିବ। ଏହାସହ ସକାଳ ୧୦ଟାରୁ ୫ଟା ପର୍ଯ୍ୟନ୍ତ କ୍ଲାସ କରାଯାଇପାରିବ। ତେବେ କୋଠା ନିର୍ମାଣ ହେବା ପର୍ଯ୍ୟନ୍ତ ରମାଦେବୀ ବିଶ୍ୱବିଦ୍ୟାଳୟ କ୍ୟାମ୍ପସରେ ବିଜ୍ଞାନ କ୍ଲାସ ଜାରି ରହିବ।
ଅନ୍ୟପଟେ ୟୁନିଟ-୯ ବାଳିକା ଉଚ୍ଚ ବିଦ୍ୟାଳୟ ଓ ରମାଦେବୀ ମହିଳା ଉଚ୍ଚ ମାଧ୍ୟମିକ ବିଦ୍ୟାଳୟ ଛାତ୍ରୀଙ୍କ ଉନ୍ନତି ପାଇଁ ଭିତ୍ତିଭୂମିର ବିକାଶ ତଥା ନୂତନ ଶ୍ରେଣୀଗୃହ ପ୍ରସ୍ତୁତି, ଅଡିଟୋରିୟମ, ଲାଇବ୍ରେରି, ବିଜ୍ଞାନ ଲାବୋରେଟୋରି, ହଷ୍ଟେଲ ଆଦି ନିର୍ମାଣ ପାଇଁ ପଦକ୍ଷେପ ନିଆଯିବ।
କି, ଚଳିତବର୍ଷ ୟୁନିଟ-୯ ବାଳକ ବିଦ୍ୟାଳୟରେ ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ୭୫୨ଜଣ ଛାତ୍ରୀଛାତ୍ର (ବାଳକ ୪୪୦ ଓ ବାଳିକା ୩୧୨ ଜଣ) ନାମ ଲେଖାଇଛନ୍ତି। ୟୁନିଟ-୯ ବାଳିକା ଉଚ୍ଚ ବିଦ୍ୟାଳୟରେ ଷଷ୍ଠରୁ ଦଶମ ଶ୍ରେଣୀ ପର୍ଯ୍ୟନ୍ତ ୩୮୧ଜଣ ଛାତ୍ରୀଛାତ୍ର ରହିଛନ୍ତି। ତେବେ ମିଶ୍ରଣ ପରେ ଛାତ୍ରୀଛାତ୍ରଙ୍କ ସଂଖ୍ୟା ୧୧୩୩ରେ ପହଞ୍ଚତ୍ଛି।
ୟୁନିଟ-୯ ଉଚ୍ଚ ବିଦ୍ୟାଳୟରେ ୨୦ଜଣ ଶିକ୍ଷକ ଏବଂ ୟୁନିଟ-୯ ବାଳିକା ଉଚ୍ଚ ବିଦ୍ୟାଳୟରେ ୧୭ଜଣ ଶିକ୍ଷକ କାର୍ଯ୍ୟ କରୁଥିବାରୁ ମିଶ୍ରଣ ପରେ ଏମାନଙ୍କ ସଂଖ୍ୟା ୩୭ରେ ପହଞ୍ଚତ୍ବ। ଫଳରେ ଶିକ୍ଷକଙ୍କ ଅଭାବର ସମସ୍ୟା ସମାଧାନ ହୋଇପାରିବ।
