ନୂଆଦିଲ୍ଲୀ,୨୭।୧: ଭାରତ-ଇଂଲଣ୍ଡ ମଧ୍ୟରେ ଫେବୃୟାରୀ ୫ରୁ ଆରମ୍ଭ ହେବ ଟେଷ୍ଟ ସିରିଜ। ଚେନ୍ନାଇରେ ଏହାର ପ୍ରଥମ ମୁକାବିଲା ଖେଳାଯିବ। ଅଷ୍ଟ୍ରେଲିଆ ବିପକ୍ଷ ସିିରିଜ୍ରେ ଦମ୍ଦାର ବିଜୟ ପରେ ଏବେ କ୍ରିକେଟ ପ୍ରଶଂସକଙ୍କ ନଜର ଏହି ମ୍ୟାଚ୍ ଉପରେ ରହିଛି। ଏହାଛଡ଼ା କରୋନା କଟକଣା ପରେ ସ୍ବଦେଶରେ ଅନ୍ତଃରାଷ୍ଟ୍ରୀୟ ମ୍ୟାଚ୍ ଖେଳାଯାଉଥିବାରୁ ଏହା ବେଶ୍ ଗୁରୁତ୍ୱପୂର୍ଣ୍ଣ ରହିଛି।
କନ୍ୟା ସନ୍ତାନର ପିତା ହୋଇଥିବା ବିରାଟ କୋହଲି ଭାରତୀୟ ଦଳର ନେତୃତ୍ୱ ନେଉଥିବା ବେଳେ ଜୋ ରୁଟ୍ଙ୍କ ଅଧିନାୟକତ୍ୱରେ ପ୍ରଥମ ଥର ପାଇଁ ଇଂଲଣ୍ଡ ଟିମ୍ ଭାରତ ପହଞ୍ଚିଛି। ଭଲ ଫର୍ମରେ ଥିବାରୁ ଜୋ ରୁଟ୍ଙ୍କ ପାଇଁ ଏହି ଗସ୍ତ ସ୍ମରଣୀୟ ହେବ ବୋଲି କୁହାଯାଉଛି।
ରୁଟ୍ ଖେଳିବାକୁ ଥିବା ଚେନ୍ନାଇ ଟେଷ୍ଟ ତାଙ୍କ କ୍ୟାରିୟରର ୧୦୦ତମ ଟେଷ୍ଟ ହେବାକୁ ଯାଉଛି। ଇଂଲଣ୍ଡ ପାଇଁ ଏହି ଉପଲବ୍ଧି ହାସଲ କରିବାରେ ସେ ୧୫ତମ ଖେଳାଳି ପାଲଟିବେ।
ନିକଟରେ ଇଂଲଣ୍ଡ-ଶ୍ରୀଲଙ୍କା ଟେଷ୍ଟ ସିରିଜରେ ଉଲ୍ଲେଖନୀୟ ପ୍ରଦର୍ଶନ କରିଥିଲେ ଜୋ ରୁଟ୍। ସିରିଜରେ ଖେଳାଯାଇଥିବା ଦୁଇ ଟେଷ୍ଟ ମ୍ୟାଚ୍ର ୪ ପାଳିରେ ୪୨୬ ରନ୍ କରିଥିଲେ। ପ୍ରଥମ ଟେଷ୍ଟର ପ୍ରଥମ ପାଳିରେ ସର୍ବାଧିକ ସ୍କୋର ୨୨୮ ରନ୍ କରିଥିଲେ ସେ। ଦ୍ୱିତୀୟ ଟେଷ୍ଟରେ ସେ ଦ୍ୱିଶତକ କରିବାରୁ ୧୪ ରନ୍ ଦୂରରେ ରହି ନିରାଶ ହୋଇଥିଲେ।
