କୁଜଙ୍ଗ,୨ା୪(ଡି.ଏନ୍.ଏ.): ଚଳିତ ବର୍ଷ ଓଡ଼ିଶା ସରକାରଙ୍କ ଦ୍ୱାରା ଆଦାୟ ହୋଇଥିବା ମୋଟ ଖଣି ରାଜସ୍ବରେ ଜେଏସ୍ଡବ୍ଲ୍ୟୁ ପୁଣି ସର୍ବାଧିକ ଯୋଗଦାନକାରୀ ହୋଇପାରିଛି। ଚଳିତ ଆର୍ଥିକ ବର୍ଷରେ ଜେଏସ୍ଡବ୍ଲ୍ୟୁ ଖଣି ରାଜସ୍ବ ବାବଦକୁ ୧୮ହଜାର ୨୮୪କୋଟି ଟଙ୍କା ଦେଇଛି। ୨୦୨୧-୨୨ ଆର୍ଥିକ ବର୍ଷରେ କେବଳ ବିଡ୍ ପ୍ରିମିୟମ ମାଧ୍ୟମରେ କମ୍ପାନୀ ୧୧ହଜାର ୬୮୬ କୋଟି ଟଙ୍କାର ରିଟର୍ନ ଦେଇଛି। ଗତ ଆର୍ଥିକ ବର୍ଷରେ ଜେଏସ୍ଡବ୍ଲ୍ୟୁର ମୋଟ ଖଣିଜ ରାଜସ୍ବ ୩ ହଜାର ୬୫୦ କୋଟି ଟଙ୍କା ଥିଲା। ୨୦୨୧-୨୨ ଆର୍ଥିକ ବର୍ଷରେ ଏଥିରେ ଆଖିଦୃଶିଆ ବୃଦ୍ଧି ଘଟିଛି। ଜେଏସ୍ଡବ୍ଲ୍ୟୁ ଷ୍ଟିଲ ନିଲାମ ନେଇଥିବା କ୍ୟାପ୍ଟିଭ୍ ଖଣିରୁ ପ୍ରିମିୟମ ଏବଂ ଅନ୍ୟାନ୍ୟ ବକେୟା ବାବଦ ରାଜସ୍ବ ରାଜ୍ୟ ସରକାରଙ୍କ ଦ୍ୱାରା ଆଦାୟ ହୋଇଥିବା ମୋଟ ଖଣିଜ ରାଜସ୍ବର ୫୨.୫ ପ୍ରତିଶତ ବା ୨୪ହଜାର ୧୭୧କୋଟି ଟଙ୍କା। ୨୦୨୧-୨୨ ଆର୍ଥିକ ବର୍ଷର ଚତୁର୍ଥ କ୍ୱାର୍ଟର ତଥା ଶେଷ ତ୍ରୈମାସିକ ରାଜସ୍ବ ଡାଟା ଅନୁସାରେ ଜେଏସ୍ଡବ୍ଲ୍ୟୁ ଏହାର କ୍ୟାପ୍ଟିଭ ଖଣିରୁ ସମସ୍ତ ବକେୟା ପ୍ରଦାନ ସହ ରାଜକୋଷକୁ ୩ ହଜାର ୫୧୭ କୋଟି ଟଙ୍କାର ଯୋଗଦାନ ଦେଇଛି।
ସୂଚନା ଯୋଗ୍ୟ, ମାର୍ଚ୍ଚରେ ରାଜ୍ୟ ଖଣି ରାଜକୋଷରେ ଜେଏସ୍ଡବ୍ଲ୍ୟୁର ଯୋଗଦାନ ୧ହଜାର ୯ଶହ କୋଟି ଟଙ୍କା ପାର କରିଥିଲା। ନିକଟରେ ଆଗତ ହୋଇଥିବା ଅନ୍ତରୀଣ ବଜେଟ ଅନୁସାରେ ଖଣି ରାଜସ୍ବ ରାଜ୍ୟର ନିଜସ୍ବ ମୋଟ ଅଣ ଟିକସ ରାଜସ୍ବର ୯୦ ପ୍ରତିଶତ। ନିଲାମ ବ୍ଲକଗୁଡ଼ିକରୁ ଆଦାୟ ଖଣିଜ ରାଜସ୍ବ ସମ୍ପ୍ରତି ରାଜ୍ୟ ଅର୍ଥନୀତିକୁ ସୁଦୃଢ କରିପାରିଛି। ବିଶେଷକରି ଜେଏସ୍ଡବ୍ଲ୍ୟୁ ଓଡ଼ିଶାରେ ଖଣି ନିଲାମ ନେବାରେ ସର୍ବାଗ୍ରେ ରହିଛି ଏବଂ ରାଜ୍ୟ ତଥା ରାଜ୍ୟବାସୀଙ୍କ ଅଭିବୃଦ୍ଧି ଲକ୍ଷ୍ୟକୁ ଗୁରୁତ୍ୱ ଦେଇ ଆସୁଛି। ଆହୁରି ମଧ୍ୟ ଚଳିତ ଆର୍ଥିକ ବର୍ଷରେ ଜେଏସ୍ଡବ୍ଲ୍ୟୁ ନିଲାମ ନେଇଥିବା ଖଣିରୁ ଉପତ୍ାଦନ ୨୪.୧ ମେଟ୍ରିକ ଟନ୍ ଥିବା ବେଳେ ଉପତ୍ାଦ ପ୍ରେରଣ ୨୧.୩ମେଟ୍ରିକ ଟନ୍ ରହିଥିବାର ଜଣାପଡ଼ିଛି। ୨୦୨୦-୨୧ ଆର୍ଥିକ ବର୍ଷରେ ଉପତ୍ାଦନ ଓ ଡେସ୍ପାଚ ଯଥାକ୍ରମେ ୧୬.୬୬ ଏବଂ ୯.୬୭ ମେଟ୍ରିକ ଟନ୍ ରହିଥିଲା। କରୋନା ମହାମାରୀ ଯୋଗୁ ସମସ୍ତ ଯୋଗାଣ ଶୃଙ୍ଖଳ ବ୍ୟାହତ ହୋଇଥିବା ବେଳେ ଜେଏସ୍ଡବ୍ଲ୍ୟୁ ଏହାର ଖଣି କାର୍ଯ୍ୟ ଆରମ୍ଭ କରିଥିଲା। କ୍ରମେ ଏହାର ଉପତ୍ାଦନ ବୃଦ୍ଧି ଜାରିରଖି ଗୋଟିଏ ଦିନରେ ୧ଲକ୍ଷ ଟନ୍ ଲୁହାପଥର ପରିବହନ ତଥା ପ୍ରେରଣ କରିବାର ମାଇଲ ଖୁଣ୍ଟ ହାସଲ କରିଛି। ଖଣିଜ ରାଜସ୍ବରେ ଆଖିଦୃଶିଆ ବୃଦ୍ଧିଯୋଗୁ ଏହି ମଧ୍ୟବର୍ତ୍ତିକାଳୀନ ବଜେଟରେ ଗ୍ରାମୀଣ ବିକାଶ ପାଇଁ ଅଧିକ ବ୍ୟୟ ବରାଦ କରାଯାଇଛି। ତେଣୁ ଉନ୍ନତ ଓ ସମୃଦ୍ଧ ଓଡ଼ିଶା ଗଠନରେ ସହଭାଗିତା ପାଇଁ ଜେଏସ୍ଡବ୍ଲ୍ୟୁ ଗର୍ବିତ ବୋଲି କମ୍ପାନୀ ପକ୍ଷରୁ କୁହାଯାଇଛି।
