ନୂଆଦିଲ୍ଲୀ,୨୩।୮: ଦିଲ୍ଲୀରେ ପ୍ରତିରକ୍ଷା ମନ୍ତ୍ରଣାଳୟ (ଡିଫେନ୍ସ ମିନିଷ୍ଟ୍ରି) ରେ କାର୍ଯ୍ୟରତ ଜଣେ ୩ ମାସର ଗର୍ଭବତୀ ମହିଳା ଆତ୍ମହତ୍ୟା କରିଛନ୍ତି। ଅଭିଯୋଗ ହୋଇଛି ଯେ ଶାଶୂଘର ଲୋକେ ତାଙ୍କୁ ମାନସିକ ଓ ଶାରୀରିକ ନିର୍ଯାତନା ଦେଉଥିଲେ, ଯାହାଯୋଗୁଁ ଅତିଷ୍ଠ ହୋଇ ସେ ଏପରି ବଡ଼ ପଦକ୍ଷେପ ନେଇଛନ୍ତି। ମୃତକଙ୍କ ବାପଘର ଲୋକଙ୍କ ମଧ୍ୟରେ ପ୍ରବଳ ଅସନ୍ତୋଷ ପ୍ରକାଶ ପାଇଛି। ସେମାନେ ତାଙ୍କ ସ୍ୱାମୀ ଏବଂ ଶାଶୂଘର ଲୋକଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ପୁଲିସ ସେମାନଙ୍କ ଅଭିଯୋଗ ଆଧାରରେ ଏଫଆଇଆର୍ (FIR) ରୁଜୁ କରି ଘଟଣାର ଅଧିକ ତଦନ୍ତ ଚଳାଇଛି।
ମିଳିଥିବା ସୂଚନା ଅନୁସାରେ, ଦ୍ୱାରକା ଅଞ୍ଚଳର ବାସିନ୍ଦା ୩୦ ବର୍ଷୀୟା ନାଜିୟା ଖାନମ ପ୍ରତିରକ୍ଷା ମନ୍ତ୍ରଣାଳୟରେ ଆସିଷ୍ଟାଣ୍ଟ ସେକ୍ସନ ଅଫିସର (ASO) ଭାବେ କାର୍ଯ୍ୟ କରୁଥିଲେ। ୧୧ ଏପ୍ରିଲ ୨୦୨୬ରେ ଅଜମ ଅଲ୍ଲୀ ଖାନଙ୍କ ସହ ତାଙ୍କର ବିବାହ ହୋଇଥିଲା। ମୃତକଙ୍କ ପରିବାର ଲୋକେ ପ୍ରକାଶ କରିଛନ୍ତି ଯେ ସେ ଶାଶୂଘରରେ ବହୁତ ହଇରାଣ ହେଉଥିଲେ। ସେମାନେ ତାଙ୍କୁ ଶାରୀରିକ ଓ ମାନସିକ ର୍ନିଯାତନା ଦେଉଥିବା ନେଇ ସେ ଫୋନରେ ବାରମ୍ୱାର ନିଜ ପରିବାରକୁ ଜଣାଇଥିଲେ, ଯାହାଯୋଗୁଁ ସେ ଅତ୍ୟନ୍ତ ମାନସିକ ଚାପରେ ରହୁଥିଲେ। ନାଜିୟାଙ୍କ ପରିବାର ଅନୁସାରେ, ତାଙ୍କୁ ଗାଳିଗୁଲଜ, ମାଡ଼ପିଟ, ଘରୁ ବାହାର କରିଦେବା ସହ ଜୀବନରୁ ମାରିଦେବାର ଧମକ ମଧ୍ୟ ଦିଆଯାଉଥିଲା।
ସେମାନଙ୍କ ପରିବାର ଲୋକେ ଜଣାଇଛନ୍ତି ଯେ ୨୧ ଅଗଷ୍ଟରେ ଶାଶୂଘର ଲୋକଙ୍କ ପକ୍ଷରୁ ସେମାନଙ୍କୁ ଏକ ଫୋନ କଲ ଆସିଥିଲା, ଯେଉଁଥିରେ ସେମାନଙ୍କ ଝିଅ ଆତ୍ମହତ୍ୟା କରିଥିବା ନେଇ କୁହାଯାଇଥିଲା। ଏହି ଖବର ଶୁଣି ସେମାନେ ସ୍ତବ୍ଧ ହୋଇଯାଇଥିଲେ। ଝିଅର ପରିବାର ଲୋକଙ୍କ ଦାବି ଯେ ସେ ଆତ୍ମହତ୍ୟା କରିନାହାନ୍ତି, ବରଂ ତାଙ୍କୁ ହତ୍ୟା କରାଯାଇଛି। ଏହି ମାମଲାର ନିରପେକ୍ଷ ତଦନ୍ତ କରାଯାଇ ଦୋଷୀଙ୍କୁ କଠୋରରୁ କଠୋର ଦଣ୍ଡ ଦେବାକୁ ସେମାନେ ଦାବି କରିଛନ୍ତି।
ନାଜିୟାଙ୍କ ମୃତ୍ୟୁ ଖବର ପାଇବା କ୍ଷଣି ପୁଲିସ ଘଟଣାସ୍ଥଳରେ ପହଞ୍ଚିଥିଲା। ପଚରାଉଚୁରା ସମୟରେ ନାଜିୟାଙ୍କ ସ୍ୱାମୀ କହିଥିଲେ ଯେ ଝଗଡ଼ା ପରେ ସେ ନିଜକୁ ଗୋଟିଏ ରୁମରେ ବନ୍ଦ କରିଦେଇଥିଲେ। ପରବର୍ତ୍ତୀ ସମୟରେ ସେ ନାଜିୟାଙ୍କୁ ଝରକାରେ ଝୁଲୁଥିବା ଅବସ୍ଥାରେ ଦେଖିବାକୁ ପାଇଥିଲେ। ଘଟଣାର ଗାମ୍ଭୀର୍ଯ୍ୟକୁ ଦୃଷ୍ଟିରେ ରଖି ପୁଲିସ ଦ୍ୱାରକାରୁ କ୍ରାଇମ ଟିମକୁ ଘଟଣାସ୍ଥଳକୁ ଡକାଇଥିଲା। ଟିମ ସେହି ସ୍ଥାନର ସୂକ୍ଷ୍ମ ଯାଞ୍ଚ କରିଥିଲା। ଏହା ପରେ ମୃତଦେହକୁ ବ୍ୟବଚ୍ଛେଦ (Post-mortem) ପାଇଁ ଡିଡିୟୁ (DDU) ହସ୍ପିଟାଲ ଶବଗୃହକୁ ପଠାଇ ଦିଆଯାଇଛି।
ବର୍ତ୍ତମାନ ପୁଲିସ ଏଫଆଇଆର୍ ରୁଜୁ କରି ମାମଲାର ତଦନ୍ତ ଆରମ୍ଭ କରିଛି। ଏହି କେସକୁ ସବୁ କୋଣରୁ ତଦନ୍ତ କରାଯାଉଥିବା ନେଇ ପୁଲିସ କହିଛି। ମୃତକଙ୍କ ପରିବାରର ଅଭିଯୋଗ ଏବଂ ଶାଶୂଘର ଲୋକଙ୍କ ବକ୍ତବ୍ୟ ଦୁଇଟିଯାକ ଦିଗକୁ ଧ୍ୟାନରେ ରଖି ପୁଲିସ ତଦନ୍ତ ପ୍ରକ୍ରିୟା ଆଗକୁ ବଢ଼ାଉଛି।
