ଭୁବନେଶ୍ୱର/ବାଲେଶ୍ୱର, ୨୪।୭ (ଅନୁରାଧା ମହାରଣା /ମାନସ ବିଶ୍ୱାଳ): ଗତ ୧୬ ତାରିଖରେ ହୋଇଥିବା ଜେଇ ସିଭିଲ ମେନ୍ ପରୀକ୍ଷାକୁ ରଦ୍ଦ କରାଯାଇଥିବା ଓଡ଼ିଶା ଷ୍ଟାଫ୍ ସିଲେକ୍ସନ କମିଶନ (ଓଏସ୍ଏସ୍ସି) ଅଧ୍ୟକ୍ଷ ଅଭୟ ରବିବାର ଟୁଇଟ୍ କରି ସୂଚନା ଦେଇଛନ୍ତି। ପରୀକ୍ଷା ପୂର୍ବରୁ ପ୍ରଶ୍ନପତ୍ର ଲିକ୍ ହୋଇଥିବା ନେଇ ଅଭିଯୋଗର ତଦନ୍ତ କରି ବାଲେଶ୍ୱର ଏସ୍ପି ସାଗରିକା ନାଥ ଦେଇଥିବା ରିପୋର୍ଟ ଅନୁସାରେ ଏହି ପରୀକ୍ଷାକୁ ରଦ୍ଦ କରାଯାଇଛି। ଆସନ୍ତା ସେପ୍ଟେମ୍ବର ୩ ତାରିଖରେ ସାନି ପରୀକ୍ଷା ହେବା ନେଇ ଓଏସ୍ଏସ୍ସି ପକ୍ଷରୁ କୁହାଯାଇଛି। ରବିବାର ଅପରାହ୍ନରେ ଏସ୍ପି ଅଫିସରେ ଆୟୋଜିତ ଖବରଦାତା ସମ୍ମିଳନୀରେ ଏସ୍ପି ସାଗରିକା ସୂଚନା ଦେଇଛନ୍ତି ଯେ, ଗତ ୧୬ତାରିଖରେ ପ୍ରଶ୍ନପତ୍ର ଲିକ୍ ଅଭିଯୋଗରେ ସହଦେବଖୁଣ୍ଟା ଥାନାରେ ଏକ ମାମଲା ରୁଜୁ କରାଯାଇ ୯ଜଣ ଅଭିଯୁକ୍ତଙ୍କୁ ଗିରଫ କରାଯାଇଥିଲା। ପ୍ରାଥମିକ ତଦନ୍ତବେଳେ ଅଭିଯୁକ୍ତ ଓ ପରୀକ୍ଷାର୍ଥୀମାନଙ୍କ ମତରେ ତାଳମେଳ ରହୁ ନ ଥିଲା। ଏହାକୁ ଭିତ୍ତି କରି ତଦନ୍ତ ପ୍ରକ୍ରିୟାକୁ ତ୍ୱରାନ୍ବିତ କରାଯାଇଥିଲା। ଏପରି କି ଆସନ୍ତା ଦିନରେ ହେବାକୁ ଥିବା କିଛି ପରୀକ୍ଷାରେ ପ୍ରଶ୍ନପତ୍ର ଲିକ୍ ହୋଇପାରେ ବୋଲି ପୂର୍ବରୁ ଓଏସ୍ଏସ୍ସିରୁ ଏକ ଜେନେରାଲ ଆଲର୍ଟ ମେସେଜ୍ ଆସିଥିଲା। ତେଣୁ ଏହାକୁ ରୋକିବା ପାଇଁ ବାଲେଶ୍ୱର ପୋଲିସର ଲୋକାଲ ଇଣ୍ଟେଲିଜେନ୍ସି ଗ୍ରୁପ୍କୁ ଆଲର୍ଟ କରାଯାଇଥିଲା। ତଦନ୍ତ ସମୟରେ ଲିକ୍ ହୋଇଥିବା ପ୍ରଶ୍ନପତ୍ର ଏବଂ ମୂଳ ପ୍ରଶ୍ନପତ୍ର ମେଳ ଖାଉଥିବା ଜଣାପଡ଼ିଛି। ତେଣୁ ପରୀକ୍ଷା ପୂର୍ବରୁ କେତେଜଣ ପରୀକ୍ଷାର୍ଥୀଙ୍କୁ ପ୍ରଶ୍ନପତ୍ର ଦିଆଯାଇଥିଲା ସେ ସମ୍ପର୍କିତ ରିପୋର୍ଟ ଓଏସ୍ଏସ୍ସିକୁ ପ୍ରଦାନ କରାଯାଇଛି ବୋଲି ନାଥ କହିଥିଲେ। ଏଥିସହ ଏହି ର଼୍ୟାକେଟରେ ଓଡ଼ିଶାରୁ ଯେଉଁମାନେ ସାମିଲ ଅଛନ୍ତି, ସେମାନେ ମିଡିଲ୍ ମ୍ୟାନ୍ ଭାବେ କାର୍ଯ୍ୟ କରୁଥିଲେ। ଏହାର ମୁଖ୍ୟ ବା ମାଷ୍ଟରମାଇଣ୍ଡ ରାଜ୍ୟ ବାହାରେ ରହିଛନ୍ତି। ସେଥିପାଇଁ ଆମର ଟିମ୍ ବିଭିନ୍ନ ରାଜ୍ୟରେ ଅଧିକ ତଦନ୍ତ ଜାରି ରଖିଛନ୍ତି। ଖୁବ୍ଶୀଘ୍ର ଅନ୍ୟ ଅଭିଯୁକ୍ତମାନଙ୍କୁ ଗିରଫ କରାଯିବ। ଚଳିତ ମାସ ୨୧ ତାରିଖରେ ଗିରଫ ଅଭିଯୁକ୍ତମାନଙ୍କୁ ରିମାଣ୍ଡରେ ଆଣି ଜେରା କରିବାରୁ ପୂର୍ବରୁ ସେମାନେ ମଧ୍ୟପ୍ରଦେଶ, ଦିଲ୍ଲୀ, ବିହାରର କିଛି ମାମଲାରେ ସାମିଲ ଅଛନ୍ତି। ସେମାନଙ୍କ ନାମରେ ମାମଲା ମଧ୍ୟ ରୁଜୁ ହୋଇଛି। ଅଭିଯୁକ୍ତମାନେ ପରୀକ୍ଷା ପ୍ରଶ୍ନପତ୍ର ଲିକ୍ କରି ପରୀକ୍ଷାର୍ଥୀଙ୍କୁ ଦେଉଥିଲେ। ପେପର ଦେବା ପରେ ୫୦% ଟଙ୍କା ଏବଂ ମନୋନୀତ ହେବା ପରେ ବାକି ଟଙ୍କା ନେଉଥିଲେ। ଏହି ସ୍କାମ୍ରେ ସମ୍ପୃକ୍ତ ମୋଟ୍ ୯ଜଣ ଓଡ଼ିଶା ରାଜ୍ୟର ଭୁବନେଶ୍ୱରରୁ ଏମ୍ଡି ସମିରୁଦ୍ଦିନ, ମୁସ୍ତାଖିନ ଖାଁ, ସାଇନା ପରବିନ୍ ଓ ଖୋର୍ଦ୍ଧା ଅଞ୍ଚଳରୁ ବିଶ୍ୱରଞ୍ଜନ ମହାପାତ୍ରଙ୍କୁ ଗିରଫ କରାଯିବା ସହ ବିହାର ରାଜ୍ୟର ଅଜୟ କୁମାର, ବିଜେନ୍ଦ୍ର କୁମାର, ରାଜ କୁମାର ଓ ଦୀପକ କୁମାର ଏବଂ ଆନ୍ଧ୍ରପ୍ରଦେଶ ରାଜ୍ୟ ବିଶାଖାପାଟଣା ଅଞ୍ଚଳର ଏମ୍ଡ଼ି.କେ.ସିଦ୍ଦିକଙ୍କୁ ଗିରଫ କରାଯାଇଛି ବୋଲି ସ୍ବୀକାର କରିଥିବା ଏସ୍ପି ସୂଚନା ଦେଇଛନ୍ତି।
