ୱାଶିଂଟନ,୧୮।୧୦: H-1B ଭିସାକୁ ନେଇ ଆମେରିକାରେ ବିବାଦ ଜାରି ରହିଥିବା ବେଳେ ବିଦେଶୀ କର୍ମଚାରୀଙ୍କୁ ‘ଇଣ୍ଡେଞ୍ଚର୍ଡ ସର୍ଭେଣ୍ଟ’ ବା ‘ଚୁକ୍ତିବଦ୍ଧ ଶ୍ରମିକ’ କହିଥିବା ମନ୍ତବ୍ୟ ଉପରେ ସଫେଇ ଦେଇଛନ୍ତି ଆମେରିକାର ଉପରାଷ୍ଟ୍ରପତି ଜେଡି ଭାନ୍ସ । ତାଙ୍କର ଏହି ଶବ୍ଦ ପ୍ରୟୋଗ ହୁଏତ ଠିକ୍ ନଥିଲା ବୋଲି ସେ ସ୍ୱୀକାର କରିଛନ୍ତି । ତେବେ ନିଜର ଇମିଗ୍ରେସନ୍ ନୀତିକୁ ସମର୍ଥନ କରି ସେ କହିଛନ୍ତି ଯେ ଆମେରିକା ବିଦେଶୀ କର୍ମଚାରୀଙ୍କୁ ସ୍ୱାଗତ କରିବା ସହ ନିଜ ଦେଶର ନାଗରିକ ଓ କର୍ମଚାରୀଙ୍କ ସ୍ୱାର୍ଥକୁ ମଧ୍ୟ ସୁରକ୍ଷା ଦେବା ଆବଶ୍ୟକ।
ନିଜର ଭାରତୀୟ ବଂଶୋଦ୍ଭବ ଶାଶୁ-ଶ୍ୱଶୁରଙ୍କ କଥା ଉଠାଇ ଭାନ୍ସ କହିଛନ୍ତି ଯେ ସେ ସେମାନଙ୍କୁ ବହୁତ ଭଲ ପାଆନ୍ତି। ତାଙ୍କ ଶାଶୁ-ଶ୍ୱଶୁର ଦକ୍ଷିଣ ଭାରତରୁ ଆମେରିକା ଆସିଥିଲେ । ସେମାନଙ୍କ ଝିଅ ଉଷା ଭାନ୍ସ ଆମେରିକାରେ ଜନ୍ମଗ୍ରହଣ କରିଥିବା ବେଳେ ବର୍ତ୍ତମାନ ଦେଶର ସେକେଣ୍ଡ ଲେଡି ଅଛନ୍ତି ବୋଲି ସେ କହିଛନ୍ତି। ନିଜ ଶାଶୂ-ଶ୍ୱଶୁରଙ୍କ ପାଇଁ ସେ ଗର୍ବିତ ଏବଂ ସେମାନଙ୍କୁ ଭଲ ପାଆନ୍ତି ବୋଲି ଭାନ୍ସ ଉଲ୍ଲେଖ କରିଛନ୍ତି । ବିଶେଷକରି ଭାରତୀୟ ଆଇଟି ପେଶାଦାରଙ୍କ ସମେତ ବିଦେଶୀ କର୍ମଚାରୀଙ୍କ ପାଇଁ ଆମେରିକାର ଇମିଗ୍ରେସନ୍ ନୀତିକୁ ନେଇ ବିବାଦ ଚାଲିଥିବା ସମୟରେ ଭାନ୍ସଙ୍କ ଏହି ସଫେଇ ସାମ୍ନାକୁ ଆସିଛି । ଏହା ପୂର୍ବରୁ ତାଙ୍କ ମନ୍ତବ୍ୟକୁ ଭାରତର ବୈଦେଶିକ ମନ୍ତ୍ରଣାଳୟ ‘ଅନୁଚିତ ଏବଂ ଅତ୍ୟନ୍ତ ଆପତ୍ତିଜନକ’ ବୋଲି କହିଥିଲା।
ଭାନ୍ସଙ୍କ କହିବା ଅନୁଯାୟୀ, ଆମେରିକାର ଇମିଗ୍ରେସନ୍ ବ୍ୟବସ୍ଥା ଏପରି ହେବା ଉଚିତ ଯେଉଁଥିରେ ଦେଶର ବିକାଶରେ ଯୋଗଦାନ ଦେବାକୁ ଇଚ୍ଛୁକ ଲୋକଙ୍କୁ ସ୍ୱାଗତ କରାଯିବ, କିନ୍ତୁ ଏହାଦ୍ୱାରା ଆମେରିକୀୟ କର୍ମଚାରୀଙ୍କ ନିଯୁକ୍ତି ଉପରେ ନକାରାତ୍ମକ ପ୍ରଭାବ ପଡ଼ିବା ଉଚିତ ନୁହେଁ। ଉଦାହରଣ ଦେଇ ସେ କହିଛନ୍ତି, ଯଦି କୌଣସି ବଡ଼ କମ୍ପାନୀ ସ୍ଥାନୀୟ ସ୍ତରରେ ଉପଯୁକ୍ତ କର୍ମଚାରୀ ମିଳୁନଥିବା ଦର୍ଶାଇ ଜଣେ ବିଦେଶୀ ଆକାଉଣ୍ଟାଣ୍ଟଙ୍କୁ ନିଯୁକ୍ତି ଦିଏ, କିନ୍ତୁ ସେହି କମ୍ପାନୀରେ ପୂର୍ବରୁ କାମ କରୁଥିବା ଜଣେ ଆମେରିକୀୟ ଆକାଉଣ୍ଟାଣ୍ଟଙ୍କୁ ଚାକିରିରୁ ବାହାର କରିଦିଏ, ତେବେ ଏହା ନ୍ୟାୟସଙ୍ଗତ ନୁହେଁ।
ତାଙ୍କ ମତରେ, ଏପରି ପଦକ୍ଷେପ ଉଭୟ ବିଦେଶୀ କର୍ମଚାରୀ ଓ ଆମେରିକୀୟ କର୍ମଚାରୀଙ୍କ ପାଇଁ ଠିକ୍ ନୁହେଁ। ଅପ୍ରବାସୀଙ୍କୁ ବିରୋଧ କରିବା ତାଙ୍କର ଉଦ୍ଦେଶ୍ୟ ନୁହେଁ; ବରଂ ଇମିଗ୍ରେସନ୍ ବ୍ୟବସ୍ଥା ଆମେରିକାର ସ୍ୱାର୍ଥ ଅନୁଯାୟୀ କାମ କରିବା ଉଚିତ ବୋଲି ସେ କହିଛନ୍ତି।
