ନୂଆଦିଲ୍ଲୀ,୨ା୯(ପି.ଆଇ.ବି.): ଭାରତୀୟ ରେଲଓ୍ବେ ଟ୍ରାଫିକ୍ ସେବା (ଆଇଆର୍ଟିଏସ୍) ବରିଷ୍ଠ ଅଫିସର ଜୟା ବର୍ମା ସିହ୍ନା ଶୁକ୍ରବାର ରେଳଭବନରେ ରେଲଓ୍ବେ ବୋର୍ଡ (ରେଳ ମନ୍ତ୍ରଣାଳୟ)ର ନୂଆ ଅଧ୍ୟକ୍ଷ ଏବଂ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ଭାବେ ଦାୟିତ୍ୱ ଗ୍ରହଣ କରିଛନ୍ତି। ସେ ପ୍ରଥମ ମହିଳା ଭାବେ ଭାରତୀୟ ରେଲଓ୍ବେର ଏହି ଶୀର୍ଷ ପଦରେ ନିଯୁକ୍ତି ପାଇଛନ୍ତି। ଏଥିପାଇଁ କେନ୍ଦ୍ର କ୍ୟାବିନେଟ୍ ଗୁରୁବାର ସ୍ବୀକୃତି ଦେଇଥିଲା। ୧୯୮୮ରେ ସେ ଆଇଆର୍ଟିଏସ୍ରେ ଯୋଗଦେଇଥିଲେ। ଭାରତୀୟ ରେଳରେ ନିଜର ୩୫ ବର୍ଷରୁ ଊର୍ଦ୍ଧ୍ୱ ସମୟ କ୍ୟାରିୟରରେ ସେ ରେଲଓ୍ବେ ବୋର୍ଡର ସଦସ୍ୟ (ସଞ୍ଚାଳନ ଏବଂ ବ୍ୟବସାୟ ବିକାଶ), ଅତିରିକ୍ତ ସଦସ୍ୟ, ଟ୍ରାଫିକ ପରିବହନ ପରି ବିଭିନ୍ନ ଗୁରୁତ୍ୱପୂର୍ଣ୍ଣ ପଦବୀରେ କାର୍ଯ୍ୟ କରିଛନ୍ତି। ସେ ପ୍ରଥମ ମହିଳା ଭାବେ ଦକ୍ଷିଣ ପୂର୍ବ ରେଳପଥର ପ୍ରଧାନ ମୁଖ୍ୟ ପରିଚାଳନା ପ୍ରବନ୍ଧକ ଭାବେ ମଧ୍ୟ ନିଯୁକ୍ତି ପାଇଥିଲେ। ସେ ବାଂଲାଦେଶର ଢାକାରେ ଭାରତୀୟ ହାଇକମିଶନରେ ରେଳ ପରାମର୍ଶଦାତା ଭାବେ ମଧ୍ୟ କାର୍ଯ୍ୟ କରିଛନ୍ତି। ତାଙ୍କର ଏହି କାର୍ଯ୍ୟକାଳ ସମୟରେ କୋଲକାତାରୁ ଢାକା ପର୍ଯ୍ୟନ୍ତ ମୈତ୍ରୀ ଏକ୍ସପ୍ରେସ୍ ଉଦ୍ଘାଟନ କରାଯାଇଥିଲା।
